ရန်ကုန်မြို့ အချက်အချာကျသည့် နေရာများရှိ ရန်ကုန်တိုင်း ဒေသကြီး အစိုးရပိုင်ရုပ်ရှင်ရုံများကို ပုဂ္ဂလိကသို့ ငှားရမ်းထားသည့် ရငွေမှာ အလွန်နည်းပါး နေကြောင်း ရန်ကုန်တိုင်း ဒေသကြီး လွှတ်တော်ကိုယ်စားလှယ် ဦးကျော်ဇေယျ က လွှတ်တော်အစည်းအဝေး၌ ထောက်ပြ ဝေဖန်သည်။
ဦးကျော်ဇေယျက“၁၁ ရုံ ငှားထားတယ်။ သမ္မတရုံ ယခင် တလကို ကျပ်ငွေ ၁၇ သိန်း ရနေတာကနေ ၂၀၁၈ ဇူလိုင်လ မှာ ရတာ ၅၂ သိန်း ဖြစ်လာတယ်။ သို့သော်လည်းပဲ ကျနော် တင်ပြချင်တာကတော့ ဒီရုံတွေ ငှားတဲ့ငွေတွေဟာ အများ ကြီး နည်းနေပါ သေး တယ်။ ဒီငွေတွေဟာ လုပ်ငန်းရှင်တွေပဲ ရသွားတယ်” ဟု ပြောသည်။
၂၀၁၈-၂၀၁၉ခုနှစ် ဘဏ္ဍာရေးနှစ် ရန်ကုန်တိုင်း ဒေသကြီး၏ ဘဏ္ဍာငွေ အရအသုံးဆိုင်ရာဥပဒေကြမ်းကို စက်တင်ဘာ ၂၇ ရက်တွင် လွှတ်တော် ကိုယ်စားလှယ်များက ဆွေးနွေးကြစဉ် ၎င်းက ပြောဆိုခြင်း ဖြစ်သည်။
ထိုကဲ့သို့ ငှားရမ်းခရရှိမှုနည်းပါးနေခြင်းသည် အစိုးရအနေဖြင့် များစွာနစ်နာနေကြောင်း၊ ရုပ်ရှင်ရုံများကို ယခုငှားရမ်းခထက် နှစ်ဆ ပေးနိုင်သည့် လုပ်ငန်းရှင်များလည်းရှိနေကြောင်း ဦးကျော်ဇေယျက ဆက်ပြောသည်။
ဦးကျော်ဇေယျက “ရုံငှားခနည်းကြပေမယ့်လို့ မြန်မာ့ရုပ်ရှင်အဆင့်အတန်း မြင့်မားအောင် တဖက်တလမ်းက အထောက်အကူ ပြုနိုင်တယ်ဆိုရင် ကျနော်တို့ လက်ခံဖွယ်ရာ ရှိပါတယ်။ အခုအနေထားကတော့ လက်ခံဖွယ်ရာ မရှိပါဘူး။ အနုပညာ အသိုင်းအဝိုင်းက အသံတွေ ကြားနေရတယ်။ ဒီရုံငှားခကို နှစ်ဆပေးနိုင်သော လုပ်ငန်းရှင်များက သက်ဆိုင်ရာဝန်ကြီးဌာနကို တင်ပြ ပြီးသားပါ။ဒါတွေက ဘေးကို ရောက်ကုန်တဲ့ အနေအထားရှိပါတယ်”ဟု ပြောဆို သည်။
၂၀၁၈ ခုနှစ် ဇူလိုင်လမှစတင်ပြီး သမ္မတ ရုပ်ရှင်ရုံ၏ ၁ လ ငှားရမ်းခလျှင် ငွေကျပ် ၅၂ သိန်း၊ ရှေ့ဆောင် ရုပ်ရှင်ရုံ၏ ငှား ရမ်းခမှာ ကျပ် ၃၅ သိန်း၊ နေပြည်တော် ရုပ်ရှင်ရုံ၏ ငှားရမ်းခမှာ ကျပ် ၃၂ သိန်း၊ သွင် ရုပ်ရှင်ရုံ ငှားရမ်းခ ကျပ် သိန်း ၂၀၊ ဝဇီရာ ရုပ်ရှင်ရုံ ငှားရမ်းခမှာကျပ် ၁၅ သိန်း၊ စံပြရုပ်ရှင်ရုံ ငှားရမ်းခမှာ ၁၂ သိန်း၊ နဝဒေး ရုပ်ရှင်ရုံ ငှားရမ်းခ ကျပ် ၄၅ သိန်း အဖြစ် တိုးမြှင့် ကောက်ခံခဲ့ခြင်း ဖြစ်သည်ဟု ဆိုသည်။
၁၉၉၆ ခုနှစ်မှ စတင်၍ ၂၀၁၈ ဇွန်လအထိ သမ္မတရုပ်ရှင်ရုံ ၁ လ ငှားရမ်းခ ကျပ် ၁၇ သိန်းကျော်၊ ၂၀၀၂ ခုနှစ်မှ ၂၀၁၈ ဇွန်လအထိ ရှေ့ဆောင် ရုပ်ရှင်ရုံ ငှားရမ်းခ ၁၇ သိန်းကျော်နှင့် နေပြည်တော် ရုပ်ရှင်ရုံ ငှားရမ်းခ ၁၅ သိန်း ကျော်သာ ကောက်ယူထားကြောင်း သိရသည်။
ထို့ပြင် ၂၀၀၁ ခုနှစ်မှ စတင်ပြီး ၂၀၁၈ ဇွန်လ အထိ သွင်ရုပ်ရှင်ရုံ ၁ လ ငှားရမ်းခ ကျပ် ၉ သိန်းကျော်၊ ဝဇီရာ ရုပ်ရှင်ရုံ ငှားရမ်းခ ၁၀ သိန်း၊ ၂၀၀၀ ခုနှစ်မှ စတင်ပြီး ၂၀၁၈ ဇွန်လ အထိ စံပြ ရုပ်ရှင်ရုံ ငှားရမ်းခ ၅ သိန်းကျော်နှင့် ၁၉၉၇ ခုနှစ် မှ စတင်ပြီး ၂၀၁၈ ဇွန်လအထိ နဝဒေး ရုပ်ရှင်ရုံ ငှားရမ်းခ ကျပ်၂၃ သိန်းကျော်သာ ရှိခြင်း ဖြစ်သည်။
ရန်ကုန်မြို့လယ် ဧရိယာများအပါအဝင် အဆင့်မြင့် ကွန်ဒို၊ တိုက်ခန်းတချို့၏ တလ ငှားရမ်းခ နှုန်းထားမှာ အဆိုပါ ရုပ်ရှင်ရုံများ၏ ငှားရမ်းခ ထက်ပင် ပိုမိုများပြားနေပြီး ရွှေတောင်ကြားလမ်းရှိ ငှားရမ်း နေထိုင်သော ကွန်ဒို တချို့တွင် တလ လျှင် အမေရိကန် ဒေါ်လာ ၃၅၀၀ ဝန်းကျင် အထိ ပေါက်ဈေးရှိ နေကြောင်း ဈေးကွက်အတွင်းက စုံစမ်းသိရ သည်။
ရုပ်ရှင်ရုံများမှ ရသင့်ရထိုက်သည့် ငှားရမ်းခ ရမည်ဆိုပါက ဖွံ့ဖြိုးရေး လုပ်ငန်း များစွာ လုပ်နိုင်ပြီး ရန်ကုန်မြို့ အတွက် များစွာ အထောက်အကူ ပြုမည်ဖြစ်ကြောင်း ဦးကျော်ဇေယျက သုံးသပ်သည်။
အလုပ်အကိုင် ရှာဖွေရေး အေဂျင်စီ တခုတွင် အလုပ်လုပ်သည့် ကိုမင်းသူက “ဒီလို ရုပ်ရှင်ရုံကြီးတွေကနေ ငှားခက ဒီ လောက်တွေပဲ ရတယ် ဆိုတော့ ခေတ်အခါ ပေါက်ဈေးနဲ့ နည်းလွန်းတာပေါ့။ သူတို့ ရနေတဲ့ ဝင်ငွေက မနည်းလောက် ဘူး ထင်တယ်။ နေရာတွေကလည်း တကယ့်ကိုလူစည်းကားရာ နေရာ ပြီးတော့တခြား အဆောက်အအုံ တိုက်ခန်း တွေ ငှားခနဲ့လည်း ယှဉ်ကြည့်ပါဦး”ဟု ပြောသည်။
တိုင်းဒေသကြီး လွှတ်တော် ကိုယ်စားလှယ် ဦးကျော်ဇေယျက ရုပ်ရှင်ရုံ ငှားရမ်းခများ အပြင် အားကစားနှင့် ကာယ ပညာ ဦးစီး ဌာနများ၏ ဆိုင်ခန်း မြေနေရာ ငှားရမ်းခများမှာလည်း အလွန်ပင် နည်းပါးနေကြောင်း ထောက်ပြသွား သည်။
ဧရာဝတီ
0 comments:
Post a Comment