ဗိုလ်မှူးကြီးတင်အောင်ထွန်း (ဓာတ်ပုံ - ကျော်ဇင်သန်း)
ရန်ကုန်တိုင်းအတွင်း ကျူးကျော်များကို အင်အားသုံးဖယ်ရှားနေသောကြောင့် အစိုးရအပေါ်ဝေဖန်မှုများ မြင့်တက်နေသည်။ စီမံချက်ကြောင့် ဖယ်ရှားခြင်းဖြစ်သည်ဟု အာဏာပိုင်များက ပြောကြားထားသော်လည်း ယခုကာလတွင်မှ ကျူးကျော်များကို အင်အား သုံးဖယ်ရှားခြင်းသည်ပြဿနာများ ပိုမိုကြီးထွားစေနိုင်သည်ဟုလည်း သုံးသပ်သူများရှိသည်။ ကျူးကျော်များကို ဖယ်ရှားရာတွင် လုံခြုံရေးအတွက် ရန်ကုန်တိုင်းလုံခြုံရေးနှင့် နယ်စပ်ရေးရာဝန်ကြီးဌာနက ဆောင်ရွက်ပေးနေသည်။ ထိုကဲ့သို့လုံခြုံရေးဆောင်ရွက်ပေးနေသော ရန်ကုန်တိုင်းဒေသကြီးလုံခြုံရေးနှင့် နယ်စပ်ရေးရာဝန်ကြီးဗိုလ်မှူးကြီး တင်အောင်ထွန်းနှင့် 7Day News ဂျာနယ်က သီးသန့်တွေ့ဆုံမေးမြန်းထားသည်များကို စာဖတ်သူများအတွက်
ကောက်နုတ်ဖော်ပြပေးလိုက်ပါသည်။ရန်ကုန်မြို့မှာရှိတဲ့ ကျူးကျော်တွေကို ဆက်တိုက်ဖယ်ရှားနေတာဟာ စီမံချက်နဲ့ဖယ်ရှားနေတာပါလား။ စီမံချက်နဲ့ဖယ်ရှားနေတာဆိုရင်လည်းအသေးစိတ် ရှင်းပြပေးပါ။
စီမံချက်ဆိုတာကတော့ ဒီလိုရှိတာပေါ့။ ရန်ကုန်မှာတော့ ၄၅ မြို့နယ်မှာ ကျူးကျော်တွေကတော့ ရှိနေတာပေါ့။ ကျူးတွေက အခုမှ ဖြစ်လာတာမဟုတ်ဘူး။ ဟိုးလွတ်လပ်ရေးမရခင် အရင်ကတည်းက ကျူးသမိုင်းကရှိပြီးသားကိုး။ အစိုးရအဆက်ဆက်က ရှင်းတော့ရှင်းလာခဲ့တာပေါ့။ ဒါပေမဲ့ မပြတ်ဘူးပေါ့။ မပြတ်တဲ့ဟာတွေ ဖြစ်နေတာပေါ့။ အခုဟာကျတော့လည်း ကိုယ်တို့က အတင်းလိုက်ပြီးရှင်းနေတာမဟုတ်ပါဘူး။ တကယ့် ကျူးရှိတာတွေကတော့ မြို့နယ်တိုင်းနီးနီးလောက်ရှိတယ်။ စီမံကိန်းရှိပြီးတော့ လိုအပ်တဲ့နေရာတွေတော့ ဥပဒေနဲ့အညီရှင်းတာပေါ့။ ရှင်းတဲ့အခါမှာလည်း မနက်ဖြန်ကျ ရှင်းလိုက်တော့လို့ ဒီလိုမျိုး မဟုတ်ပါဘူး။ သူတို့ကို ဥပဒေနဲ့အညီ သတိပေးတယ်။ မေးတယ်။ တွေ့တယ်။ ဆွေးနွေးတယ်။ ပြီးတော့မှ ရှင်းတာပါ။
အာဏာရှင်ဦးနေဝင်းလက်ထက်တုန်းကတောင် ကျူးကျော်တွေကို ဖယ်ရှားရာမှာ စာမေးပွဲဖြေဆိုရက်တွေနီးတဲ့ အချိန်တွေနဲ့ ပွဲလမ်းသဘင်၊ အခါကြီးရက်တွေကိုရှောင်ပြီး ဖယ်ရှားတယ်လို့ သိရပါတယ်။ အခုလက်ရှိအချိန်မှာလည်း ကလေးတွေက စာမေးပွဲဖြေဆိုရက်တွေ ရောက်တော့မယ်ဆိုတော့ ဒီလိုအချိန်မျိုးကို ဘာကြောင့် ရွေးလုပ်တာလဲ။
အဲဒါက ချက်ချင်းကြီးရှင်းတာ မဟုတ်ဘူးလေ။ ကြိုပြီးတော့မှ သတိပေးတယ်။ ကိုယ်ကျူးလား၊ မကျူးလားကိုယ်ပဲသိတယ်။ မဟုတ်ဘူးလား။ ကိုယ်က ရပ်ကွက်ထဲမှာနေပြီး ကိုယ့်အိမ်ကတရားဝင်အိမ်လား၊ တရားမဝင်အိမ်လားဆိုတာ ကိုယ်ပဲသိတယ်လေ။ ကိုယ်ကကျူးထားပြီဆိုကတည်းက ဥပဒေနဲ့မညီတော့ဘူး။ ဖယ်ရမယ်ဆိုတာကြီးက အသိအကုန်ရှိပြီးသားပါ။
နောင်တက်လာမယ့်အစိုးရအပေါ်မှာ ကျူးပြဿနာတွေမကျန်ခဲ့အောင်ဆိုပြီး အစိုးရကဖြေရှင်းပေးတာလို့ ကြားသိရပါတယ်။ ဖြစ်လာမယ့် အနေအထားတွေကဆန့်ကျင်ဘက်တွေဖြစ်လာမယ်လို့ ဝေဖန်နေကြပါတယ်။ပြဿနာတွေဖြစ်အောင် ဖန်တီးနေတာလားလို့ ဝေဖန်သူတွေရှိပါတယ်။
ပြဿနာမဖြစ်နိုင်ပါဘူး။ ဘာဖြစ်လို့လဲဆိုတော့ ကျူးကဥပဒေနဲ့မညီတာကို ဥပဒေနဲ့အညီရှင်းနေတဲ့အတွက်ကြောင့်ပြဿနာမရှိနိုင်ဘူး။
ကျူးကျော်မြေနေရာတွေကို အစိုးရက ကုမ္ပဏီတွေဆီရောင်းထားပြီးပြီဖြစ်လို့ အဲဒီမြေနေရာတွေကို နောက်အစိုးရလက်ထက်ကျရင် မရတော့မှာစိုးလို့ ဒီအစိုးရသက်တမ်းမကုန်ခင်မှာ အရေးပေါ်စီမံချက်နဲ့ အရယူသိမ်းဆည်းနေတာလို့ စွပ်စွဲနေကြတာတွေရှိပါတယ်။ အဲဒီအပေါ်မှာကော ဘာပြောချင်လဲ။
မရှိပါဘူး။ အခုရှင်းနေတာက နိုင်ငံတော်မြေတွေပဲ။ ပုဂ္ဂလိကပိုင်မြေနဲ့ ကုမ္ပဏီပိုင်မြေတွေရှင်းတာမရှိပါဘူး။ ပုဂ္ဂလိကပိုင်မြေကိုကျူးရင် သူ့ဟာသူရဲစခန်းမှာ အမှုဖွင့်မယ်၊ အမှုရင်ဆိုင်မယ်။ ဒါဟာ ဥပဒေနဲ့အညီရှင်းတာပါ။ အခုရှင်းနေတာက အစိုးရပိုင်မြေဖြစ်တဲ့အတွက်ကြောင့် ရှင်းနေတာပါ။
စီမံချက်နဲ့ ရှင်းနေတာဆိုရင်ကော ဘယ်လိုမျိုး စီမံချက်တွေနဲ့ ရှင်းနေတာလဲ။ ဖယ်ရှားခံရတဲ့ကျူးကျော်တွေကို နေရာအစားထိုးပေးဖို့ အစီအစဉ်ရှိလား။
ဥပမာ လယ်ဆည်ဆိုရင် လယ်ဆည်မြေပေါ့။ သူဘာစိုက်မယ် ကိုယ်တို့မသိဘူး။ သူ့မြေထဲမှာ ကျူးနေတာဖြစ်တဲ့အတွက်ကြောင့် ရှင်းပေးတာပါ။ သူဘာပင်စိုက်မယ်ဆိုတာ ကိုယ်တို့အလုပ် မဟုတ်ဘူး။ ဒီအတိုင်းပဲ ဆောက်လုပ်ရေးဝန်ကြီးဌာနရဲ့ မြေဆိုရင်လည်း သူ့မြေမှာကျူးတယ်ဆိုရင် ရှင်းပေးလိုက်တာပဲရှိတယ်။ အလုပ်သမားတွေ တန်းလျားဆောက်မှာလား၊ ဝန်ထမ်းတွေအိမ်ဆောက်မှာလားမသိဘူး။ ကိုယ်တို့က လုံခြုံရေးအပိုင်းက ဖြစ်တဲ့အတွက်ကြောင့် လုံခြုံရေးဆောင်ရွက်ပေးတာပဲဖြစ်တယ်။ နေရာစီစဉ်ပေးတာကတော့
ဆောက်လုပ်ရေးဝန်ကြီးဌာနကပဲ အသေးစိတ်သိလိမ့်မယ်။ သူတန်ဖိုးနည်းအိမ်ရာတို့ဘာတို့ ရောင်းချပေးတာရှိတာပေါ့။
ကျူးကျော်တွေက အမျိုးမျိုးရှိတယ်ဆိုပြီး ပြောဆိုနေကြတယ်။ တချို့ကလည်း နေစရာမရှိလို့ နဂိုကတည်းက နေကြတယ်၊ တချို့လည်း အခွင့်ကောင်းယူပြီး နေရာယူနေကြတယ်လို့ ပြောဆိုနေကြပါတယ်။ ကျူးကျော်တွေကို လေ့လာမိသလောက် ဘယ်လိုပုံစံတွေ့မိလဲ။
ကျူးကလည်း နေစရာမရှိလို့ကျူးတာနဲ့ နေစရာရှိရဲ့သားနဲ့ မြေကွက်သွားဦးထားတာတွေလည်း ရှိတယ်။ လူမရှိဘူး၊ ခြံစည်းရိုးတိုင်လေးတွေစိုက်ထားတယ်။ တဲထိုးထားတယ်။ ပြီးတော့ ဖျက်လိုက်တဲ့အချိန်ကျ သူကသူ့အိမ်မှာနေတာပဲ။ အဲဒီလိုဟာတွေလည်း အများကြီးပဲ။ နေစရာရှိတယ်။ ပြောရမယ်ဆိုရင် ရွေ့လျားကျူးတွေပေါ့ကွာ။ သူတို့က ဒီနေရာဘာနေရာလဲဆိုတာသိတယ်။ ဒါသည် ကုမ္ပဏီမြေလား၊ မြေလွတ်မြေရိုင်းလား၊ ဘယ်ဝန်ကြီးဌာနမြေလဲ အကုန်သိတယ်။ သိပြီးတော့မှ ဝင်ပြီးတော့ကျူးတာ။ ဘာမှမဖြစ်လောက်ပါဘူးဆိုပြီး ကျူးတယ်။ ဖယ်ရှားရှင်းလင်းတဲ့ အခါကျတော့ မြေကွက်တောင်းမယ်တို့၊ တိုက်ခန်းတောင်းမယ်တို့ ရှိတယ်။ တချို့ကလည်း လာပြီးတော့မှ စီးပွားရေးတစ်ခုအနေနဲ့ ကျူးတာ။ ရရင်လည်း အမြတ်၊ မရရင်လည်း အရင်းဆိုပြီးတော့မှ လုပ်တဲ့သူတွေလည်းရှိတယ်။
ရန်ကုန်တိုင်းအတွင်းမှာ ကျူးကျော်တွေ ဘယ်လောက်ရှိပါလဲ။
အဲဒါကတော့ တိတိကျကျ ကောက်ထားတာတော့ မရှိဘူး။ ကျူးကျော်ဆိုတာ ဒီနေ့ဒီမှာပဲရှိပေမယ့် နောက်နေ့ရှိချင်မှရှိတော့မှာ။ သူက ဒီနေ့လှိုင်သာယာမှာ အလုပ်လုပ်နေတယ်။ သူ့အလုပ်က ဒဂုံအရှေ့ကို ပြောင်းသွားရင် သူ့တဲကိုဖျက်ပြီး ပြောင်းသွားတာကိုး။ တဲတွေကတော့ သတင်းပို့ပြီးတော့ ဆောက်ထားတာမဟုတ်တော့ စာရင်းအတိအကျမရှိဘူး။ ဒါပေမဲ့ ရန်ကုန် ၄၅ မြို့နယ်မှာတော့ သောင်းဂဏန်းလောက်ရှိမယ်။
ရန်ကုန်မှာရှိတဲ့ ကျူးကျော်တွေကို အကုန်ရှင်းလင်းသွားမှာလား၊ ဘယ်မြို့နယ်မှာရှိတဲ့ ကျူးကျော်တွေက စီမံချက်ထဲမှာပါနေလဲဗျ။
အကုန်လုံးဖယ်ရှားဖို့ဆိုတာက ရာနှုန်းပြည့်တော့ ဖယ်ရှားဖို့ အခက်အခဲရှိတာပေါ့။ လိုအပ်သလောက်ပေါ့။ စီမံကိန်းနေရာတွေ အကုန်ဖယ်ရှားရှင်းလင်းသွားမှာပါ။ အမိန့်ထုတ်ထားတာတော့ မရှိပါဘူး။ ရှင်းရမယ့်နေရာတွေ ရှင်းသွားမှာပေါ့။ ဘယ်နေ့ဘာရှင်းမယ်ဆိုတာတော့ မရှိသေးဘူး။ လှိုင်သာယာ၊ ရွှေပြည်သာ၊ ဒဂုံဆိပ်ကမ်း ဒါတွေကအများဆုံးပါ။
အခုရန်ကုန်မြို့မှာ လူမိုက်တွေကို လိုက်လံဖမ်းဆီးနေပါတယ်။ ဘယ်အထိ လိုက်ဖို့ရှိပါသလဲ။ ဒီလိုလုပ်ဖြစ်ရတဲ့ အကြောင်းရင်းကဘာပါလဲ။
လူမိုက်ဆိုတဲ့ အသုံးအနှုန်းဆိုကတည်းက ဥပဒေနဲ့မညီတော့ဘူးလေ။ ဥပဒေနဲ့မညီတော့ မညီတဲ့သူတွေကို ဖော်ထုတ်ဖမ်းဆီးတာပဲ။ ဒါပေမဲ့ ဘယ်သူကမှခိုင်းလို့ မဟုတ်ဘူး။ သူ့ဟာသူ ကိုယ်စီတာဝန်ရှိပြီးသားပဲ။ မြန်မာနိုင်ငံရဲတပ်ဖွဲ့မှာ ဆိုရင်လည်း သူ့ဖွဲ့စည်းပုံရှိပါတယ်။ စခန်းမှူးရှိတယ်။ ခရိုင်မှူး ရှိတယ်။ ခရိုင်ရဲ့အပေါ်မှာ ရဲမင်းကြီးတို့ရှိတာပေါ့။ သူ့တာဝန်အလိုက် ထမ်းဆောင်တာပဲ။ လူတွေပြောလို့ လိုက်ဖမ်းနေတာမဟုတ်ဘူး။ သူ့ဟာသူ သူ့ပြစ်မှုနဲ့ဖမ်းနေတာ။ ဒီသဘောပါပဲ။ လူမိုက်ဆိုတာ ဥပဒေနဲ့မညီတော့ ဖမ်းနေတာပါ။ ရွှေပြည်သူတို့၊လှိုင်သာယာတို့တင် လိုက်ဖမ်းနေတာမဟုတ်ဘူး။ မြို့နယ်တိုင်းမှာရှိတဲ့ လူမိုက်မှန်သမျှအကုန်ဖမ်းမှာပဲ။ ဘယ်တော့ထိ ဖမ်းမှာလဲဆိုတာက ဒီလူတွေရှိတဲ့အထိ လိုက်ဖမ်းနေမှာပဲ။ လူမိုက်က တစ်ယောက်ဖမ်းလိုက်မယ်။ နောက်တစ်ယောက်ပေါ်လာ မယ်ဆိုလည်း ဆက်ဖမ်းနေဦးမှာပဲ။ နောက်တစ်ယောက်ထပ်ပေါ်လာလည်း ထပ်ဖမ်းမှာပဲ။
ရန်ကုန်မြို့မှာ လုံခြုံရေးနဲ့ပတ်သက်ပြီး အဓိကကြုံရတဲ့ အခက်အခဲက ဘာဖြစ်မလဲ။
အဓိကက ရဲတပ်ဖွဲ့အင်အား ပြည့်ပြည့်စုံစုံ မလုံလောက်တာပေါ့။ ရန်ကုန်တိုင်းမှာရှိတဲ့ လူအင်အားနဲ့ဆိုရင် ရဲတစ်ယောက်က ပြည်သူ ၁,၂၀၀ လောက်ကိုကြည့်နေရတဲ့အခါကျ ထောင့်စေ့အောင် မလုပ်နိုင်ဘူး။ ဒါကြောင့် ပြည်သူတွေက ၀ိုင်းပြီးသတင်းပေးရမှာပေါ့။ လုယက်မှုဖြစ်နေတယ်ဆိုရင်လည်း ဖုန်းနဲ့လှမ်းပြီးသတင်းပေးရမှာပေါ့။ အကုန်လုံးက ဝိုင်းပြီး ကူညီမယ်ဆိုရင်လည်း မြန်မြန်ဆန်ဆန် မိတာပေါ့။ ကျူးလွန်တဲ့သူကလည်း ရဲကားကြီးလာတဲ့အချိန် ဘယ်ကျူးလွန်မလဲ။ အခြေအနေကြည့်နေတာပေါ့။ ပြည်သူတွေက လုံခြုံရေးအသိရှိစွာနဲ့ ပူးပေါင်းပါဝင်ပေးမယ်ဆိုရင် လျင်လျင်မြန်မြန်ဖော်ထုတ်ဖမ်းဆီးနိုင်တာပေါ့။
ဒေသတွင်းတချို့နိုင်ငံတွေမှာ အကြမ်းဖက်မှုတွေရှိလာပါတယ်။ ပြည်တွင်းထဲကို အကြမ်းဖက်သမားတွေ ဝင်ရောက်နေတယ်လို့ ပြောဆိုနေကြပါတယ်။ အကြမ်းဖက်သမားတွေနဲ့ပတ်သက်ပြီး ဘယ်လိုပြင်ဆင်ပါသလဲ။
တရုတ်ပြည်မှာ အိုင်အက်စ် ၁၁ ယောက်လိုက်ဖမ်းလို့ မြန်မာ ပြည်ထဲပြေးတယ်ဆိုတာပေါ့။ သို့ပေမဲ့ မဟုတ်ပါဘူး။ ဒါပေမဲ့သတင်းက ဘယ်ကပဲရရ သတင်းကသတင်းပဲ။ မှန်တာပဲဖြစ်ဖြစ်၊ မှားတာပဲဖြစ်ဖြစ် သတင်းရပြီဆိုတာနဲ့ လုံခြုံရေးကို ပိုပြီးတော့တပ်လှန့်ထားတာပေါ့။ မြန်မာပြည်ထဲမှာ ဝင်လာနိုင်တဲ့ ဂိတ်ပေါက်တွေ အကုန်လုံး သတိပေးတယ်။ စီစီတီဗီတွေအကုန်လုံး ပြန်စစ်တယ်။ ပြန်ပြီးတော့ မှတ်တမ်းတွေအကုန်လုံး ပြန်စစ်တယ်။ အားနည်းချက်ဘာတွေရှိလဲဆိုတာ ပြန်စစ်တယ်။ လှည့်ကင်းတွေ တိုးချတာတွေလုပ်ရတာပေါ့။ အကုန်လုပ်ထားတာပေါ့။ နိုင်ငံခြားသားတွေ စစ်တယ်။ ဧည့်စာရင်းစစ်တာတွေလုပ်ရတာပေါ့။
လုံခြုံရေးကော ဘယ်လောက်ထိ တိုးချထားလဲ။
လုံခြုံရေးကတော့ အကုန်ပဲ။ ရဲအင်အား ၆,၀၀၀ ကျော် အကုန်ချထားတယ်။ အင်းစိန်မြို့နယ်မှာ ၅၀၀ ရှိရင်ရှိမယ်။ အဲဒီ ၅၀၀ က တော့ အကုန်ပဲ။ ၅၀၀ ထဲမှာစခန်းမှာဂျူတီကျတဲ့သူရှိမယ်။ လူဆိုးလိုက်ဖမ်းတဲ့သူရှိမယ်။ အဲဒီကိစ္စတွေပြီးတာနဲ့ အကုန်ပြန်လုပ်တာပဲ။
ရွေးကောက်ပွဲအနိုင်ရ အင်န်အယ်လ်ဒီပါတီဥက္ကဋ္ဌ ဒေါ်အောင်ဆန်းစုကြည်က လာမယ့်အစိုးရပိုင်းမှာ ရာထူးကြီးကြီး တာဝန်ထမ်းဆောင်ဖို့ရှိပါတယ်။ ဒီလိုမျိုးအရေးကြီးတဲ့ လူတစ်ယောက်ကို ရွေးကောက်ပွဲပြီးကတည်းက အစိုးရပိုင်းအနေနဲ့ လုံခြုံရေးပေးတာတွေမတွေ့ရသေးဘူး။ သမ္မတဖြစ်နိုင်တဲ့သူတွေ၊ ထင်ရှားကျော်ကြားတဲ့သူတွေဆို လုံခြုံရေးပေးမယ်လို့ နေပြည်တော်ဘက်ကပြောထားတာရှိပါတယ်။ သူကနေပြည်တော်မှာ အနေများပေမယ့် ရန်ကုန်မှာလည်းနေတော့ ရန်ကုန်မှာ လုံခြုံရေးပေးဖို့ အစီအစဉ်ရှိပါသလား။
လောလောဆယ်မရှိပါဘူး။ လောလောဆယ် သူကပါတီရဲ့ အကြီးအကဲတစ်ယောက်ပဲလေ။ ကျန်တဲ့ပါတီတွေကလည်း အများကြီးပဲလေ။ အဲဒါကြောင့် လုံခြုံရေးပေးမယ်ဆိုရင် အများကြီးဖြစ်သွားမှာပေါ့။ ဒီရန်ကုန်မှာလာလို့ရှိရင် ဒီမှာရှိနေတဲ့သူတွေအကုန်လုံး အ ယုတ်အလတ်အမြတ်မရွေးအကုန်လုံးကို လုပ်ပေးနေတာပါ။ အကုန်လုံးအတွက် လုံခြုံရေးလုပ်ပေးထားတာဖြစ်တဲ့အတွက် လောလောဆယ်တော့ ညွှန်ကြားချက်မရှိသေးတော့ မလုပ်ပေးသေးပါဘူး။ ညွှန်ကြားချက်ရှိရင်တော့ ဘယ်သူဖြစ်ဖြစ်လုပ်ပေးမှာပါ။
ကျေးဇူးတင်ပါတယ်။
7Day Daily
0 comments:
Post a Comment