တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် နှင့် မြန်မာ့သိုင်းအဖွဲ့ချုပ် မှ တာဝန်ရှိသူများ၊ သိုင်းဆရာကြီးများ တွေ့ဆုံ

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် သည် ၂၀၁၈-၂၀၁၉ ခုနှစ်၊ တပ်မတော်(ကြည်း၊ရေ၊လေ) မြန်မာ့သိုင်းပြိုင်ပွဲ ဗိုလ်လုပွဲအခမ်းအနား နှင့် ဆုချီးမြှင့်ပွဲ အခမ်းအနားသို့ တက်ရောက်လာကြသည့် မြန်မာ့သိုင်းအဖွဲ့ချုပ်မှ တာဝန်ရှိသူများနှင့် သိုင်းဆရာကြီးများအား ဇန်န၀ါရီ ၂၆ ရက်၊ ညနေပိုင်းတွင် နေပြည်တော်၊ ဇေယျာသီရိတပ်မတော်အားကစား ကွင်း (B)ရုံ၌ ရင်းရင်းနှီးနှီးတွေ့ဆုံခဲ့ကြောင်း တပ်မတော်ကာကွယ်ရေး ဦးစီးချုပ်ရုံးက သတင်းထုတ်ပြန်ထားသည်။ 

ထိုသို့တွေ့ဆုံရာတွင် တပ်မတော်ကာကွယ်ရေးဦးစီးချုပ်က မြန်မာသိုင်းပညာရပ်သည် ရှေးဘုရင်များ လက်ထက်ကတည်းက ကိုယ်လုံပညာရပ်တစ်ခု၊ အားကစားနည်းတစ်ခုအဖြစ် ရှိခဲ့ကြောင်း၊ ယခုအခါမြန်မာ့သိုင်းပညာရပ်များ ဖွံ့ဖြိုးတိုးတက်ရေးအတွက် တပ်မတော်မှ ဆောင်ရွက်နေကြောင်း၊ မြန်မာ့သိုင်းပညာရပ်များအား လူငယ်များတတ်ကျွမ်းမှု မှတစ်ဆင့်နိုင်ငံချစ်စိတ်၊ မျိုးချစ်စိတ်များကို ဖြစ်ပေါ်စေနိုင်ကြောင်း၊ မြန်မာ့သိုင်းပညာများအား သရုပ်ပြရုံသက်သက်မဟုတ်ဘဲ အမှန်တကယ်တတ်ကျွမ်းပြီး အသုံးချနိုင်ရန်နှင့် နိုင်ငံတကာ အားကစားပြိုင်ပွဲများတွင် အားကစားနည်းတစ်ရပ်အနေဖြင့် ပါဝင်ယှဉ်ပြိုင် ဆောင်ရွက်နိုင်ရန် အထိ အားလုံးကရည်မှန်းချက်ထားဆောင်ရွက်ရမည်ဖြစ်ကြောင်း၊ မိမိအနေဖြင့် တပ်မတော် တွင် မြန်မာ့သိုင်းပညာအား ၂၀၁၅ ခုနှစ်မှစတင်၍လေ့ကျင့်ဆောင်ရွက်စေခဲ့ပြီး ၂၀၁၇ ခုနှစ်တွင် တပ်မတော်၏အဓိကကိုယ်လုံပညာရပ်အဖြစ် သတ်မှတ်ပေး ခဲ့ကြောင်း၊ ယခုအခါမြန်မာ့သိုင်းပညာရပ်များအား တပ်မတော် လေ့ကျင့်ရေးသင်တန်းကျောင်းများတွင် မသင်မနေရ လေ့ကျင့် သင်ကြားပေးလျက်ရှိကြောင်း၊ မြန်မာ့သိုင်းပညာအား တူညီသော မူဝါဒနည်းစနစ်များဖြင့် ကျစ်ကျစ်လျစ်လျစ် ထိထိရောက်ရောက် ဆောင်ရွက်စေလိုပြီး မြန်မာ့သိုင်းပညာ ဖွံ့ဖြိုးတိုးတက်ရေးအတွက် တပ်မတော်အနေဖြင့် မြန်မာ့သိုင်းအဖွဲ့ချုပ်နှင့် ဆက်လက်ပူးပေါင်း အားပေးကူညီ ဆောင်ရွက်သွားမည်ဖြစ်ကြောင်း၊ တပ်မတော် အားကစား ပြိုင်ပွဲများသည် နိုင်ငံ့အားကစားကို အထောက် အကူဖြစ်ရန် လုပ်ဆောင်နေခြင်းဖြစ်ကြောင်း၊ ယခု တပ်မတော် (ကြည်း၊ရေ၊လေ) အားကစားပြိုင်ပွဲတွင် မြန်မာ့သိုင်းပညာရပ်အား အားကစားနည်းတစ်ရပ်အဖြစ် ထည့်သွင်း ယှဉ်ပြိုင်နိုင်ရန်အတွက် မြန်မာ့သိုင်းအဖွဲ့ချုပ်မှ အကူအညီပေးမှုများကိုလည်း ကျေးဇူးတင် ပါကြောင်းပြောကြားသည်။ 

ထို့နောက် မြန်မာ့သိုင်းအဖွဲ့ချုပ်မှတာဝန်ရှိသူများနှင့် သိုင်းဆရာကြီး များက ယခုကဲ့သို့ နိုင်ငံတော်အဆင့် တပ်မတော်အကြီးအကဲ များနှင့်တွေ့ဆုံရခြင်းသည် ပထမဆုံးအကြိမ် ဖြစ်၍ များစွာဂုဏ်ယူ ၀မ်းမြောက် ရပါကြောင်း၊ မြန်မာ့သိုင်းပညာရပ်များ ဖွံ့ဖြိုးတိုးတက်ရေး အတွက်တပ်မတော်မှ ဆောင်ရွက်ပေးမှုများအား ကျေးဇူးတင် ရှိပါကြောင်း၊ မိမိတို့အနေဖြင့် မြန်မာ့သိုင်းပညာရပ်အား နိုင်ငံတကာအားကစားပြိုင်ပွဲများတွင် ၀င်ရောက်ယှဉ်ပြိုင် နိုင်ရေးကြိုးစားဆောင်ရွက်လျက်ရှိကြောင်း၊ မြန်မာ့သိုင်း ပညာဖွံ့ဖြိုးတိုးတက်ရေးအတွက် တပ်မတော်နှင့်အတူ ဆက်လက်ပူးပေါင်းဆောင်ရွက်သွားမည်ဖြစ်ကြောင်း ပြန်လည် ပြောကြားကြသည်။ 

ယင်းနောက်တပ်မတော်ကာကွယ်ရေးဦးစီးချုပ်က မြန်မာ့သိုင်း အဖွဲ့ချုပ်မှ တာဝန်ရှိသူ များနှင့် သိုင်းဆရာကြီးများအား အမှတ်တရလက်ဆောင်ပစ္စည်းများပေးအပ်ပြီး ရင်းရင်းနှီးနှီး နှုတ်ဆက်ခဲ့ကြောင်း သိရသည်။ 

Credit - တပ်မတော်ကာကွယ်ရေးဦးစီးချုပ်ရုံး 

The Ladies News