NLD ကို ဆန့်ကျင်နေသည့် သံဃာတချို့အား အစွန်းရောက်ဘုန်းတော်ကြီးဟု သုံးနှုန်းပြီး အခြေခံဥပဒေကိုလည်း ချိုးဖောက်နေဟု အဆင့်မြင့်အမေရိကန်သံတမန်ဟောင်း ဝေဖန်

NLD ကို ဆန့်ကျင်နေသည့် သံဃာတချို့အား အစွန်းရောက်ဘုန်းတော်ကြီးများဟု သုံးနှုန်းလိုက်ပြီး ၂၀၀၈ ဖွဲ့စည်းပုံအခြေခံဥပဒေကိုလည်း ချိုးဖောက်နေသည်ဟု မြန်မာနိုင်ငံဆိုင်ရာ အဆင့်မြင့်အမေရိကန်သံတမန် ဟောင်း Priscilla Clapp က အောက်တိုဘာ ၇ ရက်က VOA ၏ မြန်မာနိုင်ငံ ရွေးကောက်ပွဲအထူးအစီအစဉ် အဖြစ် တင်ဆက်သည့် အင်တာဗျူးတွင် ပြောကြားခဲ့သည်။ “ဒီရွေးကောက်ပွဲမှာ အစွန်းရောက်ဘုန်းတော်ကြီး တွေရဲ့ အခန်းကဏ္ဍက အင်မတန်မှ အပျက်သဘောဆောင်ပါတယ်။ နိုင်ငံတကာအသိုင်းအ၀ိုင်းကလည်း ဒီလိုပဲ မြင်ပါတယ်။ ရွေးကောက်ပွဲ လွတ်လပ်မျှတမှုရှိဖို့ ကြည်တဲ့နေရာမှာ ဒါက ဖွဲ့စည်းပုံအခြေခံဥပဒေနဲ့ပါ ဆန့်ကျင် နေတဲ့ကိစ္စဖြစ်ပါတယ်။ ဘာသာရေးကို နိုင်ငံရေးနဲ့ အသုံးမချရဘူးလို့ ၂၀၀၈ ဖွဲ့စည်းပုံက ပြဋ္ဌာန်းထားပါတယ်။ ဒါကို ချိုးဖောက် နေကြတာပါ''ဟု Priscilla Clapp က ပြောကြားသည်။NLD အပေါ် တိုင်းရင်းသားဒေသများတွင် လူထုထောက်ခံမှု ကျဆင်းလာနေသည်ဟူသော သုံးသပ်ချက်များ နှင့်ပတ်သက်၍ ''ဒါက မျှတတဲ့သုံးသပ်မှုလို့ ထင်ပါတယ်''ဟု ၎င်းက မှတ်ချက်ပြုသည်။

ထို့အပြင် ရွေးကောက်ပွဲတွင် တိုင်းရင်းသားပါတီကြီးများက ပြည်နယ်လွှတ်တော် ထိန်းချုပ်ထားနိုင်ရေး ကြိုးပမ်း ချက်များနှင့်ပတ်သက်၍ စစ်တပ်အနေဖြင့် စိုးရိမ်လိမ့်မည်ဟုမထင်ကြောင်း Priscilla Clapp က သုံးသပ်သည်။

''ဒီကိစ္စနှင့်ပတ်သက်ပြီးတော့ စစ်တပ်က စိုးရိမ်လာလိမ့်မယ်လို့ ကျွန်မမထင်ဘူး။ တိုင်းရင်းသားနိုင်ငံရေး ပါတီတွေ အနေအထား ပိုကောင်းလာမှာကို စစ်တပ်က လိုလားမယ်လို့ ကျွန်မထင်ပါတယ်။ စစ်တပ်အနေနဲ့က လက်နက်ကိုင်ပဋိပက္ခကို မလိုလားပါဘူး။ လက်နက်ကိုင် အင်အားစုကို ဖယ်ရှားပစ်ပြီးတော့ တရားဝင်နိုင်ငံရေး အင်အားစုတွေအဖြစ်နဲ့ ပြောင်းလဲပစ်ချင်တာပါ။ ဒါကြောင့်မို့ တရားဝင် တိုင်းရင်းသားပါတီတွေအနေနဲ့ နိုင်ငံရေး အာဏာတစုံတရာ ရရှိစေချင်မှာပါ။ ဒီကိစ္စအတွက် စစ်တပ်က စိုးရိမ်လိမ့်မယ်လို့ ကျွန်မ မထင်ပါဘူး။ ကျွန်မ ယူဆချက်မှားရင် မှားပါလိမ့်မယ်''ဟု ၎င်းကသုံးသပ် ပြောကြားသည်။

တိုင်းရင်းသားလက်နက်ကိုင် ခေါင်းဆောင်များအနေဖြင့် လက်နက်စွန့်ရမည်ကို တွန့်ဆုတ်နေကြသည်ဟု ထင်ကြောင်းနှင့် ပြည်သူများ၏ နိုင်ငံရေးလိုအပ်ချက်ကို စတင်စဉ်းစားနေကြရန် လိုကြောင်းလည်း Priscilla Clapp က ပြောကြားခဲ့သည်။


Ref: VOA
News Watch(စောင့်ကြည့်သတင်းဂျာနယ်)