အစိုးရအနေဖြင့် အခွန်လည်းကောက်သလို လုပ်ငန်းရှင်များ လုပ်သာကိုင်သာရှိအောင်လည်း စီစဉ်ပေးပါဟု မြန်မာနိုင်ငံဆန်စက်လုပ်ငန်းရှင်များအသင်း ဥက္ကဋ္ဌ ဦးနေလင်းဇင်ကပြောသည်။
ပြည်တွင်း၌ ဆန်စက်လုပ်ငန်းလုပ်ကိုင်ရာတွင် ဌာနပေါင်းစုံသို့ ထောက်ခံစာများစွာ သွားရောက်ယူဆောင်နေရသည်အတွက် အခက်အခဲများစွာရှိနေပြီး အစိုးရအဖွဲ့အစည်းများအနေဖြင့် ဥပဒေနှင့်အညီ အကာအကွယ်ပေးရမည့် လုပ်ငန်းများစွာရှိသည်ဟုဆိုသည်။
"အစိုးရအဖွဲ့အစည်းတွေ ကိုယ်တိုင်က ဥပဒေနဲ့ အညီ အကာအကွယ်ပေးရမယ့် လုပ်ငန်းတွေရှိတယ်။အဲ့လိုလုပ်ငန်းတွေကို အစိုးရအနေနဲ့ အကာအကွယ်ပေးနိုင်ပြီလား ၊မပေးနိုင်သေးရင် ပေးနိုင်ဖို့ကြိုးစားပါ။အစိုးရအနေနဲ့ အခွန်ကြီးပဲကောက်မနေပါနဲ့ ၊အခွန်လဲကောက်သလို လုပ်ငန်းရှင်တွေ လုပ်သာကိုင်သာရှိအောင်လို့ ဖြစ်အောင်လဲ စီစဉ်ပေးပါ။" ဟု ပဉ္စမလှိုင်းမီဒီယာ၏ ဆက်သွယ်မေးမြန်မှုကို ဦးနေလင်းဇင် က ပြန်လည်ဖြေကြားသည်။
ထိုသို့ဥပဒေနှင့်အညီ အရေးယူမည့်အဖွဲ့အစည်းများအနေဖြင့် မည်သည့်ဆန်စက်များသည် မည်သည့်ဥပဒေအောက်တွင်ရှိခြင်းနှင့်  မည်သည့်ဥပဒေနှင့်အရေးယူမည်ကို သိရှိရန်လိုကြောင်း ၎င်းကပြောသည်။
အိမ်နီးချင်းနိုင်ငံများနှင့်ယှဉ်ပြိုင်နိုင်သည့် အခင်းအကျင်းများဖြစ်အောင် မူဝါဒများ ၊ စာရွက်စာတမ်းများ ၊လုပ်ငန်းလိုင်စင်များ စသည်လုပ်ငန်းများကို ယင်းနိုင်ငံများနှင့် တူညီသည့် အနေအထားတစ်ခုကို ဆောင်ရွက်ပေးရန် တောင်းဆိုလိုသည်ဟုဆိုသည်။
ဒီကဏ္ဍနဲ့ပတ်သက်တဲ့ စီမံဘဏ္ဍာဝန်ကြီးရော ကဏ္ဍနဲ့သက်ဆိုင်ရာဝန်ကြီးတွေကရော ဒီကဏ္ဍနဲ့လုံးဝထိတွေ့ခြင်းမရှိဘူး ။အစိုးရသက်တမ်း ၂နှစ်သာကျော်လာတယ်။လုံးဝထိတွေ့ခြင်းမရှိတဲ့အတွက် ဆန်စက်လုပ်ငန်းရှင်တွေအနေနဲ့ ဘယ်သူ့ကိုတင်ပြရမလဲဆိုတာ မသိဘူးဖြစ်နေတယ်။ နစ်နာမှုတွေ ရှိပါတယ်။"ဟု ဦးနေလင်းဇင်ကပြောသည်။
မြန်မာနိုင်ငံတွင် ဆန်စက်ပေါင်း ၁၆၅၀၀ ရှိပြီး တချို့ဆန်စက်လုပ်ငန်းများမှာ ကြိတ်ခွဲလိုင်စင်၊ စက်မှုလိုင်စင်၊ စည်ပင်လိုင်စင် စသဖြင့် လုပ်ငန်းလိုင်စင်ကို အနည်းဆုံး ၄ခု ခန့်ယူနေရကာ ယင်းကဲ့သို့ လိုင်စင်ယူဆောင်ရာ၌ ဌာနပေါင်းစုံသို့ သွား၍ ထောက်ခံစာများစွာ ယူဆောင်နေရသည့်အတွက် လုပ်ငန်းရှင်များအနေဖြင့် အခက်အခဲများရှိသည်ဟုဆိုသည်။
ရန်ကုန်တိုင်းအတွင်း ဥပဒေနှင့်အညီ လည်ပတ်မှုမရှိသော ဆန်စက် များကို ကွင်းဆင်းလေ့လာပြီး အရေးယူရန် စီစဉ်မည်ဟု စီမံကိန်းနှင့်ဘဏ္ဍာရေးဝန်ကြီး ဦးမြင့်သောင်းမှ မေလတတိယပတ်က ပြု လုပ်သည့် ရန်ကုန်တိုင်းဒေသကြီးလွှတ်တော် ၊ဒုတိယအကြိမ်၊ ဆဋ္ဌမပုံမှန်အစည်းအဝေး တွင်ပြောကြားထားသည်။
ပြည်သူများခံစားနေရသည့်အခြေအနေများအား မြို့တော်စည်ပင်သာယာရေးအဖွဲ့များ၊ ကြီးကြပ်သည့်တိုင်းစည်ပင်သာယာရေးဦးစီးဌာနကို သက်ဆိုင်ရာဆန်စက်များသို့ကွင်းဆင်းလေ့လာစေပြီး အရေးယူဆောင်ရွက်သွားရန် စီစဉ်မည်ဟုဆိုသည်။
ရန်ကုန်တိုင်းဒေသကြီးလွှတ်တော် ၊ဒုတိယအကြိမ်၊ ဆဋ္ဌမပုံမှန်အစည်းအဝေး (၃၅)ရက်မြောက်နေ့၌ ကျောက်တန်းမြို့နယ်၊ မဲဆန္ဒနယ်အမှတ်(၂) လွှတ်တော်ကိုယ်စားလှယ် ဒေါ်သက်သက်မူမှ ပြည်သူတွေအတွက်နှင့် ဂေဟ စနစ်အတွက် ဆိုးကျိုးများဖြစ်ပေါ်နေပြီး ဥပဒေနှင့်အညီ လည်ပတ်မှုမရှိသော ဆန်စက်များကို မည်ကဲ့သို့အရေးယူဆောင်ရွက်သွားမည်ကို သိလိုကြောင်း မေးခွန်းနှင့် ပတ်သက်ပြီး စီမံကိန်း နှင့်ဘဏ္ဍာရေးဝန်ကြီး ဦးမြင့်သောင်းက ပြန်လည်ဖြေကြား ခဲ့ခြင်းဖြစ်သည်။
"မြို့တော်စည်ပင်ကလုပ်ငန်း လိုင်စင်ပေးတာပဲရှိတယ်။ စစ်ကမှာက စက်မှုကြီးကြပ်က စစ်ရမှာပါ။ တကယ်လို့ ပါရင်လဲ အဖွဲ့ဝင်အနေနဲ့ပဲပါမှာပါ။အခုထိတော့ ဖွဲ့ပေးမထားသေးဘူး။စည်ပင်ကိုလဲ သီးခြားတာဝန်ပေးထားတာမရှိသေးဘူး။"ဟု ရန်ကုန်မြို့တော်စည်ပင်သာယာရေးကော်မတီမှ တွဲဖက်အတွင်းရေးမှူး ဦးသန်းကပြောသည်။
မြို့နယ်စည်ပင်သာယာရေးအဖွဲ့များအနေဖြင့် မြို့နယ်စည်ပင်သာယာရေး နယ်နိမိတ်အတွင်းရှိ ဆန်စက်လုပ်ငန်းများအား တစ်နှစ်လျှင် တစ်ကြိမ် နှစ်စဉ် လုပ်ငန်းလိုင်စင်ထုတ်ပေးလျှက်ရှိပြီး လုပ်ငန်းလိုင်စင်၏ သက်တမ်းမှာ ဧပြီလ (၁)ရက်နေ့မှ မတ်လ (၃၁)ရက်နေ့အထိ ဖြစ်ကြောင်း ၀န်ကြီးကပြောသည်။
မြို့နယ်စည်ပင်သာယာရေးအဖွဲ့များအနေဖြင့် လုပ်ငန်းလိုင်စင်ထုတ်ပေးရာတွင် ဆန်စက်ပတ်ဝန်းကျင်နေထိုင်သူများ၏ ဆန်စက်လုပ်ငန်းလုပ်ကိုင်မှုအား ကန့်ကွက်ရန် မရှိကြောင်း ထောက်ခံချက်၊ သက်ဆိုင်ရာ ရပ်ကွက်အုပ်ချုပ်ရေးမှူး၏ ထောက်ခံချက်၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ ပုဂ္ဂလိကစက်မှုလုပ်ငန်း မှတ်ပုံတင်များဖြင့် ပြည့်စုံစွာတင်ပြလာမှသာ လုပ်ငန်းလုပ်ကိုင်ခွင့်လိုင်စင် ထုတ်ပေးခြင်း ဖြစ်ကြောင်းသိရသည်။
ဆန်စက်လုပ်ငန်းအား လိုအပ်သော စာရွက်စာတမ်း အထောက်အထားများ ပြည့်စုံစွာတင်ပြလာ၍ လုပ်ငန်းလုပ်ကိုင်ခွင့်လိုင်စင် ထုတ်ပေးခြင်းဖြစ်သော်လည်း လုပ်ငန်းဆောင်ရွက်စဉ်အတွင်း သတ်မှတ်စည်းကမ်း ချိုးဖောက်ပါက လုပ်ငန်းအား ရပ်ဆိုင်ထားစေခြင်း၊ ပိတ်သိမ်းစေခြင်း၊ ထုတ်ပေးထားသည့် လုပ်ငန်းလိုင်စင်အား ပြန်လည်ရုပ်သိမ်း ခြင်းတို့ကို ဆောင်ရွက်လျက်ရှိကြောင်း သိရသည်။
ဝေဝေဖြိုး
The Fifth Wave News
0 comments:
Post a Comment