ဒေါ်လာဈေးနှင့် ပြည်တွင်းရွှေဈေးနှုန်းများ အဆမတန်မြင့်တက်၍ မြန်မာကျပ်ငွေ တန်ဖိုးကျဆင်းကာ မြန်မာ့စီးပွားရေးကျဆင်းနေမှုနှင့်ပတ်သက်ပြီး စီးပွားရေးကဏ္ဍအသီးသီးမှ လုပ်ငန်းရှင်များက ဖြေရှင်းဆောင်ရွက်နိုင်မည့် နည်းလမ်းများကို အစိုးရထံ အကြံပြုဆွေးနွေးခဲ့ကြသည်။
အိမ်၊ ခြံ၊ မြေ ရောင်းဝယ်ငှားဝက်ဘ်ဆိုက် iMyanmarHouse.com က ဦးဆောင်၍ စက်တင်ဘာလ ၂၉ ရက်နေ့က ရန်ကုန်မြို့၊ မင်းရဲကျော်စွာလမ်းရှိ ကုန်သည်စက်မှုအသင်းချုပ်တွင် ပြုလုပ်သည့် “မြန်မာ့စီးပွားရေး ဘာလဲ ဘယ်လဲ” ဟောပြောဆွေးနွေးပွဲတွင် ဆွေးနွေးအကြံပြုခဲ့ကြခြင်းဖြစ်သည်။
“မြန်မာ့စီးပွားရေးက အလားအလာလည်း မကောင်းဘူး။ လက်ရှိလည်း မကောင်းဘူး။ အလားအလာကောင်းအောင် အစိုးရအနေနဲ့ အများကြီးပြုပြင်ဖို့လုပ်ရမယ်။ အရပ်ဘက် အဖွဲ့အစည်းတွေရဲ့အသံကို နားထောင်ရမယ်။ အကြံပေးတွေရဲ့စကားပဲ နားထောင်ပြီး လုပ်နေလို့အဆင်မပြေဘူး”ဟု မြန်မာနိုင်ငံ အိမ်၊ ခြံ၊ မြေလုပ်ငန်း ဖွံ့ဖြိုးတိုးတက်ရေးအသင်း ဒုတိယဥက္ကဋ္ဌ ဦးစိုင်းခွန်နောင်က ပြောဆိုသည်။
အစိုးရအနေနှင့် ပြည်တွင်းထုတ်ကုန်များ ပြည်ပတင်ပို့ရာတွင် ကန့်သတ်ချက်အချို့ ဖြေလျှော့ပေးရန်၊ ပြည်ပရင်းနှီးမြှုပ်နှံမှုများ ဝင်ရောက်လာစေရန်အတွက် အခွန်အခအချို့လျှော့ချပေးခြင်း၊ ကွန်ဒိုများကို နိုင်ငံခြားများဝယ်ယူခွင့် အလွယ်တကူခွင့်ပြုပေးရန်၊ နိုင်ငံခြားဝင်ငွေ အဓိကရှာဖွေပေးနိုင်သည့် ခရီးသွားကဏ္ဍကို အားပေးကူညီပေးရန် စသည့်အချက်များ ဆောင်ရွက်သင့်ကြောင်း SMART Group ကုမ္ပဏီဥက္ကဋ္ဌ ဦးကျော်ကျော်လှိုင်က ပြောကြားသည်။
၂၀၁၆ ခုနှစ်က အမေရိကန် တစ်ဒေါ်လာဈေးနှုန်းသည် ၁၄၀၀ ကျပ် ပေါက်ဈေးရှိခဲ့ပြီး ယခု တစ်ဒေါ်လာလျှင် ၁၅၆၀ ကျပ် ပေါက်ဈေးရှိကာ မြန်မာကျပ်ငွေသည် ၁၅ ရာခိုင်နှုန်း တန်ဖိုးကျဆင်းနေကြောင်း ၎င်းက ပြောဆိုသည်။
“လုပ်ထုံးလုပ်နည်းတွေ ဆင့်ကဲဆင့်ကဲ ဖြစ်နေတာ။ တာဝန်ယူမှု၊ တာဝန်ခံမှု မရှိတာတွေက ဒီစီးပွားရေးမှာ အခက်အခဲတစ်ခုဖြစ်နေတယ်”ဟု MK ဆောက်လုပ်ရေးကုမ္ပဏီဥက္ကဋ္ဌ ဦးမျိုးမြင့်က ပြောကြားသည်။
လက်ရှိမြန်မာ့စီးပွားရေးအခြေအနေသည် ပြည်တွင်းလေကြောင်းလိုင်း လေးခုရပ်နားခြင်း၊ ပြည်ပရင်းနှီးမြှုပ်နှံမှုများ မျှော်မှန်းသည်ထက် ဝင်ရောက်မှုမရှိခြင်း၊ ဝင်ရောက်ပြီးသား ပြည်ပရင်းနှီးမြှုပ်နှံမှုအချို့ ပြန်ထွက်သွားခြင်း၊ ဒေါ်လာဈေးနှင့် ရွှေဈေး စံချိန်တင်မြင့်တက်ခြင်း၊ ၂၀၁၈-၁၉ ဘဏ္ဍာနှစ်အတွင်း ကုန်သွယ်မှုလိုငွေ ကျပ်ဘီလီယံ ၅၀၀၀ နီးပါးရှိခြင်း စသည့်အခြေအနေများ ဖြစ်ပေါ်လျက်ရှိကြောင်း ယင်းဆွေးနွေးပွဲထံမှ သိရသည်။
အဆိုပါအခြေအနေများ ဖြစ်ပေါ်နေမှုနှင့်ပတ်သက်၍ ဆွေးနွေးပွဲတွင် အဖြေရှာရရှိသည့်အချက်များကို ပြည်ထောင်စုအစိုးရထံ အကြံပြုတင်ပြသွားမည်ဖြစ်ပြီး ဝန်ကြီးဌာနတစ်ခုနှင့်တစ်ခုအကြား ချိတ်ဆက်မှုမရှိခြင်း၊ ပြဋ္ဌာန်းထားသည့်ဥပဒေများ များပြားခြင်း၊ လိုအပ်သည့်ဥပဒေများကို အမြန်ဆုံးပြဋ္ဌာန်းပေးရန်၊ ကြိုးနီစနစ်ကို ပယ်ဖျက်ပေးရန် စသည့်အချက်များကိုပါ ထည့်သွင်းအကြံပြု တင်ပြသွားမည်ဖြစ်ကြောင်း ဆွေးနွေးပွဲထံမှသိရသည်။
“တကယ်အကောင်အထည်ဖော်တဲ့နေရာမှာ ပူးပေါင်းဆောင်ရွက်မှု အားနည်းတယ်။ ဥပဒေတွေတော့ အများကြီးထုတ်နေတယ်။ မော်တော်ယာဉ် ဥပဒေဆို ၂၀၁၅ ခုနှစ်က ထွက်ထားတယ်။ နည်းဥပဒေက အခုထိမထွက်သေးဘူး”ဟု Farmer Auto ကုမ္ပဏီဥက္ကဋ္ဌ ဒေါက်တာစိုးထွန်းက ဆိုသည်။
ဩဂုတ်လ ၂၅ ရက်နေ့က ထုတ်ပြန်ခဲ့သည့် ကုန်သည်စက်မှုအသင်းချုပ်က ဦးဆောင်ကောက်ယူထားသည့် မြန်မာ့စီးပွားရေးစစ်တမ်းအရ ၂၀၁၈ ခုနှစ်တွင် ကုန်ထုတ်လုပ်မှု၊ ဝန်ဆောင်မှု၊ သွင်းကုန်၊ ပို့ကုန် အစရှိသည့် ကဏ္ဍများအားလုံး ကျဆင်းနေသည်ဟု စီးပွားရေးလုပ်ငန်းပေါင်း ၂၅၀၀ ကျော်ထံမှ စစ်တမ်းကောက်ယူရရှိထားကြောင်း အသင်းချုပ် ထုတ်ပြန်ချက်အရသိရသည်။
The Voice
0 comments:
Post a Comment