မြောက်ဦးမြို့မှာ ဖြစ်ပွားခဲ့သည့် ပဋိပက္ခကြောင့် ပြဿနာထပ်မတက်ရအောင် မြောက်ဦးခရိုင်အုပ်ချုပ်ရေးမှူးနှင့် မြို့နယ် အုပ်ချုပ်ရေး ဦးဘိုဘိုမင်းသိုက်တို့ကို ရခိုင်ပြည်နယ်ရုံးသို့ ပြောင်းရွှေ့လိုက်ကြောင်း ရခိုင်ပြည်နယ်အစိုးရအဖွဲ့ထံမှ သိရ သည်။
ပဋိပက္ခဖြစ်ပြီးနောက်ပိုင်း ခရိုင်အုပ်ချုပ်ရေးမှူးနှင့် မြို့နယ်အုပ်ချုပ်ရေးမှူးတို့မှာ မြို့ထဲသို့ သွားလာလှုပ်ရှား၍ မရသည့် အခြေအနေကြောင့် လိုအပ်ချက်အရ ပြောင်းရွှေ့လိုက်ရခြင်းဟု ရခိုင်ပြည်နယ်အစိုးရအဖွဲ့ အတွင်းရေးမှူး ဦးတင်မောင်ရွှေက ပြောသည်။
“ နောက်ထပ် ထပ်ပြီးတော့ ပြဿနာမဖြစ်ဖို့၊ လူထုက သူတို့ကို မေးနေတယ်။ ဒေါသဖြစ်နေကြတယ်။ သူတို့ခင်မျာ မြို့ထဲသွားမယ်ဆိုရင်တောင်မှ သွားလို့မရဘူး။ လူထုက ခရိုင်အုပ်ချုပ်ရေးမှူး အမိန့်ပေးတယ်လို့ ထင်ကြတယ်။ ဒီကိစ္စကို ခရိုင်အုပ်ချုပ်ရေးမှူးတစ်ယောက်တည်းက အမိန့်ပေးလို့မရဘူး။ ” ဟု ၄င်းကပြောသည်။
ပြည်နယ်အထွေထွေအုပ်ချုပ်ရေးဦးစီးဌာနက ဝန်ထမ်းများမှာ အမိန့်ပေး၍မရကြောင်း၊ မိမိတို့မှာ ဝန်ထမ်းသာဖြစ်ကြောင်း၊ သတင်းအမှားကြောင့်သာ မြောက်ဦးခရိုင်အုပ်ချုပ်ရေးမှူးရုံးသို့ လူထုမှာ ရောက်ရှိလာခြင်းဖြစ်ကြောင်း ဦးတင်မောင်ဆွေက ပြောသည်။
မြောက်ဦးခရိုင်အုပ်ချုပ်ရေးမှူးနှင့် မြို့နယ်အုပ်ချုပ်ရေးမှူး အပြောင်းအလဲလုပ်သည့် စာရင်းကို ပြည်နယ်ရုံးက ထုတ်ဖော် မပြောသော်လည်း အွန်လိုင်းမှာ ပျံ့နှံ့နေသည့် စာအရဆိုလျှင် မြောက်ဦးမြို့နယ် အုပ်ချုပ်ရေးမှူး ဦးဘိုဘိုမင်းသိုက်ကို ရခိုင်ပြည်နယ်ရုံးသို့ ဇန်နဝါရီလ ၁၉ ရက်နေ့က ပြောင်းရွေ့လိုက်သည်။
ရခိုင်ပြည်နယ်ရုံးက လက်ထောက်ညွှန်ရေးမှူး ဦးမောင်သာစိန် ကို မြောက်ဦးမြို့နယ် အုပ်ချုပ်ရေးမှူးအဖြစ် ပြောင်းရွေ့ တာဝန်ပေးအပ်လိုက်ခြင်းလည်းဖြစ်သည်။ မြောက်ဦးခရိုင်အုပ်ချုပ်ရေးမှူးနှင့် မြို့နယ်အုပ်ချုပ်ရေးမှူး အပြောင်းရွှေ့လိုက် သည့်အပေါ် ဒေသခံ လူငယ်တစ်ဦးက ယခုလိုပြောသည်။
“ ခရိုင်မှူးတွေ၊ မြို့နယ်အုပ်ချုပ်ရေးမှူး အပြောင်းအလဲလုပ်လိုက်တာကို ပြည်သူတွေ မသိလိုက်ဘူး။ ပြဿနာ ဖြစ်နေတဲ့ အချိန်က ရှိခဲ့တဲ့ အုပ်ချုပ်ရေးမှူးတွေဟာ ပြဿနာလည်း ဖြစ်ပြီးတော့ ရှောင်သွားတာဟာ အဖေ၊ အမေတာဝန်ကို မကျေဘူးလို့ ပြောချင်တယ်။ အုပ်ချုပ်ရေးမှူးတွေဆိုတာ မြို့ရဲ့ အဖေအမေတွေပဲ။ ပြဿနာတစ်ခုဖြစ်ပြီဆိုရင် တာဝန်ခံမှု၊ တာဝန်ယူမှုတွေနဲ့ ဖြေရှင်းပေးရမယ်လေ။ ” ဟု ပြောသည်။
မြောက်ဦးမြို့မှာ ဖြစ်ပွားခဲ့သည့် ပဋိပက္ခမှာ ခရိုင်ရုံးက ကိုယ့်စိတ်ကိုယ့်သဘောဖြင့် အမိန့်ပေးခဲ့ခြင်း မဟုတ်ကြောင်း၊ အစိုးရအဖွဲ့၏ အဆင့်ဆင့်ဆွေးနွေးမှုကြောင့် ဆောင်ရွက်ခဲ့ခြင်းဖြစ်ကြောင်း ရခိုင်ပြည်နယ်အစိုးရအဖွဲ့ အတွင်းရေးမှူး ဦးတင်မောင်ဆွေက ပြောသည်။
Development Media Group
0 comments:
Post a Comment