နှစ် ၂၀ ကြာ ဆောက်လုပ်ရေး လောက၌ အောင်မြင်ခဲ့သော Father Land ကုမ္ပဏီမှာ ၂၀၁၄ ခုနှစ် အောက်တိုဘာလက ပန်းဆိုးတန်း အလယ်ဘလောက်ရှိ ၁၂ ထပ် ကွန်ဒိုကို တာဝန်ယူ ဆောက်လုပ်ခဲ့ရာ ယင်းအဆောက်အအုံ၏ မြေပိုင်ရှင်က စာချုပ်စာတမ်းအတု လိမ်လည်မှုဖြင့် ကုမ္ပဏီပိုင်ရှင် ဦးကျော်မြင့်ကို တရားစွဲဆိုခဲ့ကြောင်း၊ ယင်းနောက် ဦကျော်မြင့်ကို အင်းစိန်ထောင်တွင် ထိန်းသိမ်းခံရပြီး ကျောက်တံတားတရားရုံး၌ ရုံးတင်စစ်ဆေးခဲ့ရာမှ ကုမ္ပဏီပိုင်ရှင်က ရှယ်ယာဝင်များနှင့် တိုက်ခန်း ဝယ်ယူထားသူများ၏ နစ်နာငွေများ ပြန်ပေးရန် ညွှန်ကြားခဲ့ခြင်း ဖြစ်ကြောင်း Father Land ကုမ္ပဏီပိုင်ရှင်၏ အကျိုးဆောင်ရှေ့နေ တစ်ဦးထံမှ သိရှိရသည်။
“တရားစွဲခံရပြီး နောက်ပိုင်း ကုမ္ပဏီက ရှယ်ယာဝင်တွေနဲ့ တိုက်ခန်း ဝယ်သူတွေက သူတို့ငွေတွေ ပြန်ရဖို့ စာရွက်စာတမ်း အထောက်အထားတွေနဲ့ လာပြောတဲ့သူ အယောက် ၂၀ လောက်ရှိတယ်၊ သိန်းထောင်ချီ ပြန်ရစရာရှိတဲ့သူ ပါသလို သိန်းတစ်ရာ နှစ်ရာ ချေးထားတဲ့သူတွေလည်း ပါတယ်၊ ကုမ္ပဏီပိုင်ရှင်ရဲ့ ညွှန်ကြားချက်ကို စောင့်ကြည့်ပြီး နစ်နာသူတွေရဲ့ ငွေတွေကို အမြန်ဆုံး ပြန်ထုတ်ပေးသွားမှာပါ” ၎င်းက ဆက်လက်ပြောကြားသည်။
Father Land ကုမ္ပဏီပိုင်ရှင် ဦးကျော်မြင့်မှာ ကျောက်တံတား မြို့နယ်တရားရုံးတွင် လိမ်လည်မှုဖြင့် စစ်ဆေးခံနေစဉ် တစ်လကျော်ကြာ ရုံးတော်သို့ လာရောက်စစ်ဆေးမခံဘဲ ရှောင်တိမ်းခဲ့ကြောင်း၊ ၎င်းရှောင်တိမ်းနေစဉ်တွင် ကုမ္ပဏီမှ တိုက်ခန်းများ ဝယ်ယူထားသူများက လိမ်လည်မှုများဖြင့် ဗိုလ်တထောင်၊ ဗဟန်း၊ သန်လျင်၊ တာမွေနှင့် မင်္ဂလာတောင်ညွန့် မြို့နယ်တို့တွင် အမှုဖွင့်တိုင်ကြားခဲ့ကြောင်း သက်ဆိုင်ရာ မြို့နယ်ရဲစခန်းများထံမှ သိရှိရသည်။
“တရားရုံးမှာ အစစ်ဆေးမခံဘဲ တစ်လကျော်ကြာ ပျောက်နေရာက သူကိုယ်တိုင် ပြန်လာအဖမ်းခံခဲ့တယ်။ ပျောက်နေချိန်မှာ နာမည်ကြီး နာရီဆိုင်ပိုင်ရှင်ကို သူ့ပိုင်ဆိုင်မှု တချို့တစ်ဝက်ကို အမည်ပြောင်း လွှဲပေးခဲ့တယ်လို့ သိရတယ်၊ သူပြန်လျော်ရမယ့်ငွေက သန်းကို သိန်းချီလောက် ရှိတာ၊ အခုမှ နစ်နာသူတွေရဲ့ ငွေကို ပြန်ပေးမယ်ဆိုတော့ သူတကယ် ပြန်လျော်နိုင် မလျော်နိုင်ပါ့မလား ဆိုတာ စောင့်ကြည့်အနေထား ရောက်နေပြီ” ဟု ဗဟန်းမြို့မ ရဲစခန်းတွင် ငွေကျပ်သန်း ၂၅၀၀ လိမ်လည်မှုဖြင့် Father Land ကုမ္ပဏီပိုင်ရှင်ကို အမှုဖွင့်ထားသူ တစ်ဦးက ဆိုသည်။
အဆိုပါ ကုမ္ပဏီပိုင်ရှင်က နစ်နာခဲ့သူများ၏ ငွေများကို ပြန်ပေးအပ်ရန် မညွှန်ကြားခင် ကုမ္ပဏီသို့ ငွေချေးထားသူများကို ၎င်း၏ မိသားစုဝင်များက အမှုမဖွင့်ရန်၊ ချေးငွေများကို ပြန်လည်ထုတ်ပေးမည်ဟု ပြောဆိုခဲ့သော်လည်း ယနေ့အချိန်ထိ ချေးငွေများ ပေးအပ်မှု မရှိသေးကြောင်း ယင်းကုမ္ပဏီကို ငွေချေးထားသူများထံမှ သိရှိရသည်။
The Voice Weekly
0 comments:
Post a Comment