နေပြည်တော်ရှိ Wisdom Hill ပုဂ္ဂလိကကျောင်းတွင် အသက် ၃ နှစ်မပြည့်သေးသည့် ကလေးငယ် မဖွယ်မရာ ပြုကျင့်ခံရသည့် အမှုသည် အများသူငါ ဝိုင်းဝန်းဝေဖန် ပြောဆိုနေသကဲ့သို့ ရိုးရှင်းမှု မရှိဟု နေပြည်တော်မှုခင်းရဲတပ်ဖွဲ့ ( CID) မှ အဆင့်မြင့်ရဲအရာရှိတဦးက ဧရာဝတီသို့ ပြောသည်။
အမည်မဖော်လိုသူ ရဲအရှိက “အဲဒီရဲ့ ဖြစ်စဉ်တခုလုံးမှာ ပျော့ကွက်၊ ဟာကွက်တွေ အများကြီး။ အဲဒီအမှုက မရိုးစဉ်းဘူး။ လွယ်ကူ မဖြောင့်ဘူးပေါ့။ လွယ်ကူတယ် ဆိုရင် နှင်းနု သိတယ်ဆိုရင် နှင်းနုကို မေး။ နှင်းနုက ပြောရင် ပြီးပြီပေါ့။ ပေါ်ပြီပေါ့။ လွယ်လွယ်လေးဘဲပေါ့။ အဲဒီလောက် မလွယ်လို့ပေါ့။ အဲဒီလောက်လွယ်ရင် ပြီးပြီ” ဟု ပြောသည်။
အမှုတွင် သံသယရှိသူ ၁၃ ဦးရှိပြီး ကျောင်းနှင့်ပတ်သက်သူ ၉ ဦး ပါဝင်ကြောင်းလည်း ၎င်းက ပြောဆိုသည်။
“စစ်တဲ့အထဲမှာ သက်သေ ၅၀ ရှိတယ်။ အဲဒီထဲမှာမှ မင်္သကာသူက ၁၃ ယောက်ရှိတယ်။ ၁၃ ယောက်ကို ငါတို့ တိုက်ဆိုင် စစ်ဆေးနေရတယ်လေ။ ငါတို့ စစ်ဆေးချက်အပြင်ကို တခြား ဇီဝဗေဒ ( DNA) ဆိုတာမျိုး တိုက်ဆိုင် စစ်ဆေးရတယ်လေ“ ဟုလည်း ၎င်းက ပြောဆိုသည်။
လူမှုကွန်ရက်စာမျက်နှာထက်တွင် ကောလာဟလများထွက်ပေါ်နေသည့် ကျောင်းကြီးကြပ်ရေးမှူး၏ သား ၂ ဦးနှင့် ပတ်သက်ပြီး ဧရာဝတီက မေးမြန်းရာ “DNA အဖြေက မတူဘူးလေ။ အဖြေမတူတော့ ငါတို့က တရားခံကို ဖမ်းလို့ မရဘူးလေ။ ၂ ယောက်စလုံးကို စစ်တာ” ဟု အထက်ပါ ရဲအရာရှိက ဆိုသည်။
သက်သေ အထောက်အထား ရှာဖွေ သိမ်းဆည်းခြင်း၊ စစ်ဆေးခြင်းများဆိုင်ရာ ရဲလုပ်ငန်း အသေးစိတ်ကို ရှင်းပြခြင်း မရှိပါ။
ယခု အမှုဖြစ်စဉ်နှင့် ပတ်သက်၍ ကြန့်ကြာနေသည့် ရဲလုပ်ငန်း စနစ်အပေါ်လည်း ပြည်သူများက ဝေဖန်မှုများ မြင့်တက်နေသည့်အပေါ် ရဲလုပ်ငန်းစဉ်အရ ပြောပြ၍ မရကြောင်း၊ ရဲလုပ်ငန်းစဉ်များကို ချပြပါက တရားခံမှာ ထွက်ပြေးသွားနိုင်ကြောင်း၊ လုပ်ငန်းစဉ်အရ ရှေ့လုပ်ငန်းစဉ်များကို ပြောပြ၍ မရကြောင်းသာ အဆိုပါ ရဲအရာရှိက ရှင်းပြသည်။
၎င်းက “ငါတို့လည်း အမှုပေါ်ချင်လို့ ပေါ်အောင်လုပ်နေတာပေါ့။ ရဲကို အားမလို အားမရ ဖြစ်နေတာက ငါတို့ ဆောင်ရွက်တာက သိုသို သိပ်သိပ် ရှိတယ်လေ” ဟု ဆိုသည်။
တရားဝင် အတည်ပြုချက် မရယူနိုင်သော ရဲတပ်ဖွဲ့ သတင်းရင်းမြစ်အချို့ အဆိုအရ ရဲတပ်ဖွဲ့က သံသယရှိသူ ၅ ဦးကို လက်ရှိတွင် ခေါ်ယူစစ်ဆေးနေကြောင်း သိရပြီး ၎င်းတို့မှာ မည်သူမည်ဝါ ဖြစ်သည်ကို အသေးစိတ် မသိရှိရသေးပါ။
သံသယရှိသူ အမျိုးသားတဦးကို မေလ ၃၀ ရက်နေ့ကစပြီး CID မှ စတင်စစ်ဆေးမှုများပြုလုပ်ခဲ့ပြီး၊ ဇွန်လ ၂၄ ရက် နေ့တွင် တရားစွဲဆိုရန် အထောက်အထား မခိုင်လုံသည့်အတွက် ပြန်လွှတ်လိုက်ပြီးနောက် အမှုမှန် ပေါ်ပေါက်ရန် လူအများကစိတ်ဝင်စားမှု မြင့်တက်နေသည်။
နေပြည်တော် သပြေကုန်းတွင် ဖွင့်လှစ်ထားသည့် Wisdom Hill အမည်ရှိ ပုဂ္ဂလိက မူကြိုကျောင်းတခုတွင် တက်နေသည့် အဆိုပါ ကျောင်းသူ ကလေးငယ်မှာ မေလ ၁၇ ရက်နေ့က လိင်အကြမ်းဖက်ခံရမှုဖြင့် ထိုကလေးငယ်၏ မိခင် ကိုယ်တိုင်လာရောက် အမှုဖွင့်ခဲ့ခြင်း ဖြစ်သည်။
တလကျော်ကြာမြင့်လာပြီး ယနေ့အထိ တရားခံ အစစ်ကို ဖော်ထုတ်နိုင်ခြင်း မရှိသည့်အတွက် လူမှုကွန်ရက် စာမျက်နှာတွင် တရက်ထက် တရက် ဝေဖန်မှုများ မြင့်တက်နေပြီး နိုင်ငံတဝှမ်းရှိ နာမည်ကြီး အနုပညာရှင်များ အပါအဝင် Facebook အသုံးပြုသူ အများစုမှာ ကလေးငယ်၏ ဘက်မှ ရပ်တည်၍ ပရိုဖိုင်ပုံများတွင် Justice For Victoria ( ဗစ်တိုးရီးရားအတွက် တရားမျှတမှု) ဟူသော အမည်ပါ ပုံများကို ပြောင်းလဲလာသည်အထိ ဖိအားပေးလာနေခဲ့သည်။
အဆိုပါ အမှု တရားခံ အစစ်ပေါ်ပေါက်စေရန်အတွက် ဥပဒေဘောင်အတွင်းမှ လုပ်လို့ ရသည့် ကိစ္စရပ်များကို အားလုံးဆောင်ရွက်သွားမည် ဖြစ်ကြောင်း၊ ယခုဖြစ်ပွားခဲ့သည့် ဖြစ်စဉ်မှာ နယ်မြေ ကျဉ်းမြောင်းပြီး ပါဝင်ပတ်သက်နေသည့် လူဦးရေ နည်းသည့်အတွက် တရားခံ မဖော်ထုတ်နိုင်ခြင်းကို အားမလို အားမရ ဖြစ်ကြောင်း ကလေးငယ်၏ ဖခင်ဖြစ်သူက ဧရာဝတီသို့ ပြောကြားထားသည်။
အဓမ္မပြုကျင့်ခံရသည့် ကလေးငယ်မှာ ဆေးစစ်ချက် အဖြေအရ သုတ်ပိုးတွေ့ရှိသဖြင့် HIV ကာကွယ်ဆေး ၂၈ ရက်တိုက်ကျွေးပြီး ဖြစ်သည်။
အဆိုပါ အမှု စတင်ဖြစ်ပွားသည်ကို သိရှိသည့် အချိန်မှစ၍ နိုင်ငံတော်အကြီးအကဲများ အနေဖြင့် ပြည်ထဲရေးဝန်ကြီးဌာနနှင့် မြန်မာ နိုင်ငံရဲတပ်ဖွဲ့ တာဝန်ရှိသူများကို “ဒီအမှု မပေါ်၊ ပေါ်အောင် ဖော်ပါ” လို့ နှုတ်ဖြင့် မှာကြားထားပြီး ဖြစ်ကြောင်း၊ အမှုစစ်ဆေးမှု အခြေအနေကိုလည်း စဉ်ဆက်မပြတ် မေးမြန်း၍ အကြီးအကဲများထံ တင်ပြနေကြောင်း နိုင်ငံတော် သမ္မတရုံးမှ ပြောရေးဆိုခွင့်ရှိသူ ဦးဇော်ဌေးက ပြောကြားထားသည်။
ယခု အမှုနှင့် အဓိက သက်ဆိုင်နေသည့် Wisdom Hill ပုဂ္ဂလိက ကျောင်းအုပ် ဦးပညာက အမှုနှင့် ပတ်သက်၍ ကျောင်းဘက်မှ အပြည့်အဝ ပူးပေါင်းဆောင်ရွက်နေကြောင်း၊ ကျောင်းဘက်မှ ဝန်ထမ်းအပါအဝင် အမှုနှင့် ဆက်စပ်သည်ဟု ယူဆရသည့် လူ ၂၀ ခန့်ကို ဇွန်လ ၁၇ ရက်မှစ၍ ခေါ်ယူစစ်ဆေးပြီး ဖြစ်ကြောင်း၊ ရဲတပ်ဖွဲ့က ဆရာမ၊ ယာဉ်မောင်းနှင့် ကျောင်းကြီးကြပ်ရေးမှူးတို့ကို ခေါ်ယူစစ်ဆေးပြီး ဖြစ်ကြောင်း၊ အမှုမှန် ပေါ်ပေါက်ရန်အတွက် ပူးပေါင်း ပါဝင်ဆောင်ရွက်နေကြောင်း ဧရာဝတီသို့ ပြောကြားထားသည်။
၎င်းအမှုကို ဇွန်လ ၃ ရက်နေ့တွင် CID က လွှဲပြောင်းရယူခဲ့ပြီး ယင်းအမှုနှင့် ပတ်သက်၍ (ပ) ၇၉/ ၂၀၁၉ ၊ ရာဇသတ်ကြီး ပုဒ်မ ၃၇၆/ ၅၁၁ ဖြင့် အမှုဖွင့် စစ်ဆေး ဆောင်ရွက်လျက်ရှိကြောင်း ဇဗ္ဗူသီရိ မြို့မရဲစခန်းမှ သိရသည်။
ဧရာဝတီ
0 comments:
Post a Comment