နေပြည်တော် သင်္ဂဟဟိုတယ်၌ ဇွန် ၅ ရက်က ပြုလုပ်သည့် ၂၀၁၈ ခုနှစ် ကမ္ဘာ့ပတ်ဝန်းကျင် ထိန်းသိမ်းရေးနေ့ အထိမ်းအမှတ် အခမ်းအနား၌ နိုင်ငံတော်သမ္မတ ဦးဝင်းမြင့်က အဖွင့်မိန့်ခွန်း ပြောကြားရာတွင် အထက်ပါကဲ့သို့ ထည့်သွင်းပြောကြား ခဲ့ခြင်းဖြစ်သည်။
နိုင်ငံတော်သမ္မတက “ပြည်တွင်းက ပလတ်စတစ် စွန့်ပစ်ပစ္စည်း အပါအ၀င် စွန့်ပစ်ပစ္စည်းများကို လျှော့ချဖို့၊ တတ်နိုင်သမျှ ပြန်လည်ပြုပြင် သုံးစွဲနိုင်ဖို့နဲ့ စွန့်ပစ်ပစ္စည်းများကို ပြန်လည်ပြုပြင် ထုတ်လုပ်နိုင်ဖို့အတွက် ပြည်တွင်းရှိ အသေးစား၊ အလတ်စား လုပ်ငန်းတွေကိုလည်း အားပေးဆောင်ရွက် သွားကြရမှာဖြစ်ပြီး နိုင်ငံသူ နိုင်ငံသားတွေအတွက် ပတ်ဝန်းကျင်ဆိုင်ရာနဲ့ လူမှုစီးပွားဆိုင်ရာ အကျိုးရလဒ်ကောင်းများ ချက်ချင်းရှိလာမှာ ဖြစ်ပါတယ်။ တစ်ချိန်တည်းမှာပဲ မိမိနိုင်ငံအတွင်း ပြည်ပနိုင်ငံများမှ စွန့်ပစ်ပစ္စည်းများ တင်သွင်းစုပုံလာမှု မရှိစေရေးကိုလည်း အမြဲအလေးဂရုပြုပြီး စီစဉ်ဆောင်ရွက်သွားဖို့ လိုအပ်ပါတယ်” ဟုပြောကြားသည်။
စွန့်ပစ်ပစ္စည်းများ စုဆောင်း၊ စွန့်ပစ်ခြင်းကို မှန်ကန်ထိရောက်သည့် နည်းလမ်းများနှင့် စနစ်တကျ ဆောင်ရွက်ရမည်ဖြစ်ပြီး နိုင်ငံတော်အစိုးရ အနေဖြင့် သက်ဆိုင်ရာ ဥပဒေ၊ နည်းဥပဒေနှင့် လုပ်ထုံးလုပ်နည်းများအား ပြန်လည်ပြင်ဆင် ရေးဆွဲရမည်ဖြစ်ကြောင်း သမ္မတက ပြောကြားသည်။
၎င်းက “မြန်မာနိုင်ငံအနေနဲ့ ပလတ်စတစ် ပစ္စည်းများအစား ပြန်လည်အသုံးပြုနိုင်တဲ့ အရင်းအမြစ်များကို သုံးစွဲခဲ့ကြတဲ့ အလေ့အထကောင်းများ ရှိနေဆဲ ဖြစ်ပါတယ်။ သိသာထင်ရှားတဲ့ ဥပမာအနေနဲ့ ပြောရမယ်ဆိုရင် သောက်ရေကို မြေအိုးထဲ ထည့်သုံးခြင်း၊ ဈေးဝယ်ရာမှာ ကြိမ်ခြင်းကို အသုံးပြုခြင်းနဲ့ ဖက်ရွက်များကို အသုံးပြု ထုပ်ပိုးခြင်း၊ မြန်မာ့လက်မှုပညာနဲ့ ပြုလုပ်ထားတဲ့ ကြိမ်ကုလားထိုင်၊ ၀ါးကုလားထိုင် စတဲ့အသုံးအဆောင် ပစ္စည်းတွေကို အသုံးပြုခြင်းတို့ ဖြစ်ပါတယ်။ ဒါကြောင့်မို့ နိုင်ငံသူ နိုင်ငံသားတိုင်းအနေနဲ့ အဲဒီလိုဓလေ့ထုံးစံ အလေ့အကျင့်ကောင်းများကို ဆက်လက် ကျင့်သုံးခြင်းဟာလည်း ကျွန်တော်တို့ရဲ့ ဆက်လက်ဆောင်ရွက်သွားမယ့် ပလတ်စတစ်သုံးစွဲမှု လျှော့ချခြင်း လုပ်ငန်းတွေကို များစွာအထောက်အကူ ဖြစ်စေမှာ ဖြစ်ပါတယ်” ဟု ပြောကြားသည်။
ကမ္ဘာပေါ်တွင် ပလတ်စတစ်အိတ် ဘီလျံ ၅၀၀ ခန့် နှစ်စဉ်အသုံးပြုလျက်ရှိပြီး ရာခိုင်နှုန်း ၅၀ ခန့်သည် တစ်ခါသုံး ပလတ်စတစ်အိတ်များ ဖြစ်ကြောင်း ကုလသမဂ္ဂ ပတ်ဝန်းကျင် အစီအစဉ်၏ လေ့လာဆန်းစစ် တွေ့ရှိမှုအရ သိရသည်။
လက်ရှိမြန်မာနိုင်ငံတွင် အမျိုးသားအဆင့် စွန့်ပစ်ပစ္စည်း စီမံခန့်ခွဲမှု မဟာဗျူဟာအပေါ် အခြေခံပြီး မန္တလေးမြို့တော်အား အနာဂတ် မျိုးဆက်များအတွက် စိမ်းလန်းစိုပြည်ပြီး သန့်ရှင်းလှပသည့် မြို့တော်ဖြစ်ရေးကို ရေရှည်မျှော်မှန်းပြီး မန္တလေးမြို့တော် စွန့်ပစ်ပစ္စည်း စီမံခန့်ခွဲမှု မဟာဗျူဟာနှင့် လုပ်ငန်းစဉ် စီမံချက် ၂၀၁၇-၂၀၃၀ ကို ၂၀၁၇ ခုနှစ် ဒီဇင်ဘာတွင် ရေးဆွဲထုတ်ပြန်ခဲ့ပြီး စတင်အကောင်အထည်ဖော် ဆောင်ရွက်လျက်ရှိကြောင်း သိရသည်။
နေရိုင်း၊ ဇေယျာထွန်း
Eleven Media Group
0 comments:
Post a Comment