“ခရိုနီ”ဟု လက်ညိုးထိုးနေခြင်းကို မကြိုက်ဟု ဒေါ်အောင်ဆန်းစုကြည် ပြော

နိုင်ငံ ဖွံ့ဖြိုးရေး အားလုံးက ညီညီညွှတ်ညွှတ် လက်တွဲ အလုပ်လုပ်ရန် လိုအပ်သဖြင့် “ခရိုနီ၊ ခရိုနီ”ဟု လက်ညိုးထိုးနေခြင်းကို မကြိုက်ဘဲ မည်သည့်အချိန်မဆို ပြုပြင်ပြောင်းလဲရန် အခွင့်အရေး ရှိကြောင်း နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောသည်။

သြဂုတ်လ ၂၇ ရက်နေ့က နေပြည်တော်၊ MICC – 1 တွင် ကျင်းပ ပြုလုပ်ခဲ့သည့် နိုင်ငံတော်၏ အတိုင်ပင်ခံပုဂ္ဂိုလ်နှင့် စီးပွားရေး လုပ်ငန်းရှင်များ တွေ့ဆုံပွဲတွင် ၎င်းက အထက်ပါအတိုင်း ပြောကြားခဲ့ခြင်း ဖြစ်သည်။

ဒေါ်အောင်ဆန်းစုကြည်က“ကျမရှေ့တည့်တည့်မှာ ထိုင်နေတဲ့ တချို့ စီးပွားရေး လုပ်ငန်းရှင်တွေက ခရိုနီဆိုတဲ့ စကားကိုကြားကို မ ကြားချင်ပါဘူး။ ဒါပေမယ့် မပြောမဖြစ်လို့ ပြောလိုက်ရဦးမယ်။ ခရိုနီ၊ ခရိုနီဆိုပြီးတော့ လက်ညိုးထိုးတာတွေ ရှိပါတယ်။ ကျမ ဒီလိုဟာ မျိုးကို မကြိုက်ပါဘူး။ ဖြစ်ပြီးတာတွေက ဖြစ်ပြီးပြီပေါ့နော်။ နောက်ပြီးတော့လည်း ဘယ်တော့မဆို ပြုပြင်ပြောင်းလဲဖို့ အခွင့်အရေးတွေ ဆိုတာ ရှိပါတယ်”ဟု ပြောသည်။

နိုင်ငံဖွံဖြိုးတိုးတက်ရေး လက်တွဲ အလုပ်လုပ်ရာတွင် ခရိုနီများ၊ ခရိုဝါများဟု အရောင်မျိုးစုံ တွဲပြီး ပြောနေစရာ မလိုဘဲ ယခု အချိန်တွင် ရှေ့ဆက် အလုပ်လုပ်နိုင်ရန် တဦးနှင့်တဦး ယုံယုံကြည်ကြည်ဖြင့် သစ္စာစောင့်သိရန် လိုကြောင်း၊ ယင်းသို့ သစ္စာစောင့်သိခြင်းမှာ နိုင်ငံအပေါ်တွင် သစ္စာစောင့်သိခြင်း ဖြစ်ကြောင်း ဒေါ်အောင်ဆန်းစုကြည်က ဆိုသည်။

ယခင်ခေတ်အဆက်ဆက်က အာဏာရှင်သူများနှင့် ပူးပေါင်းကာ စီးပွားရေး အခွင့်အလမ်းများစွာကို မျှတစွာ ယှဉ်ပြိုင်ခြင်း မရှိဘဲ ရ ယူခဲ့ကြပြီးနောက် အလွန် ကြီးပွားချမ်းသာသွားကြသူများကို အခွင့်ထူးခံအဖြစ် “ခရိုနီ”ဟု ပြည်သူလူထုက ကင်ပွန်းတပ်ခဲ့ကြခြင်း ဖြစ် သည်ဟု ရန်ကုန်မြို့မှ တရားလွှတ်တော် ရှေ့နေ ဦးကြီးမြင့်က ပြောသည်။

“စီးပွားရေးမှာ အခွင့်ထူးခံနေတဲ့သူတွေကို ခရိုနီလို့ ပြည်သူလူထုက သတ်မှတ်လိုက်တဲ့ နာမည် ဖြစ်တယ်။ ပြည်သူထက် ဘယ်သူမှ မကြီးဘူး။ သူတို့ရင်ထဲမှာ တိုက်ကွန်းတွေ ဘာတွေလည်း မရှိဘူး။ ပြည်သူ့ရဲ့ ဆုံးဖြတ်ချက်ကို ဒေါ်အောင်ဆန်းစုကြည်သော်လည်း ကောင်း သူ့ထက်ကြီးတဲ့သူကသော်လည်းကောင်း ပယ်ဖျက်မယ်ဆိုရင် ပြည်သူ့အသံနဲ့ မကိုက်ညီဘူး”ဟု ၎င်းက ဆိုသည်။

ခရိုနီဆိုသည့် စကားလုံးကို သုံးနှုန်းခြင်းသည် နိုင်ငံတော်အပေါ်တွင် စေတနာထားသူများ၏ စိတ်ဓာတ် မဖြစ်ကြောင်း၊ လူတဦး၊ တယောက် ကြီးပွားချမ်းသာသွားခြင်းကို မခံချင်ဖြစ်ကြခြင်း ဖြစ်ကြောင်း၊ စီးပွားရေး လုပ်ငန်းရှင်များ မည်သည့် အစိုးရနှင့် မဆို ပူးပေါင်း လုပ်ဆောင်ရမည်သာ ဖြစ်ကြောင်း တော်ဝင် ဆောက်လုပ်ရေး ကုမ္ပဏီ ဥက္ကဋ္ဌ ဦးကိုကိုထွေးက ပြောသည်။

ဦးကိုကိုထွေးက“စဉ်းစားကြည့်ရင် နာဂစ်တုန်းက အဲဒီခရိုနီတွေချည်းပဲ ကတောင်းကျိုက်ပြီး မိုးထဲရေထဲမှာ သက်စွန့်စံဖျား သွား ပြီးတော့ ငွေတွေ အလုံး အရင်း ထုတ်ပြီး ကယ်လာခဲ့ကြတာ။ ဒီနေ့ ရေကြီးရင်လည်း ဒီလူတွေပဲ။ မီးလောင်ရင်လည်း ဒီလူတွေ ပဲ။ ကျောင်းဆောက်မယ်၊ လမ်းပြင်မယ်၊ ဆေးရုံလှူမယ်။ နောက်ဆုံး သွေးလှူတာကအစ ဒီလူတွေပဲ လုပ်နေကြတာပါ”ဟု ပြောသည်။

ခရိုနီဆိုသည့် စကားလုံးကို ရှောင်ရန် ပြောနေရခြင်းမှာ တချိန်က ဘူဇွာဆိုသည့် စကားကို သုံးပြီး ဖယ်ရှားရန် ကြိုးစားခဲ့၍ နိုင်ငံ၏ စီးပွားရေး ပျက်ခဲ့ရကြောင်း၊ ယခုလည်း ခရိုနီကို မဖယ်ထားသင့်ဘဲ လက်တွဲဆောင်ရွက်ရန် လိုကြောင်း ၎င်းက ဆက်လက် ပြော ဆိုသည်။

တချို့စီးပွားရေးသမားများသည် NLD အစိုးကို မအောင်မြင်စေချင်ကြောင်း၊ ထို့ကြောင့် ယခုလို စိတ်ထားမျိုး မထားသင့်ဘဲ အစိုး ရအောင်မြင်အောင် ဆောင်ရွက်နေခြင်း မဟုတ်ဘဲ နိုင်ငံအောင်မြင်အောင်သာ ဆောင်ရွက်နေခြင်း ဖြစ်ကြောင်း၊ အစိုးရကလည်း အတိတ်ကို ကြည့်၍ မည်သူ့ကိုမျှ အညိုးအတေးဖြင့် ဆက်ဆံလိုစိတ် မရှိကြောင်း ဒေါ်အောင်ဆန်းစုကြည်က မနေ့က တွေ့ဆုံပွဲတွင် ပြောသည်။

“ကျမတို့ အစိုးရဟာ ဘယ်စီးပွားရေးလုပ်ငန်းရှင်ကိုမှ အတိတ်က ကိစ္စတွေနဲ့တွဲကြည့်ပြီးတော့ သုံးသပ်တာ မရှိပါဘူး။ အတိတ်က အတိတ်ပဲ၊ ပစ္စုပ္ပန်က အရေးအကြီးဆုံးပဲ။ အခု ပစ္စုပ္ပန်မှာ ဘယ်လိုလုပ်နေကြတယ်၊ ဘယ်ကို ဦးတည်နေကြတယ်၊ နိုင်ငံ တိုးတက် ရေးအတွက် ဘာတွေထောက်ပံ့နေကြသလဲ၊ အဲဒါကို အဓိက ကြည့်တာဖြစ်ပါတယ်”ဟု ၎င်းက ပြောသည်။

မနေ့က နေပြည်တော်တွင် ပြုလုပ်ခဲ့သည့် တွေ့ဆုံပွဲတွင် တနိုင်ငံလုံးမှ စီးပွားလုပ်ငန်းရှင် ၂၀၀ ကျော် တက်ရောက်ခဲ့ကြပြီး အခွန် ထမ်းဆောင်မှု အများဆုံးသူများ၊ UEHRD အလှူရှင်များကို အတိုင်ပင်ခံပုဂ္ဂိုလ်က သီးသန့် တွေ့ဆုံခွင့် ပြုခဲ့သေးသည်။ ကျန်သူများမှာ စီးပွားရေးဌာနဆိုင်ရာများမှ ဝန်ကြီးများ၊ ဒုဝန်ကြီးများ၊ ဗဟိုဘဏ် ဥက္ကဋ္ဌတို့နှင့် တွေ့ဆုံခဲ့ကြသည်။

ဒေါ်အောင်ဆန်းစုကြည်နှင့် တွေ့ဆုံခွင့် ရရှိသူများမှာ Asia World ကုမ္ပဏီ ဥက္ကဋ္ဌ ဦးထွန်းမြင့်နိုင်၊ ရွှေသံလွင် ကုမ္ပဏီ ဥက္ကဌ ဦးကျော်ဝင်း၊ Bone Kyaw San ကုမ္ပဏီ ဥက္ကဋ္ဌ ဦးအောင်ကျော်ဆန်း၊ သမဝါယမဘဏ် ဥက္ကဋ္ဌ ဦးခင်မောင်အေး၊ KBZ အုပ်စုမှ ဒေါ်နန်းခမ်းနောင်၊ Diamond Star ကုမ္ပဏီမှ ဒေါက်တာ ကိုကိုကြီး၊ မက်စ် ကုမ္ပဏီ ဥက္ကဋ္ဌ ဦးဇော်ဇော်၊ UAB ဘဏ် ဥက္ကဋ္ဌ ဦးနေအောင်၊ MEC မှ ဦးသန်းဝင်းနှင့် City Mart မှ ဒေါ်ဝင်းဝင်းတင့်တို့ ဖြစ်သည်။

ဧရာဝတီ