အိမ်ခြေ ၂၀၀၀ ကျော်ကို အသေးစားဓာတ်အားပေးစနစ်ဖြင့် လျှပ်စစ်မီးပေးမည်

အိမ်ခြေစုစုပေါင်း ၂၂၀၀ ကျော်ကို ၂၄ နာရီ လျှပ်စစ်မီးပေးနိုင်မည့် အသေးစားဓာတ်အားပေးစနစ် စီမံကိန်းဆောင်ရွက်ရန် သဘောတူလက်မှတ်ရေးထိုးခြင်းကို ဇူလိုင်လ ၂ ရက်နေ့က နေပြည်တော်ရှိ ကျေးလက်ဒေသ ဖွံ့ဖြိုးတိုးတက်ရေး ဦးစီးဌာနရုံးတွင် ပြုလုပ်ခဲ့ကြောင်း ယင်းဦးစီးဌာနထံမှ သိရသည်။ 

စီမံကိန်းဆိုင်ရာ သဘောတူညီမှု လက်မှတ်ရေးထိုးခြင်းကို အသေးစား ဓာတ်အားပေးစနစ်လုပ်ငန်း ဆောင်ရွက်သည့် ကျေးရွာမီးလင်းရေးကော်မတီဝင်များ၊ လုပ်ငန်းဆောင်ရွက်မည့် Pro Engineering Co., Ltd. နှင့် Mandalay Yoma Energy Co., Ltd. မှ တာဝန်ရှိသူများနှင့် ကျေးလက်ဒေသ ဖွံ့ဖြိုးတိုးတက်ရေး ဦးစီးဌာနမှ တာဝန်ရှိသူများ ရေးထိုးခဲ့ခြင်းဖြစ်သည်။ 

“ဒီနေ့လက်မှတ်ထိုးတာက အားလုံးပေါင်းစီမံကိန်း ၁၁ ခုပါ။ စုစုပေါင်း ကျေးရွာ ဆယ့်တစ်ရွာမှာ အသေးစား ဓာတ်အားပေးစနစ် ဆောင်ရွက်မှာပါ”ဟု NEP စီမံကိန်းမှ ဒုတိယညွှန်ကြားရေးမှူး ဦးမျိုးမျိုးက ပြောကြားသည်။ 

ယင်းသဘောတူညီချက်အရ စစ်ကိုင်းတိုင်းဒေသကြီး ပင်လယ်ဘူးမြို့နယ် ဂွေးချိုကျေးရွာတွင် 72 kW၊ ဖောင်းပြင်မြို့နယ် ကယားကျေးရွာတွင် 75 kW၊ မကွေးတိုင်းဒေသကြီး ဆင်ပေါင်ဝဲမြို့နယ် ဇီးဖြူကုန်းကျေးရွာတွင် 81.6kW၊ ဆင်ပေါင်ဝဲမြို့နယ် ဝါစေ့မြောင်ကျေးရွာတွင် 70.4 kW၊ ရေစကြိုမြို့နယ် မိဖုရားကျေးရွာတွင် 125 kW၊ ပဲခူးတိုင်းဒေသကြီး ရေတာရှည်မြို့နယ် အောင်ချမ်းသာကျေးရွာတွင် 68kW ဖြင့် ဆိုလာ အသေးစား ဓာတ်အားပေးစနစ်လုပ်ငန်းများ ဆောင်ရွက်မည်ဖြစ်ကြောင်း ကျေးလက်ဒေသ ဖွံ့ဖြိုးတိုးတက်ရေး ဦးစီးဌာနထံမှ သိရသည်။ 

ထို့ပြင် ရေတာရှည်မြို့နယ် လုံရမ်းကျေးရွာတွင် 81.6 kW၊ ရခိုင်ပြည်နယ် ကျောက်တော်မြို့နယ် ဝဲကြီးထောင့်မြို့နယ်တွင် 120kW၊ ကျောက်တော် မြို့နယ် သလူချောင်းကျေးရွာတွင် 81.6kW၊ ဧရာဝတီတိုင်းဒေသကြီး ဘိုကလေးမြို့နယ် ပတ်ပြဲကျေးရွာတွင် 160kW၊ ကြံခင်းမြို့နယ် ထိန်ပင်မြောင်ကျေးရွာတွင် 114kW ဖြင့်လည်း အသေးစား ဓာတ်အားပေးစနစ် လုပ်ငန်းများ ဆောင်ရွက်သွားမည်ဖြစ်သည်။ 

မဟာဓာတ်အားလိုင်းနှင့် ၁၀ မိုင်အထက်ဝေးကွာပြီး လျှပ်စစ်မီးသွယ်တန်းမှု အစီအစဉ်များတွင် ပါဝင်နိုင်ခြင်း မရှိသေးသည့် ကျေးရွာများ၌ လျှပ်စစ်မီး အသုံးပြုနိုင်ရေးအတွက် ကျေးလက်ဒေသ ဖွံ့ဖြိုးတိုးတက်ရေး ဦးစီးဌာနက ၆၀ ရာခိုင်နှုန်း၊ လုပ်ငန်းဆောင်ရွက်သည့် ကျေးရွာက ထည့်ဝင်ငွေ ၂၀ ရာခိုင်နှုန်း၊ လုပ်ငန်းဆောင်ရွက်မည့်ကုမ္ပဏီက ၂၀ ရာခိုင်နှုန်းဖြင့် အမျိုးသား လျှပ်စစ်ဓာတ်အား ရရှိရေးစီမံကိန်း (NEP) အသေးစား ဓာတ်အားပေးစနစ်လုပ်ငန်းများ ဆောင်ရွက်နေခြင်းဖြစ်သည်။ 

အမျိုးသား လျှပ်စစ်ဓာတ်အားရရှိရေးစီမံကိန်းကို ကမ္ဘာ့ဘဏ်ချေးငွေ အမေရိကန်ဒေါ်လာသန်း ၉၀ ဖြင့် ၂၀၁၆ ခုနှစ်မှ ၂၀၂၁ ခုနှစ်အထိ ငါးနှစ်တာကာလအတွင်း လျှပ်စစ်မီးမရရှိသည့် မဟာဓာတ်အားလိုင်းပြင်ပမှ ကျေးရွာများကို လျှပ်စစ်မီးပေးရန် ရည်ရွယ်ဆောင်ရွက်နေခြင်းဖြစ်ကြောင်း ကျေးလက်ဒေသ ဖွံ့ဖြိုးတိုးတက်ရေး ဦးစီးဌာနထံမှ သိရသည်။

The Voice