နောက်ဆုံးအဆင့် လက်တွေ့စမ်းသပ်မှု ရလဒ်တွေအရ ထိရောက်မှုနှုန်း ၉၅ ရာခိုင်နှုန်းရှိကာ ဆိုးဝါးတဲ့ ဘေးထွက်ဆိုးကျိုးမရှိကြောင်း တွေ့ရှိခဲ့အပြီးမှာ Pfizer နဲ့ BioNTech ကုမ္ပဏီတို့ဟာ သူတို့ရဲ့ ကာကွယ်ဆေးကို အမေရိကန်နဲ့ ဥရောပမှာ နောက်လကစပြီး အရေးပေါ် အသုံးပြုမှုဆိုင်ရာ ခွင့်ပြုချက်ရနိုင်ကြောင်း ယင်းဆေးဝါးကုမ္ပဏီတွေက ဗုဒ္ဓဟူးနေ့မှာ ထုတ်ဖော်ပြောဆိုပါတယ်။
ကာကွယ်ဆေးရဲ့ ထိရောက်မှုဟာ အသက်အရွယ်အမျိုးမျိုး၊ လူမျိုးစုအုပ်စုအမျိုးမျိုးမှာ တသမတ်တည်းရှိကြောင်း တွေ့ရှိရတာကြောင့် လူမည်းမျိုးနွယ်တွေ အပါအဝင် လူမျိုးအုပ်စုအသီးသီးနဲ့ သက်ကြီးရွယ်အိုတွေအပေါ် အချိုးမညီစွာ ရောဂါဒဏ်ခံစားရစေသော ကူးစက်ရောဂါကို နှိမ်နင်းနိုင်မယ့် လက္ခဏာတစ်ခုဖြစ်ခဲ့ပါတယ်။
အမေရိကန် FDA က ကာကွယ်ဆေးကို ဒီဇင်ဘာလလယ်လောက်မှာ အရေးပေါ် အသုံးပြုရေး ခွင့်ပြုချက် ပေးနိုင်ကြောင်း BioNTech အမှုဆောင်အရာရှိချုပ် အူဂါဆာဟင်က ရိုက်တာရုပ်သံကို ပြောကြားခဲ့ပါတယ်။ ဒါ့အပြင် ဥရောပသမဂ္ဂရဲ့ ခွင့်ပြုချက်ကိုလည်း ဒီဇင်ဘာ ဒုတိယလဝက်လောက်မှာ ရရှိနိုင်တယ်လို့ ၎င်းက ဆက်လက် ပြောဆိုပါတယ်။
အခြေအနေအားလုံး ကောင်းမွန်မယ်ဆိုရင် ဒီဇင်ဘာ ဒုတိယလဝက်မှာ ခွင့်ပြုချက်ရနိုင်ပြီး ခရစ္စမတ်မတိုင်ခင်မှာ ကာကွယ်ဆေး စဖြန့်နိုင်မှာဖြစ်ပါကြောင်း သို့ပေမယ့် အားလုံး အပေါင်းလက္ခဏာအတိုင်းဖြစ်သွားမှသာ သေချာမှာဖြစ်ကြောင်း ၎င်းက ပြောဆိုခဲ့ပါတယ်။
အမေရိကန် ဆေးဝါးထုတ်လုပ်ရေး ကုမ္ပဏီနဲ့ မိတ်ဖက် ဂျာမန် ကုမ္ပဏီ BioNTech တို့က ဖန်တီးတဲ့ ယင်းကာကွယ်ဆေးရဲ့ ထိရောက်မှုနှုန်းထားဟာ ဆေးဝါးဆိုင်ရာ စည်းမျဉ်းထိန်းကွပ်ရေးတာဝန်ရှိသူတွေ ပြောဆိုထားတဲ့ လက်ခံနိုင်လောက်ဖွယ် အတိုင်းအတာထက် ပိုမြင့်မားခဲ့ကြောင်း သိရပါတယ်။ ဒါဟာ ကပ်ရောဂါ အဆုံးသတ်ရေး ပြိုင်ဆိုင်မှုမှာ သိသာထင်ရှားသော အောင်မြင်ပေါက်မြောက်မှုတစ်ခုဖြစ်ကြောင်း ကျွမ်းကျင်သူတွေက ပြောဆိုခဲ့ပါတယ်။
CNA
အကုန်သိ သတင်းဌာန
0 comments:
Post a Comment