ပိုမိုရှင်းလင်းလွယ်ကူသည့် နိုင်ငံရေးဆွေးနွေးမှုပုံစံဖြစ်စေရန် အစိုးရ၊တပ်မတော်၊ NCA လက်မှတ်ထိုးအဖွဲ့နှင့် နိုင်ငံရေးပါတီများ ဆွေးနွေးနေ

နိုင်ငံရေးဆွေးနွေးမှုဆိုင်ရာမူဘောင်နှင့် လုပ်ငန်းလမ်းညွှန်များ ပြန်လည်သုံးသပ်ခြင်း အစည်းအဝေးကို ရန်ကုန်မြို့ရွှေလီလမ်းရှိ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန၌ ၂၀၁၈ ခုနှစ်၊ နိုဝင်ဘာလ(၁)ရက်နေ့မှ (၃)ရက်နေ့အထိ ကျင်းပနေကြောင်း သိရသည်။

“ဒီငြိမ်းချမ်းရေးဖြစ်စဉ် ကြီးမှာ အားလုံးသိတဲ့ အတိုင်း NCA လက်မှတ်မထိုးတဲ့အဖွဲ့တွေ ပါဝင်လာဖို့လည်း အားလုံးက လိုလားကြပါတယ်။ အခုအချိန်မှာလည်း အစိုးရ၊ တပ်မတော်က သူတို့တွေ ပါဝင်လာဖို့ ဆွေးနွေး မှုတွေလုပ်နေပါတယ်။ လက်မှတ်မထိုးတဲ့အဖွဲ့တွေ ပါဝင်လာနိုင်ရေး၊ မူဘောင်ဆွေးနွေးပွဲမှာ သူတို့ပါဝင်လာနိုင်ရေးအတွက် ဘက်ပေါင်းစုံကနေ စဉ်းစားပြီး လမ်းဖွင့်ပေးထားဖို့လိုတယ်ဆိုတာကို တိုင်းရင်း သား လက်နက်ကိုင် အဖွဲ့အစည်းများအားလုံးကိုယ်စား အလေးအနက် မေတ္တာရပ်ခံချင်ပါတယ်။ မူဘောင်ရဲ့အလုပ်က သုံးခုပါပဲ။ ဒါကြောင့် နိုင်ငံရေးဆွေးနွေးမှုဆိုင်ရာမူဘောင်ကို ပြုလွယ် ပြင်လွယ်ဖြစ်အောင် ကျွန်တော်တို့ လုပ်မယ်” ဟု တိုင်းရင်းသားလက်နက်ကိုင်အစုအဖွဲ့ကိုယ်စား ဒေါက်တာဆလိုင်း လျန်မှုန်းဆာခေါင်းက ပြောသည်။

အဆိုပါအစည်းအဝေးတွင် အစိုးရနှင့်တပ်မတော် အစုအဖွဲ့၊ NCA လက်မှတ်ရေးထိုးထားသည့် တိုင်းရင်းသားလက်နက်ကိုင်များအစုအဖွဲ့နှင့် နိုင်ငံရေး ပါတီအစုအဖွဲ့တို့ တက်ရောက်ဆွေးနွေးနေကြခြင်း ဖြစ်ကြောင်း သိရသည်။

“ဒီအစည်းအဝေးမှာ ကျွန်တော်တို့ အစိုးရ၊ တိုင်းရင်းသားလက်နက်ကိုင်အဖွဲ့အစည်းတွေနဲ့ နိုင်ငံရေးပါတီ အများစုရဲ့ နိုင်ငံရေးဆွေးနွေးမှု ဆိုင်ရာ မူဘောင်သုံးသပ်ချက် (review) သဘောထား စုစည်းချက်ရှိမယ်။ ဒါကို ဆုံးဖြတ်နိုင်တဲ့ UPDJC အစည်းအဝေးတင်ပြသွားမယ်” ဟု UPDJC အတွင်းရေးမှူး အဖွဲ့ဝင် ဦးလှမောင်ရွှေက ပြောသည်။

နိုင်ငံရေးဆွေးနွေးမှုဆိုင်ရာမူဘောင်အား ပြန်လည်သုံးသပ်ရန်၂၀၁၈ ဇူလိုင် ဒုတိယပတ်က ကျင်းပသည့် UPDJC အစည်းအဝေး ဆုံးဖြတ်ချက်နှင့် အောက်တိုဘာလ (၁၅)ရက်နှင့် (၁၆)ရက်နေ့များက ကျင်းပသည့် ထိပ်သီး အစည်းအဝေးတွင် ခေါင်းဆောင်များ၏ လမ်းညွှန်ချက်များကို အခြေခံပြီး ဆွေးနွေးနေခြင်းဖြစ်ကြောင်း သိရသည်။

“အထူးသဖြင့် ကျွန်တော်တို့ နိုင်ငံရေးပါတီအစုအဖွဲ့အနေနဲ့ ကျွန်တော်တို့ နိုင်ငံရေးဆွေးနွေးမှုတွေကိုဆောင်ရွက်တဲ့အခါမှာ ကျွန်တော်တို့က အင်အားဖြည့်ပြီးတော့ ဆောင်ရွက်တာ ဖြစ်တယ်။ ကျွန်တော်တို့ ငြိမ်းချမ်းရေးဆွေးနွေးမှု ဆောင်ရွက်တဲ့အပိုင်းတွေရဲ့ ဆုံးဖြတ်ချက်ချမှုအပိုင်းတွေမှာဆိုရင် အခုနိုင်ငံရေး ဆွေးနွေးမှု မူဘောင်ရေးဆွဲတဲ့အခါမှာ တချို့နေရာတွေက အားနည်းချက်တွေ အများကြီး ရှိပါတယ်။ ဒါတွေကိုလည်း ပြန်လည်သုံးသပ်ဖို့ လိုပါတယ်” ဟု နိုင်ငံရေးပါတီအစုအဖွဲ့များ ကိုယ်စား ဦးမြင့်စိုးက ပြောသည်။

အောက်တိုဘာလက ကျင်းပခဲ့သည့် အစိုးရနှင့် NCA-S EAO ခေါင်းဆောင်များ သီးသန့်ထိပ်သီး အစည်းအဝေးတွင် လက်ရှိနိုင်ငံရေးဆွေးနွေးမှုပုံစံကို ပိုမို ရှင်းလင်းလွယ်ကူအောင် ဆောင်ရွက်ရန် သဘောတူခဲ့ကြခြင်းဖြစ်ကြောင်း သိရသည်။

“ပြည်ထောင်စုငြိမ်းချမ်းရေး ဆွေးနွေးမှု ပူးတွဲကော်မတီ (UPDJC)မှာပါတဲ့ လုပ်ငန်းလမ်းညွှန်၊ အတွင်းရေးမှူးများရဲ့ လုပ်ငန်းလမ်းညွှန်၊ ကဏ္ဍအလိုက် လုပ်ငန်းကော်မတီများရဲ့ လုပ်ငန်းလမ်းညွှန်၊ အမျိုးသားအဆင့် နိုင်ငံရေး ဆွေးနွေးပွဲများရဲ့ လုပ်ငန်းလမ်းညွှန်တွေကို ဘယ်လိုကျင်းပကြမလဲဆိုတာကို ကျွန်တော်တို့ အစုအဖွဲ့ သုံးခုစလုံးက လာမယ့် စတုတ္ထအကြိမ် ၂၁ ရာစု ပင်လုံညီလာခံမှာ အကောင်းဆုံးလမ်းညွှန်မှုလုပ်နိုင်ဖို့ မျှော်လင့်ပါတယ်” ဟု အစိုးရ၊ တပ်မတော်ကိုယ်စား ငြိမ်းချမ်းရေးကော်မရှင် အဖွဲ့ဝင် ဦးအောင်စိုးက ပြောသည်။

နိုဝင်ဘာ ၁ ရက်မှ ၃ ရက်အထိ ကျင်းပမည့် နိုင်ငံရေးဆွေးနွေးမှု ဆိုင်ရာ မူဘောင်နှင့် လုပ်ငန်း လမ်းညွှန်များ ပြန်လည်သုံးသပ်ခြင်း အစည်းအဝေးတွင် နိုင်ငံရေးဆွေးနွေးမှုဆိုင်ရာ မူဘောင်၊ ပြည်ထောင်စု ငြိမ်းချမ်းရေးဆွေးနွေးမှု ပူးတွဲကော်မတီ(UPDJC) ၏ လုပ်ငန်းလမ်းညွှန်၊ ပြည်ထောင်စု ငြိမ်းချမ်းရေးဆွေးနွေးမှု ပူးတွဲကော်မတီ အတွင်းရေးမှူးများ (UPDJC-S) ၏ လုပ်ငန်းလမ်း ညွှန်၊ နိုင်ငံရေး ဆွေးနွေးမှုဆိုင်ရာ ကဏ္ဍအလိုက် လုပ်ငန်းကော်မ တီများ လုပ်ငန်းလမ်းညွှန်၊ အမျိုးသားအဆင့် နိုင်ငံရေးဆွေးနွေးပွဲ ကြီးကြပ်ကော်မတီ လုပ်ငန်းလမ်းညွှန်၊ အမျိုးသားအဆင့် နိုင်ငံရေးဆွေးနွေးပွဲ လုပ်ငန်းလမ်းညွှန်နှင့် အမျိုးသားအဆင့် နိုင်ငံရေးဆွေးနွေးပွဲ ကျင်းပခြင်းဆိုင်ရာ လုပ်ထုံးလုပ်နည်းများကို ဆွေးနွေးနေကြခြင်းဖြစ်ကြောင်း သိရသည်။

Tachileik News Agency