ကိုရိုနာဗိုင်းရပ်ကာကွယ်ဆေးဟာ ဈေးကွက်ထဲမှာ ထွက်ပေါ်လာတဲ့အခါမှာ တစ်ကြိမ်ထိုးရုံနဲ့ မလုံလောက်ဘဲ နှစ်ကြိမ်ထိုးရဖွယ်ရှိပြီး၊ အခက်အခဲအချို့လည်း ရှိလာနိုင်ပါတယ်။
ဒီထဲကမှ အခက်အခဲအချို့ကတော့ ကာကွယ်ဆေးတွေကို ထောက်ပံ့ပို့ဆောင်ရေးဖြစ်ပါတယ်။ တစ်နိုင်ငံလုံးအတိုင်းအတာနဲ့ ကာကွယ်ဆေးတွေကို ထောက်ပံ့ပို့ဆောင်ပေးရမှာဖြစ်လို့ ထောက်ပံ့ပို့ဆောင်ရေးတွေမှာ အခက်အခဲအချို့ရှိလာနိုင်ပါတယ်။ ကပ်ဘေးကာလတစ်လျှောက်လုံး စမ်းသပ်ရေးကိရိယာတွေနဲ့ ကာကွယ် ရေးပစ္စည်းတွေ လောက်ငှအောင်ထောက်ပံ့ပေးတဲ့နေရာမှာ အခက်အခဲတွေရှိခဲ့ပါတယ်။ ဒီလိုတွေ့ကြုံခဲ့ရတာတွေက တစ်နိုင်ငံလုံးအတိုင်းအတာနဲ့ ကာကွယ်ဆေးဖြန့်တဲ့အခါ အခက်အခဲတွေ့လာရနိုင်တဲ့သဘောဖြစ်ပါတယ်။
“ လူသားတွေရဲ့သမိုင်းမှာ အကြီးမားဆုံးနဲ့ အရှုပ်အထွေးဆုံး ကာကွယ်ဆေးအစီအစဉ်တစ်ခုဖြစ်တယ်ဆိုတာ သံသယရှိစရာမလိုပါဘူး” လို့ အမေရိကန်နိုင်ငံရှိ Vanderbilt တက္ကသိုလ်မှ ကျန်းမာရေးမူဝါဒဆိုင်ရာပရော်ဖက်ဆာ ဒေါက်တာ Kelly Moore က ပြောပါတယ်။
အမေရိကန်နိုင်ငံမှာ ၂၀၀၉ ခုနှစ်တုန်းက အားပြင်းတုပ်ကွေးသစ်တစ်မျိုးဖြစ်ခဲ့ဖူးပြီး၊ ဒီတုပ်ကွေးကာကွယ် ဆေး အတွက် အစီအစဉ်ချမှတ်ဆောင်ရွက်ခဲ့ရမှာ လများစွာအတွင်း အမေရိကန်နိုင်ငံသား (၁၆၁)သန်းကို ကာကွယ်ဆေးထိုးပေးနိုင်ခဲ့တယ်လို့ အမေရိကန်ရောဂါဘယထိန်းချုပ်ရေးနဲ့ ကာကွယ်ဆေးစင်တာက ထုတ်ပြန်ပေးပါတယ်။ဒီသဘောတရားက ကိုရိုနာဗိုင်းရပ်စ်ကာကွယ်ဆေးအစီအစဉ်ဟာ ပိုပြီး ခက်ခဲလာနိုင်တယ်ဆိုတာကို ပြသနေတာဖြစ်ပါတယ်။ ဒါပေမယ့် မဖြစ်နိုင်ဘူးလို့တော့ ဆိုလိုတာမဟုတ်ပါဘူး။
“လုပ်နိုင်မယ်ဆိုတာ ယုံကြည်မှုရှိပါတယ်၊ ဒါပေမဲ့ အလုပ်ဖြစ်အောင် ပူးပေါင်းဆောင်ရွက်ရပါမယ်” လို့လည်း ဒေါက်တာ Moore က ပြောပါတယ်။
ကာကွယ်ဆေးဟာ အတွဲလိုက်ထုတ်ရမှာဖြစ်လို့ အမေရိကန်နိုင်ငံသား သန်း(၃၃၀)အတွက် ကာကွယ်ဆေးဟာ သန်း(၆၆၀)ထုတ်ရမယ့် သဘောဖြစ်ပါတယ်။
“ဆေးက နှစ်ကြိမ်ထိုးရဖွယ်ရှိပါတယ်၊ အဲဒီတော့ ဆေးပမဏာဟာ ဖြန့်ဖြူးရေးမှာ နှစ်ဆဖြစ်သွားပါမယ်၊ ဒါဟာ ကာကွယ်ဆေးထုတ်လုပ်ရေးနဲ့ ဖြန့်ဖြူးရေးအတွက် များပြားတဲ့ ပမာဏဖြစ်ပါတယ်” လို့ လည်း Northeastern တက္ကသိုလ်မှ ပရော်ဖက်ဆာ Nada Sanders က ပြောပါတယ်။
ကာကွယ်ဆေးကို နှစ်ဆထုတ်ရရုံမကဘဲ အခြားပစ္စည်းတွေကိုလည်းနှစ်ဆထုတ်ရမှာပါ။ ဆေးထိုးပြွတ်တွေ၊ ဆေးထည့်မယ့် ဖန်ဘူးတွေ၊ ဘူးဆို့တွေ၊ ဆေးထိုးအပ်တွေ စတဲ့ အရာရာတိုင်းကိုလည်း နှစ်ဆထုတ်ရမှာ ဖြစ်တယ်လို့ Sanders က ဆက်လက်ရှင်းပြခဲ့ပါတယ်။
Ref ; One News Myanmar
0 comments:
Post a Comment