စစ်ကိုင်းတိုင်းဒေသကြီး၊ ယင်းမာပင်မြို့နယ်၊ ပြန်လှည့်ကျေးရွာမှာ ဇူလိုင် ၃၁ ရက်က မီးလိုင်းသွယ်တန်းသူတွေက ရွာထဲက ဖြတ်ကာ အုန်းတောကျေးရွာမီးလင်းရေးအတွက် လျှပ်စစ်မီးသွယ်တန်းဖို့ လုပ်ဆောင်ရာကနေ ရုန်းရင်းဆန်ခတ် ဖြစ်ပွားခဲ့ပါတယ်။
ဒါနဲ့ပတ်သက်ပြီး လုံခြုံရေး လိုက်ပါဆောင်ရွက်ပေးတဲ့ ရဲတပ်ဖွဲ့က လူစုခွဲ ပစ်ခတ်ရာက ရွာသား ၄ ဦး သေနတ်ထိမှန်ကာ မုံရွာဆေးရုံကြီးကို အတွင်းလူနာအဖြစ် ပို့ဆောင် ဆေးကုသမှု ခံယူနေရပါတယ်။
ဒီကိစ္စနဲ့ပတ်သက်ပြီး ယင်းမာပင်မြို့နယ် စီမံခန့်ခွဲမှုကော်မတီဥက္ကဋ္ဌ ဦးရဲလင်းအောင်ကို ဆက်သွယ်မေးမြန်းခဲ့ပေမယ့် ခရိုင်ရုံးမှာ အစည်းအဝေး လုပ်နေဆဲ ဖြစ်တာကြောင့် မဖြေကြားနိုင်သေးတဲ့ အကြောင်းပြောပါတယ်။
ရုန်းရင်းဆန်ခတ်မှုအတွင်း ကိုကျော်ဇင်မောင်၊ ကိုကြည်ထွန်း၊ ဦးမျိုးထွန်း၊ ဦးဘိုကျော်တို့ ၄ ဦးမှာ မစိုးရိမ်ရတဲ့ သေနတ်ဒဏ်ရာတွေ ရရှိခဲ့ပြီး ဆေးကုသမှု ခံယူနေရတာပါ။
ဒေသခံမအေးနွယ်က“မနက်ကတည်းက ရွာထဲက ဖြတ်ပြီး မီးတိုင်လာစိုက်တယ်။ ရွာက လက်မခံလို့ စိုက်ပြီးသား ပြန်နုတ်ဖို့ ပြောတယ်။ ၂ တိုင်လောက် ကျန်တာမှာ နေ့လယ်ဘက်မှာ ရဲတွေ ထပ်ရောက်လာပြီး ပစ်တာ။ ရွာက ကန့်ကွက်တာက ရွာထဲက လမ်းကျဉ်းတာ၊ လျှပ်စစ်မီးအန္တရာယ် စိုးရိမ်တာတွေကြောင့် ရွာထဲမှာ မီးတိုင်စိုက်မှာ မလိုတာ။ ရွာပြင်ကဆို လက်ခံတယ်။ တခြားကနေလည်း စိုက်စရာ နေရာရှိရဲ့သားနဲ့ ရွာထဲကဖြတ်တော့ အခုလိုဖြစ်တာပဲ” လို့ ပြောပါတယ်။
အဆိုပါဖြစ်စဉ်အတွင်း ရွာသား ၄ ဦး သေနတ်ဒဏ်ရာရခဲ့တဲ့အပြင် တားဆီးခဲ့တဲ့ အမျိုးသမီးတဦးကိုလည်း ရဲတပ်ဖွဲ့က ဖမ်းဆီးကာ အချုပ်ကားပေါ် တင်ခေါ်တဲ့အတွက် ရွာသားတွေက အချုပ်ကားကို တားဆီးကာ ပြန်လွှတ်ပေးဖို့ တောင်းဆိုတာကြောင့် အဖမ်းခံရတဲ့ အမျိုးသမီး တဦးကို ပြန်လွှတ်ပေးထားခဲ့ပါတယ်။
ဒီကိစ္စနဲ့ပတ်သက်ပြီး သက်ဆိုင်ရာ ရဲတပ်ဖွဲ့ကို ဆက်သွယ်နေပေမယ့် ဆက်သွယ်လို့ မရသေးပါဘူး။
စစ်ကိုင်းတိုင်းအစိုးရကလည်း တိုင်းအတွင်းလျှပ်စစ်ဓာတ်အားလိုင်း တည်ဆောက်ရာမှာ ကန့်ကွက်တားဆီးနေတဲ့အပေါ် ခရိုင်စီမံခန်ခွဲရေးကော်မတီအနေနဲ့ တားဆီးသူတွေကို ခေါ်ယူတွေ့ဆုံ ညှိနှိုင်းကြဖို့နဲ့ ဆက်လက်ကန့်ကွက်နေမယ်ဆိုရင် တည်ဆဲဥပဒေနဲ့ အရေးယူဖို့ကို မေ ၂၀ ရက်နေ့ကတည်းက စစ်ကိုင်းတိုင်း လျှပ်စစ်လမ်းပန်းဝန်ကြီး ဦးသန့်ညွန့်ဝင်း လက်မှတ်ရေးထိုးကာ ခရိုင်စီခန့်ကော်မတီတွေကို အသိပေးစာ ထုတ်ပြန်ထားပါတယ်။
အစိုးရအနေနဲ့ လျှပ်စစ်ဓာတ်အားရရှိရေး စီမံကိန်းအရ စစ်ကိုင်းတိုင်းအတွင်း ကျေးရွာ ၉၁၁ ရွာကို လျှပ်စစ်မီး သွယ်တန်းသွားမယ်လို့ သိရပါတယ်။
DVB
0 comments:
Post a Comment