(၁) ယနေ့ကြွရောက်လာကြတဲ့ NCCT မှ တိုင်းရင်းသားခေါင်းဆောင်ကြီးများ၊ လွှတ်တော်ကိုယ်စားလှယ်တော်ကြီးများ၊ တပ်မတော် အရာရှိကြီးများ၊ ပြည်ထောင်စုဝန်ကြီးများ၊ နှစ်ဖက်မှ အလုပ်အဖွဲ့များ နဲ့ မီဒီယာများမှ ဂျာနယ်လစ်များ အားလုံးကို မင်္ဂလာပါလို့ နူတ်ခွန်းဆက်ပါရစေ။(၂) ပြီးခဲ့တဲ့ UPWC နဲ့ NCCT စက်တင်ဘာလအစည်းအဝေးမှာ ကျွန်တော်တို့ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူညီချက်မူကြမ်းကို ညှိနိူင်းကြတဲ့ အခါမှာ စတုတ္ထမူကြမ်းကို ရရှိခဲ့ပါတယ်။ ဒါပေမယ့် တတိယမူကြမ်းထက် အချက်(၃)ချက်လောက် ပြန်ပိုလာတဲ့ အတွက် အနည်းငယ်နောက်ဆုတ် သွားတယ်လို့ ပြောလို့ရပါတယ်။
(၃) ဒါကြောင့် ပြီးခဲ့တဲ့ဆွေးနွေးပွဲတွေက အတွေ့အကြုံတွေကို သင်ခန်းစာယူပြီး ရလဒ်ကောင်းတွေ အောင်ပြင်ဆင်မှုတွေ နှစ်ဖက်လုံးက လုပ်နေကြပါတယ်။ ဒီကနေ့ ဆွေးနွေးပွဲဟာ အဖွဲ့ဝင်တွေ အပြည့်အစုံတက်နိုင်မယ့် နောင်လာမည့် ပဉ္စမမူကြမ်းရေးဆွဲပွဲမှာ ကျန်ရှိနေသေးတဲ့ အချက်တွေကို နှစ်ဖက်က ပွင့်ပွင့်လင်းလင်း ညှိနိူင်းကြတဲ့ပွဲဖြစ်ပါတယ်။
(၄) ကျွန်တော်တို့ကို နိုင်ငံတကာက ပဋိပက္ခညှိနိူင်းရေး ပညာရှင်တွေက ပြောခဲ့ပါတယ်။ ခင်ဗျားတို့ NCA ကိုညှိတာ (၃၀)ရာခိုင်နူန်း လောက်ရောက်ရင် ရှေ့မတိုးနိုင်ပဲ ရပ်သွားလိမ့်မယ်လို့ ဆိုခဲ့ပါတယ်။ ကျွန်တော်တို့ စတင် ညှိနိူင်းကြတဲ့အခါမှာ အချက် (၁၂၁) ချက်နဲ့ စတင်ခဲ့ကြတာ ဖြစ်ပါတယ်။ ဒီကနေ့မှာ မူကြမ်း၏ အဓိကအကြောင်းအရာ အနည်းငယ်ပဲ ကျန်ရှိနေတော့ တာဖြစ်ပါတယ်။ ဒါကြောင့် ကျွန်တော်တို့ နှစ်ဖက်လုံးက (၉၀)ရာခိုင်နူန်းကျော်ကို သဘောတူနိုင်ခဲ့ကြတာ ဖြစ်ပါတယ်။ နှစ်ဖက်လုံးရဲ့ ကြိုးစားအားထုတ်မှုကြောင့် အင်မတန်များပြားတဲ့ အချက်များကို သဘောတူညီမှု ရရှိနိုင်ခဲ့တာဖြစ်ပါတယ်။
(၅) တစ်နိုင်ငံလုံးပစ်ခတ်တိုက်ခိုက်မှု ရပ်စဲရေး သဘောတူညီချက်မှာ အဓိက ရည်မှန်းချက်ကြီး (၂)ခုရှိပါတယ်။ နံပါတ်တစ်… အပစ်အခတ်ရပ်စဲရေး ခိုင်မာလာစေရေး နဲ့ နံပါတ်နှစ်…… နိုင်ငံရေး ဆွေးနွေးပွဲများ စတင်နိုင်ရေး တို့ဖြစ်ပါတယ်။
(၆) ကျွန်တော်တို့ နှစ်ဖက်လုံးက သဘောတူထားပြီးသား အချက်တွေကို ကြည့်မယ်ဆိုရင် မြန်မာနိုင်ငံ သမိုင်းမှာ တစ်ခါမှ မရှိခဲ့ဖူးတဲ့ တိုးတက်မှုတွေ လည်းပါ ပါတယ်။ “ဖယ်ဒရယ်” ဆိုတဲ့ စကားရပ်ကို အစိုးရတစ်ခုအနေနဲ့ လက်ခံအသိအမှတ်ပြုပြီး အနာဂတ်ပြည်ထောင်စုကို ဒီမိုကရေစီ နဲ့ ဖယ်ဒရယ်စနစ်တို့ကို အခြေခံပြီး တည်ဆောက်သွားဖို့ မူကြမ်းမှာ သဘောတူခဲ့ကြတာဖြစ်ပါတယ်။ ဒါဟာ သမိုင်းမှတ်တိုင် အချိုးအကွေ့ တစ်ခုကို ရောက်ခဲ့တာပါ။ နိုင်ငံတော်သမ္မတကြီးအနေဖြင့် တိုင်းပြည်က ခွဲထွက်ခွင့်ကိစ္စရပ်နဲ့ အချုပ်အခြာအာဏာကို ထိပါးတဲ့ ကိစ္စရပ်(၂)ရပ်မှ လွဲပြီး ကျန်ကိစ္စရပ်များကို ဆွေးနွေးနိုင်ဖို့ လမ်းဖွင့်ထားပါတယ် လို့မိန့်ကြားထား ပါတယ်။ ပြည်ထောင်စု တပ်မတော်ဆိုင်ရာ ကိစ္စရပ်များလည်း ဆွေးနွေးနိုင် ကြပါတယ်။
(၇) ဒါ့အပြင် နှစ်ဖက်တပ်တွေ လိုက်နာရမယ့် စည်းကမ်းတွေရေးဆွဲဖို့ သဘောတူ နိုင်ခဲ့ပါတယ်။ ပြည်သူလူထုကို အကာအကွယ်ပေးမယ့် အချက်တွေကို သဘောတူနိုင်ခဲ့ပါတယ်။ ဒီအချက်တွေက Code of Conduct လို့ခေါ်တဲ့ အပစ်အခတ်ရပ်စဲထားစဉ်အတွင်း နှစ်ဖက်က လိုက်နာရမည့် ကျင့်ဝတ် စည်းကမ်းတွေပဲ ဖြစ်ပါတယ်။
(၈) ဒီကျင့်ဝတ် စည်းကမ်းတွေကို ဖောက်ဖျက်မှုတွေ ကို တားဆီးဖို့ JMC လို့ခေါ်တဲ့ ပူးတွဲစောင့်ကြည့်ကြီးကြပ်ရေး ကော်မတီကို ဖွဲ့စည်းဖို့လည်း နှစ်ဖက် သဘောတူနိုင်ခဲ့ကြပါတယ်။ ဒီကော်မတီမှာ အစိုးရ နဲ့ လက်နက်ကိုင်တိုင်းရင်းသားအဖွဲ့တွေရဲ့ ကိုယ်စားလှယ်တွေသာမက အများကလက်ခံကြည်ညိုတဲ့ သမာသမတ်ရှိသူများလည်း ပါဝင်နိုင်ကြဖို့ ဖြစ်ပါတယ်။
(၉) ပြီးခဲ့တဲ့ နိုဝင်ဘာလ ထဲမှာ ဖြစ်ပွားခဲ့တဲ့ လိုင်ဇာဗိုလ်သင်တန်းကျောင်းက ဖြစ်စဉ်အပါအဝင် ကချင်ပြည်နယ်နဲ့ ရှမ်းမြောက်ဒေသတွေက ထိတွေ့ တိုက်ခိုက်မှုတွေကို ကြည့်ရင် ဒီဒေသတွေမှာ အပစ်အခတ်ရပ်စဲရေး ခိုင်မာအောင် မလုပ်နိုင်သေးလို့ဆိုတဲ့ အချက်ကို တွေ့ရမှာ ဖြစ်ပါတယ်။ အပစ်အခတ်ရပ်စဲရေး ခိုင်မာဖို့ ဆိုရင် ပစ်ခတ်တိုက်ခိုက်မှု ရပ်စဲရေး သက်သက်ကို သဘောတူရုံနဲ့ မလုံလောက်နိုင်ပါဘူး။ နှစ်ဖက်လိုက်နာရမယ့် စည်းကမ်းတွေကို သေသေချာချာ သတ်မှတ်ပြီး ချိုးဖောက်မှုတွေ ဖြစ်လာရင် စောင့်ကြည့်ကြီးကြပ် စီစစ်နိုင်တဲ့ ပူးတွဲစောင့်ကြည့်ကြီးကြပ်ရေး ကော်မတီ ပီပီပြင်ပြင် အသက်သွင်းနိုင်ဖို့လိုပါလိမ့်မယ်။
(၁၀) ဒီအချက်တွေကို အကောင်အထည်ဖော်နိုင်ဖို့ အတွက် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူညီချက်တစ်ခုကို လိုအပ်မှာ ဖြစ်ပါတယ်။ လက်ရှိသဘောတူပြီးတဲ့ အချက်တွေထဲမှာ အပစ်အခတ် ရပ်စဲရေးကို ခိုင်မာအောင်လုပ်ဖို့ အစီအမံများ ပါရှိပြီးလည်းဖြစ်ပါတယ်။
(၁၁) လက်ရှိ မြန်မာနိုင်ငံရဲ့ လက်နက်ကိုင်ပဋိပက္ခ နဲ့ အပစ်အခတ်ရပ်စဲရေး အခြေအနေကို ကြည့်မယ်ဆိုရင် အဓိကကျတဲ့ မှတ်ကျောက်တင်နိုင်တဲ့ အနေအထားမှာ ရှိပါတယ်။ ယခင်က ပြည်နယ်နဲ့ တိုင်းဒေသကြီး စုစုပေါင်း (၁၀) ခုတို့မှာ လက်နက်ကိုင် တိုက်ပွဲများ ရှိခဲ့ပါတယ်။ အခုချိန်မှာ ကချင်ပြည်နယ်နဲ့ ရှမ်းမြောက်ဒေသများမှာပဲ တိုက်ပွဲများ ဆက်ရှိတာကို တွေ့ရပါတယ်။ ကျန်ဒေသအများစုမှာ တခါတရံမှသာ ထိတွေ့မှု အသေးလေးတွေ ဖြစ်တာရှိပါတယ်။ ၂၀၁၄ ခုနှစ်ဟာ လွတ်လပ်ရေး ရပြီးတဲ့ အချိန်ကနေပြီး အခုအထိ လက်နက်ကိုင် တိုက်ပွဲ အနည်းဆုံးနှစ်လို့ ပြောလို့ရပါတယ်။ တိုက်ပွဲဖြစ်တဲ့ အကြိမ်အရေ အတွက် အရရော၊ ထိခိုက်ကျဆုံးမှု အရရော၊ ပြည်သူလူထုရဲ့ အသက်အိုးအိမ်စည်းစိမ် ဆုံးရှုံးမှုတွေ အရရော နိူင်းကြည့်မယ်ဆိုရင် လက်နက်ကိုင်ပဋိပက္ခ အနည်းဆုံးကာလလို့ သုံးသပ်လို့ရပါတယ်။
(၁၂) ဒါပေမယ့် ပစ်ခတ်တိုက်ခိုက်မှုတွေကို ယာယီရပ်စဲတဲ့ အဆင့်ကနေ ခိုင်ခန့်တဲ့ အပစ်အခတ်ရပ်စဲရေး ဖြစ်စေဖို့ တစ်နိုင်ငံလုံးပစ်ခတ်တိုက်ခိုက်မှု ရပ်စဲရေး သဘောတူညီချက်မူကြမ်းပါ အချက်များကို နှစ်ဖက်က မြန်မြန်နိဂုံးချုပ်ပြီး အကောင်အထည်ဖော်နိုင်ဖို့ အရေးကြီးပါတယ်။
(၁၃) အပစ်အခတ်ရပ်စဲရေးကို အောင်မြင်အောင်လုပ်နိုင်ရုံနဲ့လည်း မြန်မာပြည်ရဲ့ လက်နက်ကိုင် ပဋိပက္ခကို ဖြေရှင်းနိုင်မှာ မဟုတ်ပါဘူး။ ဒါကြောင့် မြန်မာနိုင်ငံရဲ့ တိုင်းရင်းသားအားလုံး အေးအတူပူအမျှ လက်တွဲနေနိုင်မယ့် ဖယ်ဒရယ်စနစ်တစ်ခုကို အဖြေရှာနိုင်ဖို့ နိုင်ငံရေးဆွေးနွေးပွဲကြီး ကျင်းပနိုင်ဖို့ အရေးကြီးပါတယ်။
(၁၄) လက်ရှိသဘောတူပြီးသား အချက်တွေထဲမှာ နိုင်ငံရေးဆွေးနွေးပွဲတွေ ကျင်းပဖို့၊ နိုင်ငံရေးဆွေးနွေးပွဲတွေ ပူးတွဲကမကထပြုဖို့ ပြည်ထောင်စု ငြိမ်းချမ်းရေးဆွေးနွေးမှု ကော်မတီ ဖွဲ့စည်းရေးကိုလည်း သဘောတူ ထားပြီးဖြစ်ပါတယ်။
(၁၅) ပြည်ထောင်စုငြိမ်းချမ်းရေး ညီလာခံကြီးကို ကျွန်တော်တို့ အစိုးရအနေနဲ့ အစပျိုးခဲ့ဖို့ ဆန္ဒရှိပြီးဖြစ်ပါတယ်။ နိုင်ငံရေး ပြဿနာကို နိုင်ငံရေး နည်းလမ်းနဲ့ ဖြေရှင်းဖို့ဆိုတဲ့ မူကို အခြေခံတာဖြစ်ပါတယ်။ ငြိမ်းချမ်းရေး ညီလာခံကြီးကနေ ပြည်တွင်းငြိမ်းချမ်းရေး တင်မကပဲ၊ ဖွဲ့စည်းပုံအခြေခံ ဥပဒေဆိုင်ရာ ကိစ္စတွေကိုလည်း ဆွေးနွေးကြမှာ ဖြစ်ပါတယ်။ ပင်လုံညီလာခံကြီးလိုပဲ အရေးပါတဲ့ ခေတ်သစ်မြန်မာနိုင်ငံအတွက် ဦးတည်တဲ့ ဆွေးနွေးညှိနိူင်းမှုတွေ ဖြစ်ပါလိမ့်မယ်။
(၁၆) ဒီလုပ်ငန်းစဉ်တွေကို အကောင်အထည်ဖော်နိုင်ဖို့ နှစ်ဖက်လုံးက ဆန္ဒရှိကြပါတယ်။ ဒါပေမယ့် ကျွန်တော်တို့မှာ အချိန်အကန့်အသတ်ရှိတဲ့ အနေအထားကို ရောက်ရှိနေပြီ ဖြစ်ပါတယ်။ ၂၀၁၅ ကို ရောက်ပြီဆိုတာနဲ့ ငြိမ်းချမ်းရေး ကိစ္စတင်မကပဲ လွတ်လပ်မျှတတဲ့ ရွေးကောက်ပွဲ ဖြစ်မြောက်ရေး ဆိုတာကိုလည်း အကောင်အထည်ဖော်ရဦးမှာ ဖြစ်ပါတယ်။ ၂၀၁၅မှာ ဦးစားပေး ကိစ္စရပ်တွေ ပိုများလာမှာ ဖြစ်တဲ့အတွက် ငြိမ်းချမ်းရေး အတွက် လိုအပ်တဲ့ အဓိကအုတ်မြစ် ဖြစ်တဲ့ တစ်နိုင်ငံလုံးပစ်ခတ်တိုက်ခိုက်မှု ရပ်စဲရေး သဘောတူညီချက်ပါ အချက်တွေကို မြန်မြန်နိဂုံးချုပ်ပြီး ရှေ့ဆက်သွားဖို့ အရေးကြီးပါတယ်။ လက်ရှိသဘောတူပြီးသား အချက်တွေက ရှေ့ဆက်သွား ဖို့ လုံလောက်တဲ့ အနေအထားမှာ ရှိနေပြီလို့လည်း ရိုးရိုးသားသား ယုံကြည် မိပါတယ်။ ကျွန်တော်တို့ အစိုးရ အနေနဲ့ ဘယ်လိုအခက်အခဲတွေရှိရှိ ငြိမ်းချမ်းရေး ခရီးရဲ့ ရည်မှန်းချက်ကို ရောက်အောင် ဆက်လက်အကောင် အထည် ဖော်သွားဖို့ ဆုံးဖြတ်ထားပြီး ဖြစ်ပါတယ်။
(၁၇) တစ်နိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူညီချက်မှာ ဘာတွေ ပါလဲ ဆိုတာ လူထုကလည်း သိချင်နေကြပါတယ်။ ဘာလို့ကြာ နေတာလည်း လို့လည်းမေးနေတာ ရှိပါတယ်။ ပွင့်လင်းမြင်သာမှု ရှိဖို့ဆိုတာ ကိုလည်း ပြောနေကြပါတယ်။ ဒါကြောင့် တစ်နိုင်ငံလုံးပစ်ခတ်တိုက်ခိုက်မှု ရပ်စဲရေး စာချုပ်ဆွေးနွေးတဲ့ အပေါ်မှာ လူထုအများစုသိနိုင်အောင် နှစ်ဖက်လုံးက ရှင်းလင်းဆွေးနွေးပြသဖို့ တိုက်တွန်းလိုပါတယ်။
(၁၈) ယခုလုပ်ငန်းညှိနိူင်းဆွေးနွေးပွဲကနေ တစ်နိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူညီချက်မူကြမ်းပါ ကျန်ရှိနေတဲ့ အချက်တွေကို မြန်မြန် သဘောတူညီချက်ယူနိုင်ဖို့ တက်ရောက်လာတဲ့ ခေါင်းဆောင်များ အားလုံးကြိုးစားသွားကြလိမ့်မယ်လို့ မျှော်လင့်ပါတယ်။ ကျွန်တော်တို့ တိုင်းပြည်အတွက် ငြိမ်းချမ်းတဲ့၊ ပိုမိုတောက်ပတဲ့၊ အနာဂတ် မျိုးဆက်သစ် တွေအတွက် အမွေကောင်းတွေ ချပေးဖို့ နောက်တစ်လှမ်းတက်နိုင်ဖို့လည်း မျှော်လင့်ပါတယ်။
(၁၉) ကျွန်တော့်တို့ အနေနဲ့ ဒီဆွေးနွေးပွဲကနေ ရလဒ်ကောင်းတွေ ထွက်ပေါ် လာအောင် အစွမ်းကုန် ကြိုးစားသွားမယ်၊ အမြန်ဆုံး လက်မှတ်ရေးထိုး နိုင်ကြပြီး နိုင်ငံရေးဆွေးနွေးပွဲကြီးဆီကို အမြန်ဆုံး ရောက်ရှိအောင် ကြိုးစားသွားရအောင်လို့ ဆန္ဒပြုရင်း နိဂုံးချုပ်အပ်ပါတယ်။
Myanmar Peace Center
0 comments:
Post a Comment