မယ်ဆိုင်ဂူတွင်းပိတ်မိနေသည့် တောဝက်ဘောလုံးအသင်းနှင့်နည်းပြအား ဇူလိုင်(၁၅)ရက်နေ့တွင် ရုရှား၌ကျင်းပမည့် ကမ္ဘာ့ဖလားနောက်ဆုံးပွဲစဉ်သို့တက်ရောက်ရန် ဖိတ်ကြားထားသော်လည်း ၎င်းတို့အနေဖြင့် ဆေးရုံတွင်ကုသမှုခံယူနေရဆဲဖြစ်၍ တက်ရောက်နိုင်မည်မဟုတ်ကြောင်း သိရသည်။
ဇူလိုင်လ(၉)ရက်နေ့အထိ ကလေး(၈)ဦးကို ကယ်ထုတ်နိုင်ခဲ့ပြီး ချင်းရိုင်းဆေးရုံတွင် ကုသမှုခံယူနေရာ ဇူလိုင်လ(၁၀)ရက်နေ့က အဆိုပါကလေးများ၏ ကျန်းမာရေးအခြေအနေကို ထိုင်းပြည်သူ့ကျန်းမာရေးဝန်ကြီးေ ဒေါက်တာ ကျေးဆဒါး ချုတ်ဒမ်းလုန်းဆွတ်က ချင်းရိုင်းဆေးရုံကြီးတွင် သတင်းစာရှင်းလင်းပွဲပြုလုပ်ခြင်းဖြစ်သည်။
ဇူလိုင်လ(၁၀)ရက်နေ့တွင် ဂူအတွင်းကျန်နေသည့် (၅)ဦးကို ထပ်မံကယ်ထုတ်ရန် လုပ်ဆောင်နေပြီး ဆေးရုံတွင်ရောက်ရှိနေသည့် (၈)ဦး၏ ကျန်းမာရေးအခြေအနေမှာ ကောင်းမွန်နေသော်လည်း ၎င်းတို့မှာ အလင်းရောင်ကိုကြည့်၍ မရသေးဘဲ နေကာမျက်မှန်များတပ်ဆင်ထားပြီး ၎င်းတို့မိဘများအနေဖြင့် အထူးကြပ်မတ်ခန်း၏ မှန်တံခါးနောက်မှတစ်ဆင့် ဖုန်းဖြင့်စကားပြောခွင့်ပေးထားသော်လည်း ကလေးများနှင့်ထိတွေ့ခွင့်ပေးမထားသေးကြောင်း သိရသည်။
ကလေးများအား သွေးစစ်ခြင်း၊ အဆုတ်ဓါတ်မှန်ရိုက်ခြင်း၊ နှလုံး၊ မျက်လုံးနှင့် စိတ်ပိုင်းဆိုင်ရာ စစ်ဆေးခြင်းစသည့် လိုအပ်သည့်စစ်ဆေးမှုများလုပ်ဆောင်ပေးထားကြောင်း ထိုင်းပြည်သူ့ကျန်းမာရေးဝန်ကြီးက သတင်းစာရှင်းလင်းပွဲတွင် ပြောကြားသည်။
ပထမရောက်လာသည့် (၄)ယောက်အနက် (၂)ယောက်မှာ အဆုတ်တွင် ပုံမှန်မဟုတ်သည့်လက္ခဏာအချို့နှင့် တစ်ယောက်မှာ ညာဘက်ခြေကျင်းဝတ်တွင် ဒဏ်ရာရထားကြောင်း သိရသည်။
ဒုတိယရောက်လာသည့် အသက်(၁၂)နှစ်မှ (၁၄)နှစ်အရွယ်လေးယောက်တွင် (၂)ယောက်၏ ခန္ဓာကိုယ်အပူချိန်လျော့ကျနေပြီး တစ်ဦး၏နှလုံးခုန်နှုန်းနှေးနေသည်ကို တွေ့ရကြောင်းသိရသည်။
လက်ရှိတွင် ကလေး(၈)ဦးလုံး အဖျားမရှိဘဲ ပုံမှန်အတိုင်း လှုပ်ရှားနေနိုင်သည်ဟု သိရပြီး ၎င်းတို့၏အစားအစာ ပုံမှန်အတိုင်းပြန်လည်စားနိုင်ရန် အချိန်ယူလေ့ကျင့်ရမည်ဖြစ်ကြောင်း သိရသည်။
ref:Guardian
Tachileik News Agency
No comments:
Post a Comment