အစိုးရနှင့် ကေအိုင်အို နှစ်ဖက်ယုံကြည်မှုအခြေအနေ တိုးတက်လာဟုဆို

ကချင်လွတ်မြောက်ရေးအဖွဲ့ KIA နှင့် အစိုးရ၏ စစ်တပ်တို့အကြား တိုက်ပွဲ ဖြစ်ပွားမှုမှာ သြဂုတ်လအတွင်း လျော့နည်းခဲ့ပြီး နှစ်ဖက် ယုံကြည်မှု ပိုမိုရှိလာကာ လုပ်ငန်းတိုးတက်မှု ရှိသည်ဟု KIO ဘက်မှ ပဋိပက္ခညှိနှိုင်းဖြေရှင်းရေးကော်မတီမှ အဖွဲ့ဝင် ဗိုလ်မှူးကြီး ခွန်နောင်က မဇ္ဈိမကို ပြောသည်။



“ဒီကော်မတီက ဖြစ်လာပြီဆိုရင် တစ်ဖက်နဲ့တစ်ဖက် အမြန်ဆုံး အကြောင်းကြားပြီး ထပ်ပြီး မကြီးပွားအောင် ညှိနှိုင်းမှုတွေက တိုးတက်မှုရှိတဲ့ အပိုင်းတွေပါ၊ ကျွန်တော်တို့ ညှိနှိုင်းဖြေရှင်းတဲ့ ကိစ္စမှာလဲ တစ်ဦးနဲ့တစ်ဦး ပိုပြီးနားလည်မှု ရရှိလာတယ်။ ပြီးတော့ ပဋိပက္ခနဲ့ပတ်သက်လို့ တော်တော်လေး တစ်ဖက်နဲ့တစ်ဖက် ထိန်းချုပ်မှု အပိုင်းတွေ ရှိလာတယ်။ ဒါကြောင့် တိုက်ပွဲတော့ လျော့လာတယ်လို့ မြင်တွေ့ရပါတယ်”ဟု သူက ပြောသည်။သြဂုတ်လအတွင်း အစိုးရနှင့် KIO တပ်များအကြား တိုက်ပွဲ ဖြစ်ပွားမှုလျော့နည်းခဲ့သော်လည်း ယခုလဆန်းပိုင်းကမူ ဖားကန့်မြို့နယ်အတွင်း KIO တပ်မဟာ ၂ လက်အောက်ခံ တပ်ရင်း ၆ တပ်စခန်းအတွင်း အစိုးရ စစ်တပ်က နယ်မြေ ရှင်းလင်းရေး လှုပ်ရှားလာသဖြင့် ထိတွေ့မှု ဖြစ်ပွားမှု နှစ်ကြိမ်၊ သုံးကြိမ်ခန့် ဖြစ်ပွားခဲ့သည်ဟု ဗိုလ်မှူးကြီး ခွန်နောင်က ပြောသည်။

ပြီးခဲ့သည့် ဇူလိုင်လအတွင်း အစိုးရနှင့် KIO အကြား တိုက်ပွဲပေါင်း ၄ ကြိမ်ခန့် ဖြစ်ပွားခဲ့ပြီး ယခု သြဂုတ်လတွင်မူ ဖားကန့်မြို့နယ်အတွင်း ထိတွေ့မှု ဖြစ်ပွားခဲ့မှုသာ ရှိခဲ့သဖြင့် တိုက်ပွဲ ဖြစ်ပွားမှု လျော့နည်းသွားသည်ဟု ကချင်ငြိမ်းချမ်းရေးအကျိုးဆောင်အဖွဲ့ဝင် ဦးလမိုင်ဂွမ်ဂျာက ပြောသည်။

ထို့ပြင် သြဂုတ်လ ဒုတိယပတ်အတွင်း မြစ်ကြီးနားမြို့၌ ပဋိပက္ခညှိနှိုင်းဖြေရှင်းရေး ကော်မတီဝင်များ တွေ့ဆုံစဉ် ကချင်ပြည်နယ် ကျောက်စိမ်းမှော်အား လာမည့် စက်တင်ဘာလ ၁ရက်တွင် ပြန်လည် ဖွင့်လှစ်မည် ဖြစ်၍ ဖားကန့် ကားလမ်းကြောင်း လုံခြုံရေးအတွက် အစိုးရ စစ်တပ်၏ လှုပ်ရှားမှုများ ရှိလာမည်ဟု KIO သို့ နုတ်အားဖြင့် တင်ပြခဲ့သည်ဟု ဦးခွန်နောင်က ပြောသည်

“ကချင်ပြည်နယ်နယ်စပ်ဝန်ကြီး ပြောတာက စက်တင်ဘာလ ၁ ရက်နေ့ ကျောက်စိမ်းတွင်း ပြန်ပြီး ဖွင့်မယ်ဆိုပြီးတော့ ပြောပြထားတာ ရှိတယ်။ သူတို့ အထက်က ယုံကြားတာရှိသလို၊ ကျွန်တော်တို့ဘက်ကလည်း ပြဿနာ ထိပ်တိုက် မဖြစ်အောင် လှုပ်ရှားမယ်ဆိုရင် ကြိုတင်အကြောင်းကြားပြီးတော့မှ စဉ်းစားပေးဖို့ ညှိနှိုင်းကြပါတယ်”ဟု ပြောသည်။

အစိုးရဘက်မှ ဖားကန့် ကားလမ်း တစ်ဖက်တစ်ချက် ၃ မိုင်မှ ၅ မိုင်အတွင်း အစိုးရ စစ်တပ်က လုံခြုံရေးယူရန် ရှိသဖြင့် ပစ်ခတ်မှု မရှိစေရန် KIO အား အကြောင်းကြားခဲ့ခြင်းဖြစ်ပြီး အစိုးရ၏ တင်ပြချက်အပေါ် KIO ဗဟိုဌာနချုပ်မှ တစ်စုံတစ်ရာ ညွှန်ကြားခြင်း မရှိသေးကြောင်း KIO ဗဟိုသတင်းနှင့် ပြန်ကြားရေး ဒုတိယ တာဝန်ခံ ဒု-ဗိုလ်မှူးကြီး နော်ဘူက ပြောသည်။

“ဖားကန့်ဘက် ကုမ္ပဏီတွေ ပြန်ဝင်လာတော့မယ်။ ဒါကြောင့် ကားလမ်း၊ တံတား လုံခြုံရေး အတွက် အစိုးရတပ်တွေ လုံခြုံရေးယူရမယ်။ အဲဒီမှာ ကေအိုင်အို တပ်စခန်းတွေ ရှိရင် အကြောင်းကြားပေးပါ။ အချင်းချင်း ပစ်ခတ်မှု မဖြစ်ပွားဖို့ ကြိုတင် အကြောင်းကြားပါတယ်။ အေအိုင်အိုက ဘာမှ ပြောစရာ မရှိဘူး။ ကုမ္ပဏီကိုလည်း ကျနော်တို့ဘက်က ပိတ်လိုက်တာ မဟုတ်ဘူး။ သူတို့ဖာသာ ရုပ်သိမ်းတာ ဖြစ်တယ်”ဟု ၎င်းင်းက မဇ္ဈိမကို ပြောသည်။

KIO နှင့် အစိုးရတို့အကြား နိုင်ငံရေးအရ အာမခံချက် မရှိသေးသဖြင့် ကုမ္ပဏီများ ဝင်ရောက်လုပ်ကိုင်နေချိန် တိုက်ပွဲ ပြန်လည် ဖြစ်ပွားလာပါက ကုမ္ပဏီများ ထိခိုက်မှု ရှိလာနိုင်သည်ဟု ဖားကန့်မှော်ကော်မတီကလည်း ကုမ္ပဏီများအား ပြောဆိုမှုများ ရှိသည်ဟု သိရသည်။

ပြီးခဲ့သည့် မေလ ၂၈ ရက်က ပြည်ထောင်စု ငြိမ်းချမ်းရေးဖော်ဆောင်ရေးလုပ်ငန်းကော်မတီ (UPWC) နှင့် KIO တို့ သဘောတူညီမှုဖြင့် ပဋိပက္ခညှိနှိုင်း ဖြေရှင်းရေးအဖွဲ့ကို စတင်ဖွဲ့စည်းခဲ့ခြင်း ဖြစ်ပြီး ဆက်လက်၍ Joint Monitoring committee ဖွဲ့စည်းပြီး ရှေ့ဆက်လုပ်ငန်း ထိထိရောက်ရောက် အကောင်အထည်ဖော်နိုင်မည်ဟု ဗိုလ်မှူးကြီး ခွန်နောင်က ပြောသည်။

ပြီးခဲ့သည့် ၂ဝ၁၃ ခုနှစ် အောက်တိုဘာလက UPWC နှင့် KIO တို့ တွေ့ဆုံ ဆွေးနွေးပွဲတွင် စစ်ရှည်လျှော့ချရေးနှင့် တိုက်ပွဲများ ထပ်မံ မဖြစ်ပွားစေရေးအတွက် ပူးတွဲစောင့်ကြည့် ကြီးကြပ်ရေး ကော်မတီကို ပဋိပက္ခ ဖြစ်ပွားရာ ဒေသအားလုံး အကျုံးဝင်စေမည့် ဖွဲ့စည်းပုံဖြင့် ဖွဲ့စည်းသွားရန်၊ ယင်းကော်မတီအား ခြေပြဇယား (Joint Monitoring Committee Structure) ပူးတွဲ(၁)နှင့် ပူးတွဲစောင့်ကြည့်ရေးတွင် ဆောင်ရန်၊ ရှောင်ရန် အခြေခံ အချက်ငါးချက် သဘော တူညီခဲ့ကြသည်။

 မဇ္ဈိမ