ရခိုင်ပြည်နယ် မင်းပြားမြို့အနောက်ဘက် ကျိန်းတောင်စေတီ ဇိဝှာဓါတ် တည်ရှိရာ ကျိန်းတောင်တန်းတွင် ကျောက်ထုတ်လုပ်မှုများ ပြုလုပ်လျက်ရှိရာ တောင်တန်းရှိ စိမ့်စမ်းရေ၊ သဘာဝအလှနှင့် သစ်ပင်မျိုးစိတ် များကို ကာကွယ်နိုင်ရန်အတွက် ကျောက်ထုတ်လုပ်မှုများကို ပိတ်ပင်သွားမည်ဟု သိရသည်။
ယခုလက်ရှိတွင် ကျိန်းတောင်တန်းတစ်လျှောက် ကျောက်အလွန်အကျွံ မထုတ်ရအောင် သဘာဝ ပတ်ဝန်း ကျင် ထိန်းသိမ်းရေးအဖွဲ့နှင့် သစ်တောအဖွဲ့တို့ ပါဝင်ပြီး မကြာသေးမီက ကွင်းဆင်းစစ်ဆေးမှုများ ပြုလုပ် ခဲ့သည်ဟု သိရသည်။
“တောင်တန်းတစ်လျှောက်လုံးကို သွားရောက် စစ်ဆေးတော့ ဒီကျိန်းတောင်တန်းမှာ ကျောက်မထုတ်လုပ် သင့်တော့ဘူးဆိုတာကို တွေ့ရှိရတဲ့အတွက် မြို့မိမြို့ဖတွေနဲ့ ညှိနှိုင်းပြီးတော့ အပေါ်ကို အစီရင်ခံတင်ပြ ထားပါတယ်”ဟု မင်းပြားမြို့နယ် လက်ထောက် အုပ်ချုပ်ရေးမှူးက ပြောသည်။
ယခုလက်ရှိတွင် ကျိန်းတောင်တန်းတစ်လျှောက် လိုင်စင်ဖြင့် ကျောက်ထုတ်လုပ်မှု ပြုလုပ်နေသူ ၅ ဦးခန့်ရှိပြီး ကျိန်းတောင်စေတီနှင့် အနီးဆုံးနေရာသည် ၄ ဖာလုံခန့်သာ ကွာဝေးသည်ဟုဆိုသည်။
“ဒီနှစ်ကုန်လို့ရှိရင် ဓါတ်သတ္တုထုတ်လုပ်တဲ့ကာလ ပြီးဆုံးသွားလို့ရှိရင် ခွင့်မပြုတော့ဘူးပေါ့။ နောက်နှစ်ဆို ရင်လည်း ကျနော်တို့က လုံလုံခြုံခြုံနဲ့ တားဆီးနိုင်မှာပါ။ ကျနော်တို့ အစီရင်ခံစာ တင်ပြလိုက်တာလည်း ကျလာပါပြီ”ဟု ၄င်းက ဆက်ပြောသည်။
လာမည့်နှစ်တွင် လိုင်စင်ဖြင့် ကျောက်ထုတ်နေသူများနှင့် လိုင်စင်မဲ့ ကျောက်ထုတ်နေသူများကိုပါ ခွင့်ပြုတော့ မည်မဟုတ်ဟု ဆိုသည်။
“ကျိန်းတောင်ကို ဒေသန္တရအမိန့် ထုတ်ပြန်နိုင်ဖို့ တစ်နည်း၊ မဟုတ်ရင် ပတ်ဝန်းကျင် ထိန်းသိမ်းရေးဥပဒေ အရ သစ်တောဥပဒေအရ၊ ဒါမှမဟုတ် လူမှုအသိုင်းအ၀ိုင်းတွေရဲ့ သစ်တောပိုင်ဆိုင်မှုဆိုတဲ့ နည်းလမ်း ၃ ခု ကို စဉ်းစားထားပါတယ်။ ကျိန်းတောင် မပျက်စီးရအောင် ခုခံကာကွယ်သွားမှာပါ” ဟု မင်းပြားမြို့နယ် ဒုအုပ် ချုပ်ရေးမှူး ဦးကျော်သိန်းထွန်းက ပြောသည်။
ကျိန်းတောင်တစ်ရိုး ကျောက်ထုတ်လုပ်နေမှုသည် နှစ် ၁၀ ကျော် ကြာမြင့်နေပြီဖြစ်ပြီး ယခုလက်ရှိတွင် စိုးရိမ်ရသည့် အခြေအနေတွင်ရှိသည်ဟု ဒေသခံများထံမှ သိရသည်။
“ကျိန်းတောင်တစ်ရိုးမှာ ဇိဝှာဓာတ်ကနေ ခြိပ်တောင် သံချောင်းဝထိ ထုတ်လုပ်နေတာပါ။ ကျောက်ထုတ်လုပ် မှုကြောင့် ဇိဝှာဓါတ် စေတီတော် ပျက်စီးသွားနိုင်ပါတယ်။ တားဆီးမှုတွေ ရှိနေပေမယ့် ဆက်လက်ပြီးတော့ ထုတ်နေတာကို တွေ့နေရပါတယ်”ဟု မင်းပြားဒေသခံ ဦးသိန်းစံက ပြောသည်။
ယင်းသို့ ကျောက်ထုတ်လုပ်နေမှုများကို ဒေသခံများက မလိုလားကြသော်လည်း တရားဝင် စာရေးသားကန့် ကွက်မှုများ ယနေ့အချိန်ထိ မရှိသေးဟု သိရသည်။
ယခုလက်ရှိတွင် မြေပြင်၌ ပြောစာပေါက်၊ ဦးပိုင်ပေါက်နှင့် ဦးပိုင်မပေါက် မြေအမျိုးအစားအလိုက် စာရင်းကောက်ယူပြီး ကျောက်ထုတ်လုပ်မှုကို ကန့်သတ်မှု ပြုလုပ်နိုင်အောင် ကြိုးစားဆောင်ရွက်နေသည်ဟု သိရှိရသည်။
(မင်းပြားကျိန်းတောင်တွင် ကျောက်ထုတ်နေသည်ကိုတွေ့ရစဉ်/ ဓာတ်ပုံ- မူရင်းပိုင်ရှင်)
Narinjara
0 comments:
Post a Comment