မဟာအောင်မြေမြို့နယ်၊ မစိုးရိမ်တိုက်သစ် နာယကအဖွဲ့ဝင်ဆရာတော် ဦးဝိစိတ္တာဘိဝံသ (ဦးဝီရသူ) သည် မတ်လ ၉ ရက် (ယနေ့) တွင် တရားဟောခွင့် ပြန်ရမည်ဖြစ်ကြောင်း နိုင်ငံတော်သံဃာ မဟာနာယကအဖွဲ့ ဥက္ကဋ္ဌ ဆရာတော် ဘဒ္ဒန္တကုမာရာဘိဝံသက မိန့်ကြားသည်။
တရားဟောခွင့် ပိတ်ပင်ထားသည်မှာ တစ်နှစ်ပြည့်သွားပြီဖြစ်သဖြင့် ဦးဝီရသူအနေနှင့် တရားဟောလိုပါက ဟောပြောနိုင်ပြီဖြစ်ကြောင်း၊ သို့သော် ဘုရားဟောများနှင့် ဆန့်ကျင်သည်များ၊ အစိုးရကိုဆန့် ကျင်သည် များကို မဟောရန်လိုကြောင်း နိုင်ငံတော်သံဃမဟာနာယကအဖွဲ့ ဥက္ကဋ္ဌ ဆရာတော် ဘဒ္ဒန္တကုမာရာဘိဝံသ (ဗန်းမော်ဆရာတော်) က မိန့်ကြားသည်။
“အဖွင့်၊ အဋ္ဌကထာ၊ ပါဠိတော်များလာတဲ့အတိုင်း ဟောရင်ဘာမှ အန္တရာယ် မရှိပါဘူး။ ဒါတွေနဲ့ဆန့်ကျင်ပြီး မဟောနဲ့၊ အစိုးရကို ဆန့်ကျင်ပြီးတော့လည်း မဟောနဲ့၊ တချို့က ဆန့်ကျင်ဘက် လုပ်ပြီးဟောတော့ အစိုးရ ပိုင်းကနေ အရေးယူမှာပေါ့။ ဘုရားဟော အဋ္ဌကထာ၊ ဋီကာတွေနဲ့ ဆန့်ကျင်ဘက်လုပ်တော့ သံဃမဟာ နာယကရုံးတွေက အရေးယူလိမ့်မယ်”ဟု ဆရာတော်က မိန့်ဆိုသည်။
ဆရာတော်ဦးဝီရသူသည် နိုင်ငံတော် သံဃမဟာနာယကအဖွဲ့က ထုတ်ပြန်ထားသည့် ညွန်ကြားလွှာအမှတ် (၈၃)၊ (၉၁)၊ (၉၃)၊ (၉၄) တို့ကို ဖောက်ဖျက်ကျူးလွန်သဖြင့် ၂၀၁၇ ခုနှစ် မတ်လ ၉ ရက်နေ့က ကျင်းပသည့် သတ္တမအကြိမ် နိုင်ငံတော် သံဃမဟာနာယကအဖွဲ့ (၄၇) ပါး စုံညီ စတုတ္ထ အထူးအစည်းအဝေး၌ ဦးဝီရသူကို ၂၀၁၇ ခုနှစ် မတ်လ ၁၀ ရက်နေ့မှ ၂၀၁၈ ခုနှစ် မတ်လ ၉ ရက်နေ့ထိ ပြည်ထောင်စုသမ္မတ မြန်မာနိုင် ငံတော်အတွင်း တရားဟောပြောခွင့် တစ်နှစ်ပိတ်ပင်ခဲ့ကြောင်း၊ လိုက်နာဆောင်ရွက်ခြင်းမရှိပါက တည်ဆဲ ဥပဒေများအရ အရေးယူ ဆောင်ရွက်သွားမည်ဖြစ်ကြောင်း၊ အဆိုပါဆုံးဖြတ်ချက်များကို ဦးဝိစိတ္တာဘိဝံသ (ဦးဝီရသူ) အား မန္တလေး တိုင်းသံဃနာယကအဖွဲ့က ခေါ်ယူအသိပေးရန်ဖြစ်ကြောင်း အချက်သုံးချက် ချမှတ်ခဲ့သည်။
တရားဟောခွင့် ပိတ်ပင်ခံရပြီး နောက် ဆရာတော်ဦးဝီရသူသည် တရားပွဲ များတွင် ပါးစပ်ကိုတိပ်ဖြင့်ကပ်ကာ အသံ သွင်း တရားတော်များဖွင့်ခြင်းဖြင့် ဟောပြောပွဲအချို့ ပြုလုပ်ခဲ့သည်။
“သူ မဟောသင့်တာ ဟောတယ်။ အဲဒါလည်းပဲ တကယ်ကျတော့ မဟောသင့်ဘူးပေါ့။ ဘုရားဟောက ဒီလို ပါးစပ်ပိတ်ပြီး ဟောရမယ်လို့ မရှိဘူးပေါ့။ ရိုးရိုးပဲ ဟောရမယ်။ ဒီလိုလုပ်ပြီး ဟောတယ်ဆိုတော့ သူ့မယ် ဘုရားဟောနဲ့ ဆန့်ကျင်တယ်၊ အစိုးရနဲ့ ဆန့်ကျင်တယ် ဆိုတာကတော့ မကောင်းဘူးပေါ့။ အပြစ်နည်းနည်း ရှိတယ်”ဟု ဗန်းမော်ဆရာတော်ကြီးက ထပ်မံမိန့်ဆိုသည်။
ဆရာတော်ဦးဝီရသူသည် အမျိုး သားရေး တက်ကြွလှုပ်ရှားသူတစ်ဦး အဖြစ် ထင်ရှားပြီး ၂၀၁၃ ခုနှစ် ဇူလိုင် လအတွင်းက ထုတ်ဝေခဲ့သည့် ကမ္ဘာကျော် တိုင်းမ်မဂ္ဂဇင်း မျက်နှာဖုန်းတွင် “The Face of Buddhist Terror” ခေါင်းစဉ်ဖြင့် ဖော်ပြခြင်းခံခဲ့ရသည်။
“အခုပြန်ပြီး ဟောခွင့်ရတော့မယ် ဆိုတော့၊ ဆရာတော်ကအဘိဝံသဆရာတော် တစ်ပါးဖြစ်တယ်။ ပရိ ယတ္တိမှာလည်း ပေါက်မြောက်တဲ့ ဆရာတော်တစ်ပါးဖြစ် တယ်။ ဆရာတော်အနေနဲ့မျိုးချစ်စိတ်ရှိ ကောင်း ရှိမယ်။ ဒါပေမဲ့ ဆရာတော်အနေနဲ့ အမုန်းတရားတွေကိုထပ်ပြီးတော့မဟော သင့်တော့ဘူး၊ ဆရာတော် အနေနဲ့ အမျိုး ဘာသာသာသနာကို အခြားပုံစံနဲ့ စောင့် ရှောက်သင့်ပါတယ်” ဟု မန္တလေးမြိုခံ စီးပွားရေး လုပ်ငန်းရှင် ဦးစိန်ဦးက ပြော ကြားသည်။
ယင်းကိစ္စနှင့်ပတ်သက်၍ မန္တလေး တိုင်းသာသနာရေးဦးစီးဌာနထံ သွားရောက် မေးမြန်းသော်လည်း သာသနာရေးနှင့် ယဉ်ကျေးမှုဝန်ကြီးဌာနက တစ်စုံတစ်ရာ ညွှန်ကြားထားခြင်း မရှိသေးကြောင်း ယင်းဌာနမှ အရာထမ်းတစ်ဦးက ပြောဆိုသည်။
နိုင်ငံတော် သံဃမဟာနာယကအဖွဲ့က တရာဟောခွင့် တစ်နှစ်ပိတ်ပင် ထားမှုပြည့်သွားပြီဖြစ်၍ ရှေ့ဆက် လုပ်မည့်ကိစ္စများကို သိရှိနိုင်ရန် ဆရာတော် ဦးဝီရသူသီတင်းသုံးရာ မစိုးရိမ်တိုက်သစ်ရှိ ဓမ္မကာရကျောင်း တိုက်သို့ သွားရောက် တွေ့ဆုံခဲ့သော်လည်း လက်ခံတွေ့ဆုံခဲ့ခြင်း မရှိသောကြောင့် မေးမြန်းခွင့်မရခဲ့ပေ။
ဆရာတော်ဦးဝီရသူ၏ လူမှုကွန်ရက် စာမျက်နှာ Facebook Account နှစ်ခု ဇန်နဝါရီလ ၂၄ ရက်နေ့က ပိတ်သိမ်းခံလိုက်ရခြင်းကြောင့် ဆရာတော်သည် YouTube အင်တာနက် ရုပ်သံမှနေ၍ တရားဟောပြောမှု များ လုပ်ဆောင်လျက်ရှိသည်။
The Voice
0 comments:
Post a Comment