တိုင်းနှင့်ပြည်နယ်များတွင် အထက်တန်းပြရာထူးအတွက် ရာထူးတိုးများခေါ်ယူလျက်ရှိကြောင်း အမှတ် (၂) အခြေခံပညာဦးစီးဌာနမှ သိရသည်။
အဆိုပါရာထူးအတွက် လုပ်သက်အနည်းဆုံး နှစ်နှစ်ရှိသော အလယ်တန်းပြဆရာ၊ ဆရာမများကိုခေါ် ယူလျက်ရှိပြီး အထက်တန်းကျောင်း (ခွဲ) နှင့်တွဲဖက်အထက်တန်းကျောင်းများ၏ လစ်လပ်နေရာများ တွင် အချိန်မီခန့်အပ်နိုင်ရန် ခေါ်ယူခြင်းဖြစ်ကြောင်း သိရသည်။
ယင်းနှင့်ပတ်သက်၍အမှတ် (၂) အခြေခံပညာဦးစီးဌာနမှ တာဝန်ရှိသူတစ်ဦးက “လောလောဆယ် တော့ အထက်တန်းပြရာထူးအတွက်ပဲ ခေါ်သေးတယ်။ တိုင်းနဲ့ပြည်နယ်အလိုက် လစ်လပ်နေရာတွေ တိုင်းမှာ ခန့်သွားနိုင်ဖို့ပါ။ အရေအတွက်ကန့်သတ်ထားတာမရှိပါဘူး” ဟုပြောသည်။
အဆိုပါအထက်တန်းပြရာထူးကို B.Ed ဘွဲ့ရပြီးသော အလယ်တန်းပြဆရာ၊ ဆရာမများ လျှောက်ထား နိုင်ပြီါ် ဘွဲ့မရသေးသောဆရာ၊ ဆရာမများအနေဖြင့် B.Ed တက်ရောက်ခွင့် ဝင်ခွင့်စာမေးပွဲများဖြေဆို ရကြောင်း၊ ရာထူးတိုးများအတွက် လျှောက်လွှာခေါ်ယူရာတွင် ရာထူးအလိုက်သတ်မှတ်ကာလများ တွင်သာ လျှောက်ထားရကြောင်း သိရသည်။
“ရာထူးတိုးတွေက အမျိုးမျိုးရှိတယ်။ တစ်နှစ်ကိုတစ်ကြိမ်ပဲ ခေါ်တယ်။ ပုံမှန်အတိုင်းဆို ၁၀ လပိုင်း လောက်ဆို ခေါ်နေကျပါ။ ရာထူးတိုးလျှောက်တာပဲဖြစ်ဖြစ် အပြောင်းအရွှေ့လျှောက်တာပဲဖြစ်ဖြစ် သတ်မှတ်ထားတဲ့ ကာလမှာပဲ လျှောက်ရတယ်။ ရာထူးတိုးခန့်ရင် လုပ်သက်နဲ့ခန့်တာရှိတယ်။ B.Ed ဘွဲ့ရအောင်ဝင်ခွင့်စာမေးပွဲဖြေရပြီး ခန့်တာရှိတယ်။ အလယ်တန်းပြ B.Ed ဘွဲ့ရပြီးတဲ့ ဆရာ၊ ဆရာမ တိုင်းလည်း အထက်တန်းပြရာထူးမလျှောက်ကြဘူး။ တချို့ဆရာမတွေဆိုရင် အလယ်တန်းပြမှာပဲ နေချင်လို့ဆိုပြီး ရာထူးတိုးလျှောက်လို့ရရဲ့သားနဲ့ မလျှောက်တာတွေရှိတယ်” ဟုကမာရွတ်မြို့နယ် ပညာရေးမှူးရုံးမှ တာဝန်ရှိသူတစ်ဦးက ပြောသည်။
၂၀၁၁ ခုနှစ်ခန့်က စတင်၍ လုပ်သက်အနည်းဆုံး ၁၅ နှစ်ရှိသော ပင်စင်ယူခါနီး အလယ်တန်းပြဆရာ ကြီး၊ ဆရာမကြီးများကို ခံစားခွင့်ပေးသောအားဖြင့် အထက်တန်းပြရာထူးတိုးများကို လျှောက်စေခဲ့ပြီး ပင်စင်ယူခါနီး နှစ်လခန့်အလိုတွင် ရာထူးတိုးပေး၍ အထက်တန်းပြရာထူးဖြင့် ပင်စင်ကိုခံစားစေ ကြောင်း သိရသည်။
The Yangon Times Daily
0 comments:
Post a Comment