ရန်ကုန်တိုင်းဒေသကြီး မြောက်ဥက္ကလာပ မြို့နယ် ရွှေပေါက္ကံမြို့ (၁၄)ရပ်ကွက် တကောင်း (၁)လမ်းနေ တတိယတန်းကျောင်းသားတစ် ဦးအား စက်တင်ဘာ ၂၇ ရက်တွင် အမည် မသိ အမျိုးသားတစ်ဦးက ပြန်ပေးဆွဲ၍ ငွေတောင်းမှု ဖြစ်ပွားခဲ့ကြောင်း သိရှိရသည်။ ဖြစ်စဉ်မှာ မြောက်ဥက္ကလာပမြို့နယ် ရွှေပေါက္ကံ (၁၄)ရပ်ကွက် အမှတ်(၁၄/၇) မ-၈၃၁ နေ ဦးအေးထွန်းနှင့် ဒေါ်သဲစုတို့၏ သား မောင်ထွဋ်အာကာဖြိုးသည် စက်တင် ဘာ ၂၇ ရက် ညနေ ၃ နာရီခန့်တွင် ဈေးဝယ်ထွက်သွားရာမှ ပြန်လည်ရောက်ရှိလာ ခြင်းမရှိသဖြင့် ၄င်း၏ မိဘများသည် ညနေ ၄ နာရီမှစ၍ ရှာဖွေမှုများ ပြုလုပ်ခဲ့ကြပြီး ထူးခြားမှုမရှိသောကြောင့် ည ၆ နာရီခွဲတွင် ရွှေပေါက္ကံနယ်မြေရဲစခန်းသို့ လူပျောက် တိုင်ကြား၍ အမှုဖွင့်လှစ်ခဲ့ရာ ၄င်းရဲစခန်းမှ လူပျောက်အမှတ်စဉ်၊ ၁၄/၂ဝ၁၈ ဖြင့် အမှု လက်ခံထားကြောင်း သိရှိရသည်။
ယင်းနေ့ ည ၇ နာရီခွဲခန့်တွင် အမျိုးသား တစ်ဦးက ဝ၉-၈၉၈ဝ၄၃၉၂၂ ဖုန်းနံပါတ်ဖြင့် မောင်ထွဋ်အာကာဖြိုး၏ မိဘများထံသို့ ငွေ ကျပ် ၁၅ သိန်းပေးအပ်ရန် မြောက်ဥက္ကလာပ မြို့နယ် ခြောက်ကွေ့လမ်းဆုံသို့လည်းကောင်း၊ည ၉ နာရီခန့်တွင် မင်္ဂလာဒုံမြို့နယ် အမှတ် (၃)လမ်းပေါ်ရှိ နီလာမှတ်တိုင်နေရာသို့လည်း ကောင်း၊ ည ၁ဝ နာရီခွဲခန့်တွင် မင်္ဂလာဒုံမြို့ နယ် ပြည်လမ်းပေါ်ရှိ ရွှေညောင်ပင်မှတ်တိုင် နေရာသို့လည်းကောင်း နေရာပြောင်းကာ ချိန်းဆိုဆက်သွယ်ခဲ့ကြောင်း သိရှိရသဖြင့် အဆိုပါနေရာများသို့ မြန်မာနိုင်ငံရဲတပ်ဖွဲ့နှင့်ဌာနဆိုင်ရာတာဝန်ရှိသူများပါဝင်သော ပူးပေါင်း အဖွဲ့က သွားရောက်ရှာဖွေစုံစမ်းခဲ့သည်။ အဆိုပါဖြစ်စဉ်ဖြစ်ပွားရာနယ်မြေအလိုက် သက်ဆိုင်ရာတာဝန်ရှိသူများက လိုက်လံ ရှာဖွေစုံစမ်းစစ်ဆေးမှုများပြုလုပ်နေစဉ် ယနေ့နံနက် ၆ နာရီခန့်တွင် တတိယတန်း ကျောင်းသား မောင်ထွဋ်အာကာဖြိုးကို ၄င်း နေထိုင်ရာရပ်ကွက် တကောင်း(၁)လမ်းထိပ်၌ ကားတစ်စီးက လာရောက်ချထားခဲ့သဖြင့် ပြန်လည်တွေ့ရှိခဲ့ပြီး နယ်မြေရဲစခန်းမှ လည်း အမှုပိတ်သိမ်းခဲ့ကြောင်း သတင်းရရှိသည်။
ရန်ကင်း
0 comments:
Post a Comment