ပညာရေးအသုံးစရိတ်တိုးမြှင့်ပေးရေး အစိုးရအနေနှင့် ရက်သတ္တပတ်နှစ်ပတ်အတွင်း တွေ့ဆုံဆွေးနွေးပေး ရန် တောင်းဆိုပြီး ဆောင်ရွက်မပေးပါက တစ်နိုင်ငံလုံးအတိုင်းအတာဖြင့် အရှိန်အဟုန်မြှင့် ဆန္ဒပြ မည်ဖြစ်ကြောင်း ပညာရေးအသုံးစရိတ် တိုးမြှင့်ရေးတိုက်ပွဲကော်မတီဝင် ကိုကျော်သီဟရဲကျော်က ပြောကြား သည်။
ကျောင်းသားများအနေနှင့် ပညာရေးအသုံးစရိတ် တိုးမြှင့်ပေးရန် ပညာရေးဝန်ကြီးဌာန၊ လွှတ်တော် စသည့် အဖွဲ့များ ပါဝင်သည့် ကော်မတီတစ်ရပ်ဖွဲ့စည်းကာ တွေ့ဆုံညှိနှိုင်းလိုကြောင်း ဆန္ဒပြ ဗကသ ကျောင်းသားများ က ပြောကြားသည်။
ပညာရေးအသုံးစရိတ်တိုးမြှင့်ပေးရေး တိုက်ပွဲကော်မတီဝင် ကိုရာဇာထွန်းက “ကျွန်တော်တို့အနေနဲ့ တက္ကသိုလ်ကောလိပ်အသီးသီးမှာ ပညာရေးအသုံးစရိတ် တိုးမြှင့်ပေးဖို့ ကျောင်းတွင်း တောင်းဆိုမှုတွေ ဆက်လုပ်သွားမယ်။ ဒီလိုတောင်းဆိုမှုတွေလုပ်ဖို့ သမဂ္ဂတွေနဲ့ ချိတ်ဆက်ထားတယ်”ဟု ပြောကြားသည်။
မန္တလေးမြို့ ရတနာပုံတက္ကသိုလ်တွင် ပညာရေးအသုံးစရိတ်တိုးမြှင့်ပေးရေး ဇန်နဝါရီလ ၂၂ ရက်နေ့က စတင်တောင်းဆိုခဲ့ရာ ဇန်နဝါရီလ ၂၅ ရက် နံနက် ၄ နာရီကျော်အချိန်က ဖြိုခွင်းခံခဲ့ရပြီး ပါဝင်သည့် ကျောင်းသား ၇၂ ဦးအနက် ၃၆ ဦးကို တက္ကသိုလ်အုပ်ချုပ်ရေးအဖွဲ့များက ကျောင်းထုတ်ပယ်ထားသည်။ ကျန်ရှိသူများကိုလည်း ရုံးဖွင့်ရက်တွင် ကျောင်းထုတ်ပယ်နိုင်ကြောင်း ၎င်းတို့က သုံးသပ်နေကြသည်။
ဇန်နဝါရီလ ၂၈ ရက် ညနေ ၅ နာရီခန့်အထိ ရရှိသောစာရင်းများအရ မန္တလေးမြို့ ရတနာပုံတက္ကသိုလ်မှ ကျောင်းသား၊ ကျောင်းသူ ၁၄ ဦး၊ မိတ္ထီလာနည်းပညာတက္ကသိုလ်မှ ကျောင်းသား၊ ကျောင်းသူ ၁ ဦး၊ မိတ္ထီလာစီးပွားရေးမှ ၆ ဦး၊ ရမည်းသင်း နည်းပညာတက္ကသိုလ်မှ ၁၁ ဦး၊ မိုးညှင်း ဒီဂရီကောလိပ်မှ ၄ ဦး စုစုပေါင်း ၃၆ ဦး ကျောင်းထုတ်ခံရသည်။
The Voice
0 comments:
Post a Comment