ရဲစည်းကမ်းဖောက်ဖျက်မှုဖြင့် ထောင်ဒဏ်တစ်နှစ်ချမှတ်ခံခဲ့ရသည့် ဒုရဲမှူးဟောင်း မိုးရန်နိုင်က “အမှန်တရားတွေထောင်ကျမသွားဖို့ပဲလိုတယ်”ဟု မေလ ၉ ရက်နေ့ ရုံးထုတ်တွင် ပြောဆိုခဲ့သည်။
ရိုက်တာသတင်းထောက်နှစ်ဦးအမှုနှင့်ပတ်သက်ပြီး မေလ ၉ ရက်၊ နံနက်ပိုင်း၊ ရန်ကုန်မြောက်ပိုင်းခရိုင်တရားရုံးတွင် ရိုက်တာသတင်းထောက် ၂ ဦးကို ၁၇ ကြိမ်မြောက် ရုံးထုတ်ခဲ့ပြီး တရားလိုပြသက်သေ ဒုရဲမှူးဟောင်းမိုးရန်နိုင်အား ယုံကြည်ရသည့် သက်သေအဖြစ် ဆက်လက် စစ်ဆေးခဲ့သည်။
ထို့သို့စစ်ဆေးခဲ့ရာ နေ့လည်ထမင်းစားနားချိန် တရားခွင်မှ အထွက်တွင် ဒုရဲမှူးဟောင်းမိုးရန်နိုင်က ပြောဆိုခဲ့ခြင်းဖြစ်သည်။
"ကျွန်တော်ကို ထောင်ချလိုက်တာဟာ နောက်ထပ်ပေါ်ထွက်လာမယ့် ရဲတပ်ဖွဲ့ဝင်တွေရဲ့ အမှန်တရားကိုခြိမ်းခြောက်လိုက်တာပဲလို့ ကျွန်တော်မြင်ပါတယ်ဗျာ။ အမှန်တရားတွေ ထောင်ကျမသွားဖို့ပဲ လိုပါတယ်"ဟု ပြောသည်။
ယနေ့ မေလ ၉ ရက်ရုံးချိန်းတွင် ဒုရဲမှူးဟောင်းမိုးရန်နိုင်က တရားလိုပြသက်သေအဖြစ်လာရောက်ထွက်ဆိုရာတွင် အကျဉ်းသားဝတ်စုံ၊ လက်ထိပ်၊ ခြေကျင်းဖြင့် လာရောက်ထွက်ဆိုခဲ့သည်ကိုတွေ့ရသည်။
ဒုရဲမှူးမိုးရန်နိုင်အား ပြီးခဲ့သည့် ဧပြီလ ၃ဝ ရက်နေ့တွင် ရဲတရားရုံးမှ ရဲစည်းကမ်းဖောက်ဖျက်မှုဖြင့် ထောင်ဒဏ်တစ်နှစ်ချမှတ်ခဲ့ခြင်းဖြစ်သည်။
ဒုရဲမှူး မိုးရန်နိုင်က အမှတ်(၈)လုံခြုံရေးရဲတပ်ဖွဲ့ခွဲတွင် တာဝန်ကျနေစဉ် ရိုက်တာသတင်းဌာနမှ သတင်းထောက်ကိုဝလုံးနှင့် ကိုကျော်စိုးဦးတို့ကို တွေ့ဆုံပြီး အင်တာဗျူးဖြေပေးခဲ့ခြင်းကြောင့် ယခုကဲ့သို့ ထောင်ဒဏ်ချမှတ်ခဲ့ခြင်းဖြစ်ကြောင်းသိရသည်။
နိုင်ငံတော်လျှို့ဝှက်ချက်များအက်ဥပဒေဖြင့် တရားစွဲဆိုခံထားရသည့် ရိုက်တာသတင်းသမားနှစ်ဦးအမှုတွင် ဒုရဲမှူး မိုးရန်နိုင်က အစိုးရတရားလိုပြသက်သေအဖြစ် ခရိုင်တရားရုံး၌ ဧပြီလ ၂ဝ ရက်နေ့က လာရောက်ထွက်ဆိုခဲ့သည်။
ယင်းကဲ့သို့ ဒုရဲမှူးမိုးရန်နိုင်က တရားလိုပြအဖြစ် လာရောက်ဆိုခဲ့ရာတွင် ရိုက်တာသတင်းသမားနှစ်ဦးကို ထောင်ချောက်ဆင်ဖမ်းဆီးခဲ့ခြင်းဖြစ်ကြောင်း၊ ထိုသို့ ထောင်ချောက်ဆင် ဖမ်းဆီးနိုင်ရန်အတွက် ရဲမှူးချုပ် တင်ကိုကိုက ဦးစီးကွပ်ကဲခဲ့ခြင်းဖြစ်ကြောင်း ထွက်ဆိုခဲ့သည်။
Mizzima - News in Burmese
No comments:
Post a Comment