ကယားပြည်နယ် မြို့တော်ခန်းမအနီးကပန်းခြံမှာ ဗိုလ်ချုပ်အောင်ဆန်းရုပ်ထု ထားမယ့်ကိစ္စနဲ့ပတ်သက်ပြီး ပြည်နယ်မှာရှိတဲ့ ကယားအရပ်ဘက်အဖွဲ့အစည်းတွေက ကန့်ကွက်ကြောင်း ပြည်နယ်အစိုးရကိုတုံ့ပြန်ကြပါတယ်။
ဇူလိုင် ၁၉ ရက်နေ့မတိုင်ခင် ကယားပြည်နယ်လွိုင်ကော်မြို့နယ် မြို့တော်ခန်းမနံဘေးပန်းခြံမှာစိုက်ထူမယ်လို့ အတည်ပြုလို့မရတဲ့သတင်းတွေထွက်ပေါ်နေတဲ့ အထက်ပါကိစ္စနဲ့ပတ်သက်ပြီး ကယားပြည်နယ်အတွင်းမှာရှိတဲ့ အသင်းအဖွဲ့ ၇ ဖွဲ့က ကန့်ကွက်နေကြတာလည်းဖြစ်ပါတယ်။
ကန့်ကွက်ရတဲ့အကြောင်းအရင်းနဲ့ပတ်သက်ပြီး ကရင်နီပြည်လူငယ်များသမဂ္ဂ အထွေထွေအတွင်းရေးမှူး ခွန်းဘားနဒ် က "ပြည်နယ်မှာက ကိုယ့်အမျိုးသားလက္ခဏာပေါ်နိုင်တဲ့ သင်္ကေတတွေရှိတယ်။
အမျိုးသားခေါင်းဆောင်တွေရှိတယ်။ သူတို့ ပုံတွေ မှတ်တိုင်တွေတောင်မလုပ်သေးဘူး။ ဗိုလ်ချုပ်ရုပ်ထုလုပ်တာထက်စာရင် ဗိုလ်ချုပ်ကတိပေးခဲ့တဲ့ကိစ္စတွေအကောင်အထည်ဖော်စေချင်တာပေါ့နော်။
ပြီးတော့ ဒီကိစ္စဟာ အစိုးရတစ်ရပ်တည်း ဆုံးဖြတ်တဲ့ကိစ္စဆိုတာတော့ သိပ်မဟုတ်သေးဘူးပေါ့နော်။ လူထုကို အသိပေးချပြတာတွေမရှိဘူး" လို့ ပေါ်ပြူလာနယူးစ်ကိုပြောပါတယ်။
အခုကန့်ကွက်တဲ့အဖွဲ့အစည်းတွေကတော့ ကရင်နီပြည်လူငယ်များသမဂ္ဂ၊ ကရင်နီပြည်တောင်သူလယ်သမားသမဂ္ဂ၊ ကယောလူငယ်၊ ကယားလီဖူးလူငယ်၊ ကော်ယော်(မနူမနော)လူငယ်၊ ကရင်နီပြည်လူမျိုးပေါင်းစုံပြည်သူ့လွှတ်မြောက်ရေးတပ်ဦး(လူငယ်)၊ မျိုးဆက်သစ်ကရင်လူငယ်(ကရင်နီပြည်) စတဲ့အဖွဲ့အစည်းတွေဖြစ်ပါတယ်။
လွိုင်ကော်မြို့နယ်မှာ စိုက်ထူမယ့် အဆိုပါ ဗိုလ်ချုပ်ရုပ်ထုကိစ္စကို ကယားပြည်နယ်လွှတ်တော်တော်မသိရှိရသေးဘူးဆိုတဲ့ သတင်းတွေဟာ ပြီးခဲ့တဲ့ရက်ပိုင်းကပဲ ကယားပြည်နယ်အခြေစိုက်သတင်းစာမျက်နှာတွေမှာ ပျံ့နှံ့ခဲ့ပါသေးတယ်။
ကယားပြည်နယ်လွှတ်တော် ကိုယ်စားလှယ် တစ်ဦးဖြစ်သူ ဦးအောင်နိုင်ဦးကတော့ ယခင်ကာလတုန်းက ဒီကိစ္စနဲ့ပတ်သက်ပြီးဆွေးနွေးခဲ့တာရှိခဲ့တဲ့အတွက် မသိရှိတာတော့မဟုတ်ဘူးလို့ ပြန်လည်ဖြေရှင်းပြောဆိုပါတယ်။
ကန့်ကွက်နေတဲ့ ကယားပြည်နယ်အရပ်ဘက်အဖွဲ့အစည်းတွေဟာ ကန့်ကွက်ကြောင်း စာကိုလည်းကယားပြည်နယ်အစိုးရအဖွဲ့ထံ ယမန်နေ့ကပေးပို့ခဲ့ပါသေးတယ်။
အဲ့ဒီစာအထဲမှာတော့ တစ်ကယ်လို့ အစိုးရက ဗိုလ်ချုပ်အောင်ဆန်းကြေးရုပ်ထုကို ဇွတ်အတင်းထားမယ်ဆိုရင် ပြင်းထန်တဲ့လူထုလှုပ်ရှားမှုနဲ့ကြုံတွေ့ရမှာဖြစ်ပြီး လက်ရှိအစိုးရကို ပြည်သူတွေက ဆန့်ကျင်မှုပိုမိုဖြစ်လာနိုင်တယ်လို့လည်း ခြိမ်းခြောက်ဖော်ပြထားပါတယ်။
ဗိုလ်ချုပ်အောင်ဆန်းကြေးရုပ်ထု ကိစ္စနဲ့ပတ်သက်ပြီး ကယားပြည်နယ်အစိုးရအဖွဲ့ရဲ့ သတင်းထုတ်ပြန်ချက်တွေမှာတော့ တစ်စုံတစ်ရာထည့်သွင်းဖော်ပြလာတာမျိုးမတွေ့ရှိရသေးပါဘူး။
ပြည်နယ်အစိုးရအဖွဲ့ လူမှုရေးဝန်ကြီး ဒေါက်တာအောင်ကျော်ဌေး ကို ပေါ်ပြူလာနယူးစ်က ဆက်သွယ်မေးမြန်းခဲ့ပေမယ့် အစည်းအဝေးခန်းထဲရောက်နေလို့ နောက်မှသာမေးမြန်းဖို့ပြောခဲ့ပါတယ်။
Popular News Journal
0 comments:
Post a Comment