မြန်မာနိုင်ငံတွင်းကို ဘင်္ဂါလီတွေဝင်ရောက်လာမှုသမိုင်းစာအုပ်ကို မြန်မာ့သမိုင်း ပညာရှင်တွေနဲ့ သာမက ဥရောပနဲ့ အရှေ့တောင်အာရှက သမိုင်းပညာရှင်တွေ ပေးပို့တဲ့ အချက်အလက်တွေ ဖြည့်စွက် ဆောင်ရွက်နေတယ်လို့ ပြည်ထောင်စု ၀န်ကြီးသူရဦးအောင်ကိုက ပြောပါတယ်။
ဒီကနေ့ မတ်လ ၃ ရက်နေ့က နေပြည်တော်ရှိ MICC II မှာ ပြုလုပ်တဲ့ အာဆီယံ စာကြည့်တိုက်မှူးများညီလာခံမှာ မီဒီယာတွေရဲ့ မေးမြန်းချက်တွေကို သာသနာရေးနှင့် ယဉ်ကျေးမှုဝန်ကြီးဌာန ပြည်ထောင်စုဝန်ကြီး သူရ ဦးအောင်ကိုက ပြန်လည်ဖြေဆိုတာပါ။
မြန်မာနိုင်ငံအတွင်းကို ဘင်္ဂလီတွေဝင်ရောက်လာမှုသမိုင်း မူကြမ်းပြုစုနေတာ ၉၀ ရာခိုင်နှုန်းလောက်ပြီးတဲ့အခြေအနေကို နိုင်ငံတော်အတိုင်ပင်ခံရုံးကို တင်ပြထားတယ်လို့ ပြောပါတယ်။
ဒီလို တင်ပြတုန်းမှာပဲ ပြင်သစ်၊ အင်္ဂလန်နဲ့ ဥရောပက သမိုင်းပညာရှင်တချို့အပြင် အရှေ့တောင်အာရှက သမိုင်းပညာရှင်တွေက သူတို့ပြုစုခဲ့တဲ့ သမိုင်းအထောက်အထား အချက်အလက် တချို့ပေးပို့လာတဲ့အတွက် ပြန်ဖြည့်စွက်ပေးနေတယ်လို့ ဆိုပါတယ်။
“မြန်မာတိုင်းရင်းသားမျိုးနွယ်စု တစ်ရာကျော်ထဲမှာ ရိုဟင်ဂျာဆိုတာ ဘယ်တော့မှ မပါခဲ့ဘူးဆိုတာ အဲလိုပြန်ပေးပါတယ်။ ဒီဟာတွေကို ဥရောပကလည်း ပေးတယ်။ အာရှပေါ့ အရှေ့တောင်အာရှ၊ အိမ်နားနီးချင်း ထိုင်းတို့ကလည်း ပေးပါတယ်။ ပေးတဲ့အခါကျတော့ ဒီအချက်အလက်ထပ် ရောက်တဲ့အခါမှာ ဒါကို ထပ်ဖြည့်စွက်ပြီးတော့မှ ထပ်ပြီးတော့ အတိုင်ပင်ခံကိုတင်ပြဖို့ အားလုံးပြုစုနေပါတယ်။ စုစည်းနေပါတယ်။ ဆိုတော့ ပိုပြီးပိုပြီး ခိုင်မာအောင် ဒီကိစ္စက မြန်မာသမိုင်းပညာရှင်တွေနဲ့ပဲ သက်သက်ပြုစုမယ်ဆိုလို့ရှိရင် ဒါမြန်မာ အချင်းချင်းရေးတာပဲဆိုပြီးတော့ ခိုင်မာမှုက နည်းနည်းအားနည်းနိုင်ပါတယ်။ အခုတော့ ဥရောပကရော၊ အရှေ့တောင်အာရှ သမိုင်းပညာရှင်တွေကပါ အချက်အလက်တွေ ပေးလာတဲ့ အခါမှာ ပိုပြီးအားကောင်းခိုင်မာတဲ့ သမိုင်းဖြစ်လာမှာပါ။ ဒါကိုပြီးရင် အတိုင်ပင်ခံဆီကို ဆက်လက် တင်ပြဖို့ လုပ်နေပါတယ် ” လို့ သူရဦးအောင်ကိုက ပြောပါတယ်။
ဒီသမိုင်းစာအုပ်ကို မြန်မာစာနဲ့ စတင်ထုတ်ဝေသွားမှာဖြစ်ပြီး အတည်ပြုဖို့ မလိုတဲ့ အပိုင်းတွေကို အင်္ဂလိပ်လိုစပြီး ဘာသာပြန်နေပြီလို့ ဆိုပါတယ်။
DVB
0 comments:
Post a Comment