တိုင်းရင်းသားလက်နက်ကိုင်အဖွဲ့တစ်ဖွဲ့ဖြစ်တဲ့ UWSA ''ဝ'' တပ်ဖွဲ့ရဲ့ အဓိကရည်ရွယ်ချက်သည်လည်း သီးခြားပြည်နယ် အဖြစ် ခွဲထွက်ဖို့သာဖြစ်ကြောင်း တွေ့ရှိရပါသည်။ ''ဝ'' တိုင်းရင်းသားတို့ လက်နက်စွဲကိုင်ခဲ့ခြင်း၏ သမိုင်းကြောင်းကို လေ့လာကြည့်ပါက ဗကပ၏ ပယောဂကြောင့်ဖြစ်ကြောင်း တွေ့ရှိရပါသည်။ ဗကပများသည် စတင်တောခိုချိန်မြို့ သိမ်းတိုက်ပွဲများမှ အပြီးသတ်အာဏာသိမ်းရေးအတွက် မြန်မာနိုင်ငံအနှံ့အပြားကို တိုက်ခိုက်ခဲ့ကြပါသည်။ ပဲခူးရိုးမရှိ ဗကပ ဗဟိုသည် စစ်ရေး၊ နိုင်ငံရေးအခြေအနေကျဆင်းနေခြင်းကြောင့် ၎င်းအခြေအနေကိုကယ်တင်ရန် ဗကပအဝေးရောက် ဗဟိုကော်မတီဝင် သခင်ဘသိန်းတင်သည် ၁၉၆၇ ခုနှစ်တွင် တရုတ်နိုင်ငံ၌ ဗကပအရှေ့မြောက် စစ်ဒေသချုပ်ကို ဖွဲ့စည်းခဲ့ ပါသည်။ ၁၉၇၁ ခုနှစ်တွင် ''ဝ'' ဒေသသို့ ထိုးဖောက်တိုးချဲ့လာနိုင်ချိန်မှစ၍ အနေအစားဆင်းရဲသော ''ဝ'' လူမျိုးများက ဆန်နှင့်ဆားများ ထောက်ပံ့ပေးကာ စစ်မှုမထမ်းမနေရစနစ်ဖြင့် ''ဝ'' တိုင်းရင်းသားလူငယ်များကို စည်းရုံးသိမ်းသွင်း၍ ဗမာပြည် ကွန်မြူနစ်လက်နက်ကိုင်များအဖြစ် သိမ်းသွင်းနိုင်ခဲ့ပါသည်။ ၁၉၇၉ ခုနှစ်မှစ၍ ဗမာပြည်ကွန်မြူနစ်ပါတီ အရှေ့ မြောက်စစ်ဒေသသည် ''ဝ'' ဒေသတွင်အခြေပြုခဲ့ပါသည်။ပဲခူးရိုးမရှိ ဗမာပြည်ကွန်မြူနစ်ပါတီ ပြိုကွဲပြီးနောက်ပိုင်းမှစ၍ ''ဝ'' ဒေသ ပန်ဆန်းသည် ဗကပဗဟို ဌာနချုပ်ဖြစ် လာခဲ့ပါသည်။ ဗကပလက်နက်ကိုင်အဖွဲ့ဝင် ၃ ပုံ ၂ ပုံတွင် ''ဝ" တိုင်းရင်းသား အများစု ပါဝင်ပြီး ကျန် ၁ ပုံမှာ ကချင်၊ ကိုးကန့်၊ တရုတ်၊ ရှမ်း၊ လားဟူ၊ အခါတိုင်းရင်းသားများဖြစ်ပါ သည်။ ဗကပ လက်အောက်ရှိ ''ဝ'' အပါအ၀င် တိုင်းရင်းသားအားလုံးသည် ဗကပ၏ ဗမာလူမျိုးကြီး ၀ါဒမှိုင်းရိုက်သွင်းခံရခြင်းကြောင့် လက်နက်စွဲကိုင်ခဲ့ရသော်လည်း ဗကပဗဟိုမှ ပါတီဥက္ကဋ္ဌ ဘသိန်းတင် အပါအ၀င် ခေါင်းဆောင်ပိုင်း အဘိုးကြီးများ၏ အစွန်းရောက်ကွန်မြူနစ်ဝါဒကို လုံးဝမနှစ်သက်သောကြောင့် ခွဲထွက်လိုကြရာတွင် ''ဝ'' တိုင်းရင်းသားများက ခွဲထွက်လိုစိတ် အပြင်းပြဆုံးဖြစ်ခဲ့ကြပါသည်။ ထိုအခြေအနေကို ရိပ်စားမိသော ဗကပပါတီဗဟိုသည် ၁၉၈၉ ခုနှစ် ဖေဖော်ဝါရီလတွင် ''ဝ'' တပ်ဖွဲ့ဝင်များခွဲထွက်မသွား ရေး အတွက် အောက်ခြေအထိဆင်း၍ စည်းရုံးခဲ့ပါသည်။ သို့သော်လည်း တိုင်းရင်းသားခေါင်းဆောင်များဖြစ်သည့် ကျောက်ညီလှိုင်နှင့် ပေါက်ယူချန်တို့သည် ဗကပမှခွဲထွက်ရေးအတွက် ''ဝ'' ခေါင်းဆောင်ငယ်များနှင့် လျှို့ဝှက်ဆွေးနွေး ညှိနှိုင်းခဲ့ရာ အားလုံးမှခွဲထွက် ရေးသဘောတူညီခဲ့ကြပါသည်။
၁၉၈၉ ခုနှစ်တွင် ကျောက်ညီလှိုင်နှင့် ပေါက်ယူချန်ခေါင်းဆောင်သော ''ဝ'' တိုင်းရင်းသားများသည် ပန်ဆန်းရှိ ဗကပဗဟို ဌာနချုပ်အား သိမ်းပိုက်၍ ဗကပမှခွဲထွက်ကြောင်း ကြေညာခဲ့ပါသည်။ ''ဝ'' တိုင်းရင်းသားများမှ အာဏာသိမ်းခဲ့သဖြင့် ဗကပပါတီဥက္ကဋ္ဌ ဘသိန်းတင်ခေါင်းဆောင်သော ဗဟိုကော်မတီဝင်များ၊ ကေဒါအချို့နှင့် မိသားစုများသည် ပန်ဆန်းမှ တရုတ်နိုင်ငံအတွင်းသို့ ထွက်ပြေး ခဲ့ကြပါသည်။ ခွဲထွက်ခဲ့သော ''ဝ'' တိုင်းရင်းသားခေါင်းဆောင်များသည် တပ်ဖွဲ့ဝင် အင်အား ၉၉၉၄ ဦး လက်နက်မျိုးစုံ ၇၅၆၄ လက်ဖြင့် ''မြန်မာပြည်အမျိုးသားသွေးစည်းညီညွတ်ရေးပါတီ'' ဟူ၍ ဖွဲ့စည်းခဲ့ ပါသည်။ နိုင်ငံတော်အစိုးရ ကိုယ်စားလှယ်များနှင့် ''ဝ'' အဖွဲ့တို့သည် နှစ်ဖက်အကြိမ်ကြိမ်ဆွေးနွေး ညှိနှိုင်းကြပြီးနောက် ၁၉၈၉ ခုနှစ် မေလ ၉ ရက်နေ့တွင် ဥပဒေဘောင်အတွင်းသို့ ၀င်ရောက်လာခဲ့ပါသည်။ နိုင်ငံတော်မှ ''ဝ'' အထူးဒေသ (၂)အဖြစ် သတ်မှတ် ပေးခဲ့ပြီး ''ဝ'' ဒေသအတွက် မလုံလောက်သည့် ဆန်နှင့်ဆားများ ထောက်ပံ့ပေးကာ ဒေသဖွံ့ဖြိုးရေး ဆောင်ရွက်စေခဲ့ပါသည်။
ငြိမ်းချမ်းရေးယူပြီးနောက်ပိုင်း လမ်းပန်းဆက်သွယ်ရေးခက်ခဲခြင်း၊ ပြည်တွင်းနှင့် ဆက်သွယ် သွားလာမှု နည်းပါးပြီး သီးခြားနေရာဒေသတစ်ခုအဖြစ် တည်ရှိနေခြင်းတို့ကို အကြောင်းပြုကာ ''ဝ'' အဖွဲ့သည် မူးယစ်ဆေးဝါး ထုတ်လုပ်ဖြန့်ဖြူး ခြင်းလုပ်ငန်းအား အဓိကစီးပွားရေးအဖြစ် ဆောင်ရွက်ပြီး တရားမ၀င်သစ်ထုတ်လုပ်ခြင်း၊ ကျောက်မျက်ရတနာတူးဖော် ခြင်း၊ သတ္တုတူးဖော်ခြင်း လုပ်ငန်းများဖြင့် စီးပွားရေးအင်အား တောင့်တင်းခဲ့ပါသည်။ ထို့အတူ စစ်မှုမထမ်းမနေရကြေညာ၍ ''ဝ''ဒေသအတွင်း လူမမည်ကလေးငယ်များ အပါအ၀င် စစ်အင်အားတိုးချဲ့မှုများပြုလုပ်ခဲ့ပါသည်။ ''ဝ'' အဖွဲ့အနေဖြင့် စစ်အင်အားတိုးချဲ့မှုနှင့်အတူ ၂၀၁၀ ခုနှစ်အတွင်း တြိဂံဒေသတိုင်းစစ်ဌာနချုပ်နယ်မြေအတွင်းရှိ လွယ်တွန်း/လွယ်ဆုံဒေသ၊ ဟိုပန်/ဟိုရွက်ဒေသ၊ ပါချီးဒေသနှင့် မိုင်းတုံ/မိုင်းဆတ်ဒေသများတွင် ရာဘာစိုက်ပျိုးရေးကိုအကြောင်းပြု၍ တောများ ရှင်းလင်းကာ ခံစစ်စခန်းများဆောက်လုပ်ပြီး နယ်မြေ ချဲ့ထွင်ခြင်းများလည်း ဆောင်ရွက်ခဲ့ကြောင်း သိရှိရပါသည်။
''ဝ'' အဖွဲ့သည် စစ်အင်အားများလာသည်နှင့် လက်နက်အင်အားတိုးချဲ့တပ်ဆင်ရန် လက်နက်စက်ရုံ တည်ထောင်ပြီး ထိုစက်ရုံအတွက် ကုန်ကြမ်းလိုအပ်မှုနှင့် တစ်ဖက်နိုင်ငံမှ ခေတ်မီလက်နက်များ ၀ယ်ယူရန် အတွက် မူးယစ်ဆေးဝါးကို အလွန်အကျွံထုတ်လုပ်ရောင်းချခဲ့ပါသည်။ ထိုသို့ မူးယစ်ဆေးဝါးထုတ်လုပ်ရာတွင် ကျော်ကြားခြင်းကြောင့် နိုင်ငံတကာ မူးယစ်ဆေးဝါးနှိမ်နင်းရေးအဖွဲ့(Drug Enforcement Administration-DEA)ကပင် ''ဝ'' ခေါင်းဆောင် ၈ ဦးကို မူးယစ်ရာဇာများ အဖြစ်သတ်မှတ်ကာ ဆုငွေများထုတ်ခြင်းဖြင့် ကမ္ဘာသိကြေညာခဲ့ပါသည်။ တပ်မတော်အစိုးရမှ မူးယစ် ဆေးဝါးလုပ်ငန်းများဆောင်ရွက်ခြင်းမပြုရန် တားဆီးခဲ့ သော်လည်း မူးယစ်ဆေးဝါးများဖမ်းဆီးခြင်း၊ ဘိန်းခင်း ဖျက်ဆီးခြင်း တို့အား ဟန်ပြသာဆောင်ရွက်၍ အစိုးရသစ် လက်ထက်ထိ ၎င်းလုပ်ငန်းများကို ဆက်လက်လုပ်ဆောင်ခဲ့သည်ကို တွေ့ရှိ ရပါသည်။
အစိုးရသစ်လက်ထက် ငြိမ်းချမ်းရေးဆွေးနွေးပွဲများတွင် တက်ရောက်ခဲ့သော်လည်း တစ်ပြည်လုံး အတိုင်းအတာနှင့် အပစ် အခတ်ရပ်စဲရေးဆွေးနွေးပွဲမှာ ''ဝ'' အဖွဲ့အနေဖြင့် ပါဝင် လက်မှတ်ရေးထိုးမှာ မဟုတ်ကြောင်း၊ ''ဝ'' အဖွဲ့အနေဖြင့် အစိုးရနှင့်ငြိမ်းချမ်းရေးယူထားဆဲဖြစ်ပြီး တပ်မတော်စစ်ကြောင်း များနှင့်လည်း တိုက်ပွဲများဖြစ်ပွားခြင်းမရှိတာကြောင့် လက်မှတ်မထိုးနိုင်ကြောင်း "ဝ" အဖွဲ့ ပြောရေးဆိုခွင့်ရှိသူ အောင်မြင့်က မီဒီယာများမှတစ်ဆင့် ပြောကြားခဲ့ပါသည်။ ''ဝ'' အနေဖြင့် တပ်မတော်စစ်ကြောင်းများနှင့် တိုက်ပွဲဖြစ်ပွားမှုမရှိဘဲ ငြိမ်းချမ်းရေးကို အလေးထားသယောင် အသံကောင်း ဟစ်ကာ အစိုးရအပေါ်သစ္စာ ရှိကြောင်း ၀ါဒဖြန့်ခဲ့သော်လည်း ဖုန်ကြားရှင်မှ လောက်ကိုင်ဒေသအား ကျူးကျော်တိုက်ခိုက် ချိန်တွင်တော့ ''ဝ'' အဖွဲ့၏ နှစ်ဖက်ချွန်လုပ်ရပ်များ ဗူးပေါ်သလိုပေါ်ခဲ့ရပါသည်။ ''ဝ'' အဖွဲ့သည် ဖုန်ကြားရှင်အဖွဲ့အား လူ၊ လက်နက်၊ ခဲယမ်းများထောက်ပံ့ခြင်း၊ KIA အပါအ၀င် အခြားလက်နက်ကိုင်အဖွဲ့များအား လက်နက်ခဲယမ်းနှင့် မူးယစ် ဆေးဝါးများထောက်ပံ့ပေးကာတပ်မတော်စစ်ကြောင်းများအား တိုက်ခိုက်ရန်အားပေးအားမြှောက်ပြုခဲ့ကြောင်း လောက်ကိုင် တိုက်ပွဲတွင် တပ်မတော်မှဖမ်းဆီးရမိသော သောင်းကျန်းသူများမှ ထုတ်ဖော်ပြောကြား ခဲ့ပါသည်။
''ဝ'' အဖွဲ့သည် လူ၊ လက်နက်အင်အား၊ စီးပွားရေးအင်အားတောင့်တင်းလာသည်နှင့် လက်နက်ကိုင် တိုင်းရင်းသား အဖွဲ့များ၏ထုံးစံအတိုင်း မေလ ၁ ရက်နေ့မှ ၆ ရက်နေ့အထိ ''ဝ'' ပြည်နယ် ပန်ဆန်းမြို့တွင် ညီလာခံကျင်းပကာ အစိုးရမှ ကန့်ကွက်သည့်ကြားမှပင် MNDAA (ကိုးကန့်) သောင်းကျန်းသူအဖွဲ့ကိုပါ ၎င်းညီလာခံတွင်ဖိတ်ခေါ်၍ ၎င်းတို့၏သရုပ် မှန်ဖြစ်တဲ့ အစိုးရထံပြည်နယ် တောင်းဆိုမှုပြုလုပ်ခဲ့ပါသည်။ ''ဝ'' အဖွဲ့အနေဖြင့် ရှမ်းပြည်နယ်တောင်ပိုင်း မိုင်းဆတ်ခရိုင် မိုင်းတုံ မြို့နယ်အတွင်း သစ်ခိုးထုတ်မှုတွင် တပ်မတော်စစ်ကြောင်းများမှ ဖမ်းဆီးစေခိုင်းမှုအား ၀င်ရောက်စွက်ဖက်ခဲ့ကာ "ဝ " တပ်ဖွဲ့မှ တပ်ရင်း(၈)ရင်း၊ အင်အား ၁၀၀၀ ကျော်ဖြင့် အင်အားပြကာ မိုင်းတုံမြို့နယ်အတွင်း လမ်းကြောင်းများအား ပိတ်ဆို့ထားခြင်း ကြောင့် တပ်မတော်စစ်ကြောင်းများနှင့် "ဝ" တပ်ဖွဲ့ဝင်များအကြား စစ်ရေးတင်းမာလျက်ရှိပါသည်။ သို့သော်လည်း ၎င်းကိစ္စမှအစပြု၍ ''ဝ'' တပ်ဖွဲ့အနေဖြင့် ၎င်းတို့ပိုင်ဆိုင်သော တစ်ဖက်နိုင်ငံထုတ် သံချပ်ကာ ကားများအပါ အ၀င် လက်နက်ကြီးများ၊ ခေတ်မီလက်နက်တပ်ဆင်ထားသော ''ဝ'' တပ်ဖွဲ့ဝင်များ စစ်ရေး လေ့ကျင့်နေမှုများအပါအ၀င် ၎င်းတို့၏စစ်ရေးပြင်ဆင်နေမှုများအား လူမှုကွန်ရက်မှတစ်ဆင့် ဝါဒဖြန့်လျက်ရှိ ကြောင်း တွေ့ရှိရပါသည်။
ဆက်လက်ဖော်ပြပါမည်။
သူရိန်ထွန်း(ဓနုဖြူ)
အင်းလေးမီဒီယာ
0 comments:
Post a Comment