IS သာ အနိုင်ရရှိသွားမည်ဆိုလျှင်...

ဖြစ်တန်ရာ တစ်ခုကို စဉ်းစားဖို့ အချိန်ကျနေပါပြီ။ အစ္စလာမ် နိုင်ငံတော် (IS) သာ အနိုင်ရရှိ သွားမည်ဆိုလျှင် ဘာတွေ ဆက်လုပ်မည်နည်း ဆိုသည့် မေးခွန်းဖြစ်သည်။

အနိုင်ရသည်ဟု ဆိုရာတွင် IS အဖွဲ့သည် ဘဂ္ဂဒက်မှ ရာဘတ်အထိ မွတ်ဆလင် ကမ္ဘာတစ်ခုလုံးကို ထိန်းချုပ်နိုင်ခြင်းဟု မဆိုလိုပါ။ IS ခေါင်းဆောင်များကတော့ မွတ်ဆလင် ကမ္ဘာတစ်ခုလုံးကို ထိန်းချုပ် နိုင်ရမည်ဟု ကြွေးကြော် ထားပြီးဖြစ်သည်။ ဒီလောက်ထိတော့ IS အနိုင်ရှိမည် မဟုတ်ပါ။ IS အောင်ပွဲခံသည် ဆိုရာတွင် အကြမ်းဖက်အဖွဲ့သည် လက်ရှိ ထိန်းချုပ်ထားသော နယ်မြေများတွင် တင်းကျပ်သော ရှားရီယား ဥပဒေများကို တိကျသေချာစွာ ကျင့်သုံးပြီး အဖွဲ့၏ တိုက်ခိုက်နိုင်စွမ်းကို အဆင့်ချကာ နောက်ဆုံးတွင် အမြစ်ပြတ် တိုက်ခိုက်မည်ဆိုသည့် အနောက်နိုင်ငံများ၏ ပြောစကားကို ဆက်လက်ကြံ့ကြံ့ခံနိုင်ခြင်း ကိုသာ ဆိုလိုပါသည်။ ယင်းကြောင့် ဒီနေရာတွင် မေးရမည့် မေးခွန်းမှာ အစ္စလာမ် နိုင်ငံတော်သာ တကယ့်နိုင်ငံ ဖြစ်လာပြီး သြဇာ အာဏာ ရှိလာလျှင် ဘာလုပ်မည်နည်း ဆိုသည့် မေးခွန်းသာဖြစ်ပါသည်။အီရတ် စစ်တပ်များ၏ ထိုးစစ်ဆင် တိုက်ခိုက်နိုင်စွမ်း မရှိခြင်းက IS အတွက် တကယ့် နိုင်ငံတော် တည်ထောင်နိုင်ခြေကို ပိုမိုများပြား စေခဲ့သည်။ မက်ဆာချူးဆက် နည်းပညာ တက္ကသိုလ်မှ ပညာရှင် ဘယ်ရီပိုဆန်က အီရတ်စစ်တပ်သည် တိုက်ခိုက် နိုင်စွမ်းရှိသည့် စစ်တပ် မဟုတ်တော့ကြောင်း ဝေဖန်ထားသည်။ အမေရိကန်က အီရတ်တပ်များ တိုက်ခိုက်နိုင်စွမ်း မြင့်မားလာရေး အတွက် အီရတ်သို့ အကြံပေးများ စေလွှတ် ခဲ့သည်။ လက်နက်များ အကူအညီပေးခဲ့သည်။ သို့သော် အီရတ်တပ်များ ကိုယ်နှိုက်က စစ်စိတ်စစ်မာန် မရှိခြင်းကြောင့် အမေရိကန်၏ အားထုတ်မှုများ သဲထဲရေသွန် ဖြစ်ခဲ့ရသည်။ နိုင်ငံခြားစစ်တပ်များ အလုံးအရင်းနှင့် ၀င်ရောက် တိုက်ခိုက်မှုမပြုမချင်း IS ကို အမြစ်ပြတ် နှိမ်နင်းနိုင်မည် မဟုတ်ဟု ယူဆစရာ ဖြစ်လာခဲ့သည်။ အမေရိကန် ပြည်ထောင်စုသည် သူတို့အတွက် အကျိုးအမြတ် များစွာမရှိဟု ထင်မြင်သည့် နိုင်ငံတစ်နိုင်ငံသို့ စစ်တပ်များကို စေလွှတ်မည် မဟုတ်သောကြောင့် အာရပ်နိုင်ငံများ ညီညွတ်စွာဖြင့် တပ်ပေါင်းစုကို စေလွှတ်မှသာလျှင် အီရတ်ရှိ IS ကို အမြစ်ပြတ် တိုက်ခိုက်နိုင် မည်ဖြစ်သည်။

အထင်တော် မလွဲကြပါနှင့်။ IS အဖွဲ့ အမြစ်ပြတ် ကျဆုံးသွားလျှင် အခြားသူများ နည်းတူ ကျွန်တော်လည်း ပျော်ရွှင်မိမှာ အမှန်ပင်။ သို့သော် ဖြစ်ချင်တာများ အတွက် စီမံရမည်ဖြစ်သလို ဖြစ်လာ နိုင်တာရှိသည် ကိုလည်း ကြိုတွက်ထားရပါမည်။

IS သည် သူတို့ သိမ်းပိုက်ထားသည့် နယ်မြေများကို ဆက်လက် သိမ်းပိုက်ထား နိုင်ပြီး တကယ့် နိုင်ငံတော် တည်ထောင်နိုင် ခဲ့ပါက ဘာတွေ ဆက်လုပ်ကြမလဲ။ အမေရိကန် ပြည်ထောင်စုသည် အယူအဆ မတူသလို ရန်လည်းလိုသည့် အခြားနိုင်ငံများကို ဆက်ဆံသလို IS ကိုလည်း ဆက်ဆံရမည်ဟု ပိုဆန်က အကြံပြုသည်။ ဘယ်လို ဆက်ဆံခဲ့ပါသလဲ။ အဲဒီ နိုင်ငံ သီးခြား တစ်နိုင်ငံတည်း ဖြစ်သွားသည်အထိ ၀န်းရံပိတ်ဆို့သည့် နည်းဖြစ်ပါသည်။ ယင်းအစီအစဉ်ကို လက်ခံသူများကြပါသည်။

IS သည် သွေးဆာနေသော အဖွဲ့ဖြစ်သည်။ ရက်စက် ကြမ်းကြုတ်သော နည်းလမ်းများကိုလည်း ကျင့်သုံးခဲ့သည်။ သို့သော် ဒီလောက်နှင့်တော့ သြဇာကြီးမားသော ကမ္ဘာလုံးဆိုင်ရာ အဖွဲ့ကြီး ဖြစ်လာစရာ မရှိပါ။ သူတို့၏ စည်းရုံးရေးစကားသံ များကို အခြားနိုင်ငံများရှိ အဖိနှိပ်ခံလူငယ် များကတော့ နှစ်သက်ကြသည်။ နှစ်သက် သည့်အတွက်လည်း IS ထံမှောက်သို့ ကမ္ဘာတစ်ဝန်းမှ လူငယ် (၂၅၀၀၀) ခန့်လာရောက် ခိုလှုံခဲ့ကြသည်။ သို့သော် လူဦးရေ (၇) ဘီလီယံရှိသည့် အထဲတွင် ယင်းလောက် ပမာဏလေးမှာ ပြောပလောက်အောင် မရှိပါ။ ယင်းလူငယ်လေးများ ကိုယ့်မြေကိုယ် ရေကို စွန့်ခွာပြီး IS ထံတွင် ခိုလှုံခဲ့သည့် အတွက် ဂျီဟတ်ဝါဒဖြင့် အုပ်ချုပ်မှုကို မျက်ဝါးထင်ထင် မြင်ခဲ့ရသည်။ သူတို့ထဲက တချို့သည် IS မှာ ရက်စက်ကြမ်းကြုတ်သည်၊ တရားမျှတမှု အတွက် ကိုးကွယ်ရာမဟုတ် ဟုလည်း ထင်မြင်သွား နိုင်သည်။ IS ကို ၀န်းရံ ပိတ်ဆို့ခြင်းကြောင့် အကြမ်းဖက်မှုလို လားသော လူငယ်များ ကိုယ့်မြေကိုယ့်ရေတွင် အကြမ်းဖက်မည့် အစား တစ်နေရာတည်းတွင်သာ ပိတ်မိကာ အကြမ်းဖက် ရတော့မည်ဖြစ်သည်။ ဒါကလည်း ကောင်းကွက်ဖြစ်သည်။

ပိုပြီး သေသေချာချာပြောရလျှင် IS အလံတော်အောက်တွင် တိုက်ပွဲဝင်နေသည့် နိုင်ငံခြားသား များမှာ မွတ်ဆလင် ကမ္ဘာရှိ လူဦးရေ၏ မဆိုစလောက် ပမာဏသာ ရှိပါသည်။ မွတ်ဆလင်ကမ္ဘာတွင် အစွန်းရောက် ဂျီဟတ်ဝါဒကို လက်မခံသူများစွာ ရှိနေပါသည်။

ဒါဖြင့်လျှင် IS ကို ထောက်ခံသူများသည် အခြားနေရာများတွင် အကြမ်းဖက်မှု များကို မလုပ်နိုင်ဘူးလား မေးစရာရှိနေပါသည်။ လုပ်နိုင်ပါသည်ဟု ဖြေရပါမည်။ အဖွဲ့မှာ သူတို့ ထိန်းချုပ်ထားသည့် နယ်မြေ များမှ ကျော်လွန်ပြီး အခြားနယ်မြေများ တွင် အကြမ်းဖက်မှုများ ကျူးလွန်ကာ အကြောက်တရား ဖြန့်ချိရန် ဆန္ဒရှိနေပါသည်။ သို့သော် ယခုအချိန် အထိတော့ အီရတ် အနောက်ပိုင်းနှင့် ဆီးရီးယားအရှေ့ ပိုင်းတို့မှ ကျော်လွန်ပြီး အကြမ်းဖက်မှုကြီး များကို လုပ်ဆောင်နိုင်စွမ်း မရှိသေးချေ။

ထို့ပြင် IS ၏နယ်မြေများသည် အရင်းအမြစ် နည်းပါးသော နယ်မြေများ ဖြစ်ကြပြီး စက်မှု ထွန်းကားမှုလည်း များစွာ မရှိကြချေ။ စစ်အင်အားမှာလည်း များစွာ ကောင်းမွန်ခြင်းမရှိချေ။ ဆွန်္နီများစွာ ရှိသော နယ်မြေမှ ထွက်လိုက်လျှင် IS သည် အင်အားကြီးမားသော ဆန့်ကျင်တိုက်ခိုက်မှု များနှင့် ကြုံရမည်ဖြစ်သည်။

IS အတွက် နောက်ထပ် အတားအဆီး တစ်ခုရှိနေပြန်သည်။ အံ့သြမှုများ ဖြစ်အောင် မဖန်တီးနိုင်ခြင်း ဖြစ်သည်။ အမေရိကန်၏ ကျူးကျော်မှုအလွန် အီရတ်နှင့် ဆီးရီးယားပြည်တွင်းစစ် တို့မှ IS မွေးဖွားလာခဲ့ ခြင်းဖြစ်သည်။ အစွန်းရောက် အစ္စလာမ် ၀ါဒကို လက်ခံထားသူများနှင့် အီရတ်ဘာ့သ် ၀ါဒီအစိုးရ အရာရှိဟောင်းများ ပေါင်းစပ်ပြီး ပေါ်ပေါက်လာ ခဲ့ခြင်းဖြစ်သည်။ ထူးခြားသော ပေါင်းစပ်မှုက အံ့သြစရာ ကောင်းအောင် ထိရောက်ခဲ့သည်။ ကံကောင်းသည်မှာ အီရတ်စစ်တပ်သည် စစ်စိတ်စစ်မာန် မရှိ ခြင်းနှင့် ယုံကြည်လို့ မရခြင်းဖြစ်သည်။ သို့သော် ယခုအချိန်တွင် IS ၏ ပြဿနာ ဖြစ်ပွားစေနိုင်စွမ်း အတိုင်းအတာကို အာရပ် နိုင်ငံများ သိရှိသွားကြပြီဖြစ်သည်။ ပါရှင်း ပင်လယ်ကွေ့မှ အီဂျစ်အထိ အာရပ်နိုင်ငံ များသည် သူတို့နိုင်ငံများတွင် IS ခြေကုပ် ယူလို့မရအောင် လုပ်ဆောင် နေကြပြီ ဖြစ်သည်။

ဒီနေရာတွင် တစ်ခုလောက် စိတ်ကူး ယဉ်ကြည့်ကြပါမည်။ IS ကို အထီးကျန် ဆန်သွားအောင် လုပ်နိုင်သော်လည်း အကြမ်းဖက်အဖွဲ့မှာ အစိုးရဆိုင်ရာ အဖွဲ့အစည်းများကို တည်ထောင်နိုင်သည် ဆိုကြပါစို့။ IS မှာ ယခုအချိန်တွင် နိုင်ငံတော်တစ်ခုကဲ့သို့ လုပ်ဆောင်နေပြီဖြစ်သည်။ အခွန် ကောက်ခံနေပြီ။ နယ်စပ်ကို စောင့်ကြည့် စစ်ဆေးနေပြီ။ လက်နက်ကိုင် တပ်များကို ဖွဲ့စည်းနေပြီ။ ဒေသခံအဖွဲ့ များကို စုစည်းနေပြီ။ အိမ်နီးချင်းတချို့ မှာလည်း IS ၏ တည်ရှိမှုကို အသိအမှတ် ပြုသည့်အနေနှင့် IS အတွက် အဓိကငွေရှာ ပေးနေသော ရှေးဟောင်းပစ္စည်း ခိုးထုတ်နေမှုများကို မမြင်ချင်ယောင်ဆောင် ထားပေးနေသည်။ တဖြည်းဖြည်းနှင့် နိုင်ငံများသည် IS ကို တရားဝင် အစိုးရအဖြစ် လက်ခံလာနိုင်သည်။

အနောက် အင်အားကြီး နိုင်ငံများ သည် ၁၉၁၇ခုနှစ် ဘော်ရှီဗစ်တော်လှန်ရေး ပြီးနောက်တွင် ဆိုဗီယက်ယူနီယံအား လက်မခံဘဲ နေခဲ့သည်။ အမေရိကန်ပြည် ထောင်စုသည် ၁၉၃၃ခုနှစ်အထိ ဆိုဗီယက် ယူနီယံကို လက်ခံခြင်းမပြုခဲ့။ ထိုနည်းတူပင် အမေရိကန် ပြည်ထောင်စုသည် ကမ္ဘာ့လူဦးရေ အများဆုံး နိုင်ငံကြီးဖြစ်သော တရုတ်ပြည်သူ့ သမ္မတနိုင်ငံနှင့် ၁၉၇၉ ခုနှစ်အထိ သံတမန် ဆက်သွယ်ရေးကို မထားရှိခဲ့သည်ကို သတိမူရမည်ဖြစ်သည်။ တရုတ်ပြည်သူ့ သမ္မတနိုင်ငံ တည်ထောင်ပြီး နှစ် (၃၀) ကြာမှသာ သံတမန် ဆက်ဆံရေး ထားရှိခဲ့ခြင်းဖြစ်သည်။ ယင်းအခြေအနေ များကို သုံးသပ်ကြည့်လျှင် အနောက်နိုင်ငံ များသည် အစောပိုင်းတွင် IS ကိုကြဉ်ထားမည်။ နောက်ပိုင်းတွင် တဖြည်းဖြည်းဖြင့် အသိအမှတ် ပြုလာဖွယ် ရှိနေသည်။

IS သည်အမျိုးသမီးများအား လိင်ကျွန် များအဖြစ် အသုံးချနေသည်။ အရပ်သား များကို နှိပ်စက်နေသည်။ ဓားစာခံများကို ခေါင်းဖြတ်သတ် နေသည်။ ယင်းလုပ်ရပ်များကြောင့် နိုင်ငံတကာ၏ ဖယ်ထုတ်ခံရ လိမ့်မည်ဟု ပြောကြ ပါလိမ့်မည်။ IS ခေါင်းဆောင်များ နိုင်ငံတကာ ရာဇ၀တ်ခုံရုံး တင်ခံရမည်ဟု ပြောဆိုမှုများ ရှိနေပြန်သည်။ စိတ်ကူးယဉ်ရ သည်မှာ အရသာ ရှိပါသည်။ သို့သော် သမိုင်းမှတ်တမ်းများက ဆန့်ကျင် ဘက်ကို ညွှန်းဆို နေပါသည်။

လွတ်လပ်မှုကို မြတ်နိုးပါသည်ဟု ယနေ့ခေတ် ဗြိတိန်နိုင်ငံသား များက ပြောဆိုနေပါသည်။ သုိ့သော် သူတို့၏ ဘိုးဘေးများသည် အကြမ်းဖက်သော နည်းလမ်းဖြင့် ညီညွတ်သော ဘုရင့်နိုင်ငံတော် သို့မဟုတ် ယူကေကို တည်ထောင်ခဲ့ ကြသည်ကို မမေ့အပ်ပါချေ။ ဝေလနယ်၊ စကော့ တလန်တို့နှင့် ပတ်သက်သော သမိုင်းကို သိကြသူများ ထောက်ခံကြ ပါလိမ့်မည်။ မြောက်အမေရိက တစ်လျှောက် လွတ်လပ်မှု စိတ်ဓာတ်ကို ဖြန့်ချိခဲ့သော အမေရိကန် ကြီးများမှာလည်း ထူးမခြားနားပေ။ အမေရိကန် ပြည်ထောင်စု တည်ထောင်နိုင်ဖို့ တိုင်းရင်းသား မျိုးနွယ်စုဝင် များစွာတို့၏ အသက်များ စတေးခဲ့ရသည်။ ဆိုဗီယက်ယူနီယံကို တည်ထောင်ခဲ့သော ဘော်ရှီဗစ်များ၊ တရုတ်ပြည်သူ့ သမ္မတနိုင်ငံကို တည်ထောင် ခဲ့သော မော်ဝါဒီများကိုလည်း မေးကြည့်ပါ။ ငြိမ်းချမ်းသော နည်းလမ်းဖြင့် ထည်ထောင် ခဲ့ကြပါသလား။ မဟုတ်ပါ။ လူပေါင်းများစွာ သွေးမြေကျ ခဲ့ရပါသည်။ နိုင်ငံတော် တည်ထောင်မှု ဆိုသည်မှာ ရက်စက်ကြမ်းကြုတ်သော ဖြစ်စဉ် တစ်ခုသာဖြစ်ကြောင်း ပညာရှင်များက ပြောခဲ့ကြပါသည်။

သို့သော် လက်ခံနိုင်သော နိုင်ငံတော် ဆိုသည့် စံနှုန်းမှာ လွန်ခဲ့သော ရာစုနှစ်တွင် အကြီးအကျယ် ပြောင်းလဲခဲ့သောကြောင့်သာ IS ၏လုပ်ရပ်ကို ရက်စက်ကြမ်းကြုတ်သည် ဟု ဆိုကြခြင်းဖြစ်သည်။ အတိတ်တွင် နိုင်ငံတော်ကို တည်ထောင်ခဲ့သူများ ရက်စက် ကြမ်းကြုတ်ခဲ့မှုကြောင့် အီရတ်နှင့် ဆီးရီးယားတို့ရှိ ဂျီဟတ်ဝါဒီများ၏ လုပ်ရပ်ကို ခွင့်လွှတ်ပေးသင့် သည်ဟု ပြောဆိုလို့မရပါ။

နိုင်ငံများ အသိုက်အ၀န်းတွင် လက်ခံခွင့် ရဖို့ဆိုလျှင် နိုင်ငံများသည် ရက်စက် ကြမ်းကြုတ်မှု တချို့ကို စွန့်လွှတ်ရပေလိမ့်မည်။ လွန်ခဲ့သော နှစ်ပေါင်း (၃၀) ကျော် အတွင်း အစွန်းရောက် နိုင်ငံတချို့သည် နိုင်ငံတကာ အသိုက်အ၀န်းတွင် ၀င်ဆံ့ရေးအတွက် သူတို့၏ အမူအကျင့်တချို့ကို စွန့်လွှတ်ခဲ့ရ ပါသည်။ အစွန်းရောက် အယူများ နှင့် အမူအကျင့်များသည် အကျိုးစီးပွားမရှိ စေသည်ကို ယင်းနိုင်ငံများ နားလည်သိရှိ သွားကြ သောကြောင့် ဖြစ်သည်။

သို့သော် နိုင်ငံတကာ အသိုက်အ၀န်းတွင်း ၀င်ဆံ့ခြင်းဆိုသည်မှာ နေ့ချင်းညချင်း ဖြစ်ပျက်သည့် ကိစ္စတစ်ခု မဟုတ်ပါ။ အခြားနိုင်ငံများက ၀ိုင်းဝန်းဖိအားပေးမှသာ အစွန်းရောက် နိုင်ငံများမှာသူတို့၏ လုပ်ရပ်ကို စွန့်လွှတ်ခဲ့ကြခြင်းဖြစ်သည်။ ယင်းကြောင့် IS အင်အားကြီးလာပြီး တရားဝင် အစိုးရ ဖြစ်မလာစေရေး အတွက် အမေရိကန်သည် ဆော်ဒီအာရေဗျ၊ ဂျော်ဒန်၊ တူရကီနှင့် အီရန်တို့အား စည်းရုံးကာ IS ကို အထီးကျန် သွားအောင် လုပ်ရန်သာ ရှိတော့သည်။

Ref: What Should We Do if the Islamic State Wins?:FP

Messenger News Journal