သရုပ်ဆောင် လောကကို ပြန်လည် ၀င်ရောက်လာတဲ့ ကျော်သူ (ဓာတ်ပုံ – ဂျေပိုင် / ဧရာဝတီ)
သရုပ်ဆောင်ဟောင်း တဦးလည်းဖြစ်၊ နာရေး ကူညီမှုအသင်း ဥက္ကဋ္ဌလည်း ဖြစ်တဲ့ ကိုကျော်သူဟာ သူ ပထမဆုံး ပြန်လည် ပါဝင် သရုပ်ဆောင်မယ့် ရုပ်ရှင်ဇာတ်ကားကို ပရော်ဖက်ဆာ ဒေါက်တာဆိတ်ဖွား ဇာတ်ကားနဲ့ စဖွင့်လိုက်ပါပြီ။လွန်ခဲ့တဲ့ တနှစ်လောက်က အင်တာနက် လူမှုကွန်ရက် စာမျက်နှာမှာ လွှတ်တော်ကို ပယ်ပယ်နယ်နယ် ဝေဖန်ပြောဆိုခဲ့လို့ လွှတ်တော်ထဲ အထိ တင်သွင်း ခုံရုံးဖွဲ့ စစ်ဆေးခဲ့ရတဲ့ ဒေါက်တာဆိတ်ဖွားကို သိထားခဲ့ကြတဲ့ လူမှုကွန်ရက် ပရိတ်သတ် ကြီးကတော့ ကိုကျော်သူ ဒေါက်တာဆိတ်ဖွား ဇာတ်ရုပ်ကို သရုပ်ဆောင်တော့မယ် ဆိုတာ ကြားလိုက်တာနဲ့ ရုတ်တရက် လှုပ်လှုပ်ရှားရှား ဖြစ်သွားခဲ့ပါတယ်။
ဒါပေမယ့် ကိုကျော်သူ ပါဝင်ရိုက်ကူးမယ့် ဒေါက်တာ ဆိတ်ဖွားကတော့ ကွယ်လွန်သူ စာရေးဆရာ မင်းသိင်္ခရဲ့ ဝတ္ထု ပရော်ဖက်ဆာ ဒေါက်တာ ဆိတ်ဖွား ပါ။ ကိုကျော်သူ ကတော့ သုဘရာဇာ ဇာတ်ရုပ်အဖြစ် သရုပ်ဆောင်မှာ ဖြစ်ပါတယ်။ ဒီဆိတ်ဖွားက မူလလက်ဟောင်း မူပိုင်ဆိတ်ဖွား ဖြစ်တယ်လို့ ကိုကျော်သူက ဆိုပါတယ်။ ဒီဇာတ်ကားဟာ လွှတ်တော်ကို ဝေဖန်တဲ့ ဆိတ်ဖွား မဟုတ်ပေမယ့်လည်း တချိန်က သို့လောသို့လော ဖြစ်ပြီး အဖျားရှူးသွားတဲ့ လွှတ်တော်ထဲရောက် ဆိတ်ဖွား အမှုကိုတော့ ပြန်လည် သတိရစေပါတယ်။
“ဒီဇာတ်ကားက ဒေါက်တာဆိတ်ဖွားက အသုဘ နာရေးတွေကို လုပ်ပေးနေတဲ့ သုဘရာဇာ ပေါ့။ ကျနော့် အတွက် သုဘရာဇာ ကာရိုက်တာ ဖြစ်တဲ့ အတွက် သရုပ်ဆောင်မှု အပိုင်းမှာ ခက်ခဲတာ သိပ်ထွေထွေထူးထူး မရှိဘူး။ ဇာတ်ကားမှာ ညီအကိုဟောင်းတွေ ဖြစ်တဲ့ ရန်လေးတို့၊ ရဲအောင်တို့၊ မင်းဦးတို့နဲ့ ပြန်တွေ့တော့ စိတ်ထဲမှာ ကြည်နူးမှု လေးတော့ ဖြစ်မိတယ်။ ဒီဇာတ်ကားကို ပြန်ရိုက်ဖြစ်တာက ကာရိုက်တာ ကြောင့်ရော ကျော်သူ ရုပ်ရှင်ပြန်ရိုက်ပါ လို့ တောင်းဆိုတဲ့ သူတွေ ရှိတယ်။ နောက် ဒီဘက်ခေတ်က လူငယ်တွေ ကျော်သူဆိုတာ ဘာမှန်းမသိတဲ့ လူငယ်တွေ အတွက် ကျော်သူ ဆိုတာ ဘာမှန်းသိအောင် ပြန်ပြီး သရုပ်ဆောင်တာ။
ဒီဇာတ်ကားက ဖျော်ဖြေရေးကား သက်သက် မဟုတ်ဘူး။ စကားလုံး တွေက ဒဿနတွေ၊ ဖလော်တွေ ပါတဲ့ အကျိုးရှိတဲ့ ကားဖြစ်တယ်။ ဒီခေတ်နဲ့လည်း အံဝင်တဲ့ အတွက် ကျနော် လက်ခံ လိုက်တာပါ။ ကျနော် ဆရာကြီးရဲ့ ဝတ္တုတွေကို ပြန်ရိုက်ခဲ့တာ တော်တော်များတယ်” လို့ ကိုကျော်သူက ဧရာဝတီကို ပြောပါတယ်။
ကိုကျော်သူဟာ ၂၀၀၇ ခုနှစ်ကစပြီး သရုပ်ဆောင်အလုပ်ကို ရပ်နားခဲ့တာ ၈ နှစ်ကြာတဲ့ အချိန် အခု ၂၀၁၅ ကျမှ ပြန်လည် သရုပ်ဆောင်တာ ဖြစ်ပါတယ်။ သူ့အနေနဲ့ ဆရာကြီး မင်းသိင်္ခကို လေးစားတဲ့အတွက် ဆရာကြီးကို ဂုဏ်ပြုတဲ့ အနေနဲ့ သူ့ရဲ့ ဝတ္ထုကို ရိုက်ကူးတဲ့ ရုပ်ရှင်မှာ ပါဝင် သရုပ်ဆောင်ခဲ့တာ လို့ ဆက်ပြောပါတယ်။
“ဒီခေတ် ရဲတွေတော့ မဟုတ်ဘူးပေါ့၊ အင်္ဂလိပ်ခေတ်က ရဲတွေရဲ့ ဖိနှိပ်မှုကို ဒီဇာတ်ကားမှာ တွေ့ရမယ်။ ဒီဇာတ်ကားမှာ ပြောတဲ့ စကားလုံးတိုင်းက အဓိပ္ပာယ် ရှိတယ်။ လူတွေက သုဘရာဇာဆို နှာခေါင်းရှုံ့ချင် ကြတယ်၊ ကိုယ်လည်း တနေ့ သေမှာပဲ ကို။ ဆိတ်ဖွားကြီးက အခက်အခဲ ဖြစ်လို့ ရဲတွေကို အကူအညီ တောင်းတော့ ရဲတွေက မကူညီဘူး၊ အဲဒီတော့ ဆိတ်ဖွားကြီးက ရဲတွေကို သရော်တဲ့ စကားလုံးတွေက အရမ်း အဓိပ္ပာယ်ရှိတယ်။ မင်းတို့ ဒီအပွင့်တွေ တပ်ထားပြီး ဒါလေးတောင် မလုပ်နိုင်ရင် ဒါတွေ တပ်မနေနဲ့ ဆိုတာမျိုးပေါ့” လို့ ကိုကျော်သူက ပြောပြပါတယ်။
ဒီဇာတ်လမ်းကို စာရေးဆရာ မင်းသိင်္ခရဲ့ ဆားပုလင်းနှင်းမောင် ဇာတ်ကားတွေ အမြဲ ရိုက်ကူးလေ့ ရှိတဲ့ ဒါရိုက်တာ ခင်စောမျိုးကပဲ ရိုက်ကူး ပုံဖော်မှာ ဖြစ်ပြီး ဒေါက်တာဆိတ်ဖွားအဖြစ် ကျော်သူ၊ လူမိုက်ကြီး မိုးသီး နေရာမှာ ရဲအောင်၊ သူတောင်းစား အဖြစ် ဟန်ဆောင်သူ အင်စပတ်တာ အရာရှိအဖြစ် ရန်အောင်၊ သူခိုး သေတ္တာ အဖြစ် မင်းဦး တို့က ပါဝင် သရုပ်ဆောင်ကြမှာ ဖြစ်ပါတယ်။ သရုပ်ဆောင် မင်းသမီးတွေ အဖြစ်တော့ စံရတီမိုးမြင့်၊ မေမြတ်နိုးနဲ့ ရွှေပန်းချီတို့က ပါဝင်ကြမှာပါ။ ဆားပုလင်းနှင်းမောင်နေရာမှာတော့ အရင်ဇာတ်ကားတွေမှာ ဆားပုလင်းနှင်းမောင် အဖြစ် အမြဲတမ်း ပါဝင်သရုပ်ဆောင်လေ့ရှိသူ ထွန်းလွင်အောင်ကပဲ ပါဝင်သရုပ်ဆောင်မှာ ဖြစ်ပါတယ်။
“ဒီကားက အရင်ကားတွေထက် စာရင် ပိုပြီးသွက်လာမယ်။ အရင် သုံးနာရီကားကို နှစ်နာရီနဲ့ လုပ်ဖြစ်မယ်။ အရင်ကားမှာ ပိုနေတာ တွေကို ဖြုတ်မယ်၊ လိုနေတာတွေ ထပ်ထည့်မယ်။ သရုပ်ဆောင်ပိုင်းမှာလည်း ဒီကားနဲ့ လိုက်ဖက်ပြီး သရုပ် ဆောင်နိုင်မယ့် မင်းသားကြီးတွေကို ပြန်ရွေးချယ်ထားတာ ပါပဲ။ ဒီကားမှာ ကိုကျော်သူနဲ့ ပြန်လက်တွဲပြီး ရိုက်ရတဲ့ အတွက် ပျော်တယ်။ ဘာဖြစ်လို့လည်းဆိုတော့ ကျော်သူနဲ့ ကျနော် တွဲပြီး ရိုက်ခဲ့တဲ့ ကားတိုင်းက အောင်မြင်ခဲ့တာကိုး။ သူ ဇာတ်ကား မရိုက်တာလည်း ကြာပြီ၊ အခု ဒီကားရိုက်မယ် ဆိုတော့ သူလည်း ၀မ်းပန်းတသာ လက်ခံတာပဲ။ ဒီဇာတ်ကားက ပရိသတ် နှစ်သက်ကြမယ့် ဇာတ်ကားဖြစ်လာမှာပါ။ ဆိတ်ဖွားကြီးရဲ့ သြဝါဒတွေကို ပရိသတ်ကြီး နှစ်သက်ကြမှာပါ” လို့ ဒါရိုက်တာ ခင်စောမျိုးက ပြောပြခဲ့ပါတယ်။
ဒီ ရုပ်ရှင်ဇာတ်ကားကြီးကို မတ်လ ၁၈ ရက်နေ့ကစပြီး ရန်ကုန် မြရိပ်ညိုဟိုတယ်မှာ ရိုက်ကူးနေပါပြီ။ စာနယ်ဇင်း ရှင်းလင်းပွဲက ပုံတွေ၊ ရိုက်ကွင်းမှာ သရုပ်ဆောင်တွေ ဇာတ်ရုပ်အလိုက် ဝတ်စားဆင်ယင်ထားတဲ့ ပုံတွေကတော့ လူမှုကွန်ရက် စာမျက်နှာထက်မှာ စိတ်ဝင်းစားမှု ရရှိနေပါတယ်။
ပရော်ဖက်ဆာ ဒေါက်တာဆိတ်ဖွား ရုပ်ရှင်ဇာတ်ကားကို လပ်ကီးဆဲဗင်း ရုပ်ရှင်ထုတ်လုပ်ရေးက ထုတ်လုပ်တာ ဖြစ်ပြီး ဒီနှစ် နိုဝင်ဘာ (သို့မဟုတ်) ဒီဇင်ဘာလတွေမှာ ရုံတင်မယ် လို့ သိရပါတယ်။ ။
ဧရာဝတီ
0 comments:
Post a Comment