ရှမ်းပြည်နယ်(အရှေ့ပိုင်း) တာချီလိတ်ခရိုင်၊ မိုင်းဖုန်း(ခ)ကျေးရွာအုပ်စု၊ ဝှေလေလန်ကျေးရွာတွင် ၂၀၁၈ ခုနှစ်၊ အောက်တိုဘာလ (၃)ရက်နေ့ နံနက်(၈)နာရီခွဲဝန်းကျင်က နေအိမ်ဈေးဆိုင်၌ ဈေးရောင်းနေသည့် အသက်(၅၀)အရွယ် အမျိုးသမီးတစ်ဦးကို လူ(၄)ဦးအဖွဲ့က သေနတ်များဖြင့်ခြိမ်းခြောက် ဖမ်းဆီးခေါ်ဆောင်သွားကြောင်း သိရသည်။
“ဒီနေ့မနက်(၈)နာရီခွဲလောက်မှာ ဝှေလေလန်ကျေးရွာမှာ အသက်(၅၀)လောက် ဒေါ်အီနန်းကို အမည်မသိလူ(၅)ယောက်က သေနတ်တွေနဲ့လာခေါ်သွားတယ်။ သူက သူ့အိမ်ရှေ့ဈေးဆိုင်မှာ ဈေးရောင်းနေတာ တစ်ယောက်ထဲ။ သူ့ယောက်ျားက အိမ်နောက်မှာရှိတယ်။ အသံကြားလို့ ထွက်လာတော့ သူ့မိန်းမကို လူနှစ်ယောက်က လက်တစ်ဖက်စီက အတင်းဆွဲခေါ်သွားတယ်။ ကျန်တဲ့လူက သူ့ယောက်ျားကို သေနတ်နဲ့ ချိန်ထားတယ်။ ကားက အပြာရောင်။ လာခေါ်တဲ့သူတွေက မျက်နှာမှာ ပဝါစည်းထားတယ်၊ ဦးထုပ်ဆောင်းထားတယ်။ အားလုံးဂျင်းဘောင်းဘီဝတ်ထားတယ်။ လူက(၄)ယောက် သေနတ်အရှည်ကိုင်တာ ပါတယ်။ သေနတ်အတို ကိုင်ထားသူလည်းပါတယ်။ ပြောက်ကျားဖိနပ်စီးထားတဲ့သူတွေလည်း ပါတယ်။ သတင်းရရချင်းမှာပဲ တာချီလိတ်ခရိုင်အတွင်းက ရဲတပ်ဖွဲ့တွေ ချိတ်ဆက်ပြီး စုံစမ်းစစ်ဆေးနေပါတယ်”ဟု ဝမ်ပုံနယ်မြေရဲစခန်းမှူး ရဲအုပ် မောင်မောင်စိုးက တာချီလိတ်သတင်းအေဂျင်စီသို့ ပြောသည်။
ဖမ်းဆီးခေါ်ဆောင်သွားသူများအား ဖေါ်ထုတ်နိုင်ရေးအတွက် ဝမ်ပုံနယ်မြေရဲစခန်းတွင် အမှုဖွင့်လှစ်ထားပြီး ဝမ်ပုံနယ်မြေရဲစခန်းမှ နယ်ထိန်းအဖွဲ့၊ ပြည်နယ်မှု/ကူအဖွဲ့၊ ဟောင်လိတ်နယ်မြေရဲစခန်းမှစခန်းမှူးနှင့်အဖွဲ့၊ တာချီလိတ်မြို့မရဲတပ်ဖွဲ့မှ နယ်ထိန်းအဖွဲ့တို့ ပူးပေါင်းဆောင်ရွက်နေကြောင်း သိရသည်။
Tachileik News Agency
0 comments:
Post a Comment