ပြင်သစ်နိုင်ငံ မြို့တော်ပါရီရှိ Charlie Hebdo မဂ္ဂဇင်းတိုက်ကို မျက်နှာဖုံးစွပ် သေနတ်သမားများ ဝင်ရောက် ပစ်ခတ် တိုက်မှုကြောင့် သတင်းစာဆရာ ၁၀ ဦးနှင့် ရဲ ၂ ဦး သေဆုံးခဲ့ရခြင်းသည် သတင်း မီဒီယာလွတ်လပ်ခွင့်ကို တိုက်ရိုက်ခြိမ်းခြောက်သည့် လုပ်ရပ်ဖြစ်၍ ရှုတ်ချကြောင်း ရန်ကုန်အခြေစိုက် မြန်မာသတင်းစာဆရာများကွန်ယက်က ဇန်နဝါရီ ၈ ရက်တွင် သတင်းထုတ်ပြန်လိုက်သည်။
ပြင်သစ် သတင်းစာဆရာ ၁၀ဦး သေဆုံးခဲ့ရခြင်းအတွက် အထူးဝမ်းနည်းကြေကွဲရသလို သေဆုံးခဲ့ရသည့် သတင်းစာဆရာများ၏ မိသားစုဝင်များနှင့် ထပ်တူဝမ်းနည်းကြေကွဲရပြီး ကိုယ်ချင်းစာမိသည်ဟု မြန်မာသတင်း စာဆရာများ ကွန်ယက်၏ ထုတ်ပြန်ချက် တွင် ဖော်ပြထားသည်။ဇန်နဝါရီလ ၇ ရက်တွင် သေနတ်သမားများ၏ အကြမ်းဖက်ပစ်ခတ်တိုက်ခိုက်မှုကြောင့် Charlie Hebdo မဂ္ဂဇင်းတိုက်ရှိ လက်ထောက် အယ်ဒီတာချုပ်နှင့် သရော်ကာတွန်းများရေးဆွဲသည့် ကာတွန်းဆရာ လေးဦး သေဆုံးခဲ့ရမှုအပေါ် အထက်ပါအတိုင်း ရှုတ်ချလိုက်ခြင်း ဖြစ်သည်။
နောက်ဆက်တွဲ သတင်းများအရ အကြမ်းဖက် တိုက်ခိုက်သည့် သေနတ်သမား အများဆုံး ၃ ဦးဖြစ်နိုင်ကြောင်းနှင့် AK-47 သေနတ်များ ကိုင်ဆောင်ထားကြောင်း သိရသည်။ ၎င်းတို့သည် 'အလ္လာဟ်သည် ကြီးကျယ်မြင့်မြတ်သည်' တမန်တော်က အပြစ်ဒဏ်စီရင်ခဲ့ပြီ' ဟု အော်ဟစ်ကာ ပစ်ခတ်တိုက်ခိုက်ခဲ့ကြောင်း Daily Mail တွင် ဖော်ပြသည်။
ပြင်သစ်နိုင်ငံ၏ ပထမဆုံး မွတ်စလင်သမ္မတအကြောင်း စိတ်ကူးပုံဖော် ရေးသားထားသည့် ဝတ္ထုကို ဇန်န၀ါရီ ၇ ရက်က ဖြန့်ချိခဲ့သည့်နေ့တွင် ယခုကဲ့သို့ တိုက်ခိုက်မှုဖြစ်ပွားရခြင်း ဖြစ်သည်။
သတင်း မီဒီယာများ၏ ဖော်ပြမှုများနှင့်ပတ်သက်၍ ခြိမ်းခြောက်ခြင်း၊ အကြမ်းဖက်ခံ ရခြင်း၊ အသက်အန္တရာယ်ပြုခြင်းများသည် သတင်း မီဒီယာလွတ်လပ်ခွင့်ကို တိုက်ရိုက်ခြိမ်းခြောက်ခြင်းပင်ဖြစ်ပြီး လွတ်လပ်စွာ ထုတ်ဖော်ခွင့်ကိုပါ ထိခိုက်စေသည်ဟု မြန်မာသတင်းစာ ဆရာများ ကွန်ယက်၏ ထုတ်ပြန်ချက်တွင် ပါရှိသည်။
Thursday, January 8, 2015
ပြင်သစ် သတင်းစာဆရာများ သတ်ဖြတ်ခံရမှုအပေါ် မြန်မာ သတင်းစာဆရာများ ကွန်ယက် ရှုတ်ချ
Mizzima
Subscribe to:
Post Comments (Atom)
0 comments:
Post a Comment