ထိုင်းတောင်ပိုင်း၊ ရနောင်းမြို့ရှိ ရနောင်းဌာနီကျောင်းမှာ ထိုင်း ဥပဒေနဲ့ညီညွှတ်မှုမရှိဘဲ ပညာသင်ပေးနေလို့ ဖမ်းဆီးခံထားရတဲ့ မြန်မာနိုင်ငံက ဆရာဆရာမ ၃၂ ဦး မနေ့ညနေက ပြန်လွတ်လာကြပြီ ဖြစ်ပါတယ်။
အဆိုပါ ဆရာဆရာမတွေဟာ ခွင့်ပြုချက်မရတဲ့ ကျောင်းဆရာအလုပ်ကို ဝင်ရောက်လုပ်ကိုင်နေတာကြောင့် ရနောင်းခရိုင်အလုပ်သမားရုံးက ဒဏ်ငွေ ဘတ် ၅၀၀၀ စီ တပ်ပြီး မနေ့ညနေ ၅ နာရီခွဲလောက်က ပြန်လွှတ်ပေးလိုက်တာလို့ ထိုင်းတောင်ပိုင်း ပညာရေးနဲ့ ဖွံ့ဖြိုးတိုးတက်ရေး ဖောင်ဒေးရှင်း၊ ရွှေ့ပြောင်းအလုပ်သမားရေးရာမှ ကိုမင်းဦးက ဒီဗွီဘီကို ပြောပါတယ် ။
“အလုပ်သမားဥပဒေမှာ ဝန်ကြီးဌာနကပြဋ္ဌာန်းထားတဲ့ ဖောရောဘော ဆိုတဲ့ ဥပဒေနဲ့ အလုပ်သမားဝန်ကြီး ဌာနလက်အောက်ခံ အလုပ်သမားစီမံခန့်ခွဲရေး စည်းကမ်းသတ်မှတ်ချက် ဖောရောကော ဆိုတာရှိတယ်။ ဆရာ ဆရာမတွေကိစ္စမှာ သက်ညှာစွာနဲ့ ဖောရောဘောဥပဒေနဲ့ မဆုံးဖြတ်ဘဲ အောက်ခြေစည်းကမ်း သတ်မှတ်ချက်နဲ့ပဲ ဆုံးဖြတ်ပေးလိုက်တာကြောင့် တယောက်ကို ဘတ် ၅၀၀၀ ဒဏ်ကြေးသွင်းပြီး မနေ့ညနေက အားလုံးပြန်လွတ်လာပါပြီခင်ဗျ ။ ဒါပေမယ့် ကလေးတွေကို စာသင်လို့တော့မရဘူး ၊ အလည်အပတ်ပရမယ်”
အလုပ်သမားဝန်ကြီးဌာနဥပဒေနဲ့ ပြစ်ဒဏ်ချမယ်ဆိုရင် ဆရာဆရာမတွေဟာ တရားရုံးတက်ရမှာဖြစ်ပြီး ငွေဒဏ်အနည်းဆုံး ဘတ်ငွေ ၅၀၀၀ ကနေ ၅၀၀၀၀ အထိ ကျခံရမှာဖြစ်ကာ ပြည်နှင်ဒဏ်ပါပေးခံရမှာဖြစ်ပါတယ်။
အခုလို ဆရာ/ဆရာမတွေ ပြန်လွတ်လာပေမယ့် စာသင်ခွင့်မရှိတော့တာကြောင့် ရနောင်းဌာနီကျောင်းက ကျောင်းသူကျောင်းသားပေါင်း ၁၀၀၀ ကျော် ဆရာမဲ့ဖြစ်သွားကြောင်း ၊ ကျောင်းဝင်စစ်ခံရကတည်းက ရနောင်းဌာနီကျောင်းနဲ့တကွ ရနောင်းခရိုင်ရှိ နားလည်မှုနဲ့ ဖွင့်ထားတဲ့ ရွှေ့ပြောင်းလုပ်သားကျောင်း ၊ learning Center တွေ စုစုပေါင်း ၁၀ ကျောင်းလောက်ပိတ်ထားရဆဲဖြစ်ပါတယ်။
ကျောင်းတွေပြန်ဖွင့်နိုင်ဖို့၊ ဆရာဆရာမတွေ ခန့်ထားနိုင်ဖို့ လောလောဆယ် ထိုင်းတောင်ပိုင်း ပညာရေးနဲ့ ဖွံ့ဖြိုးတိုးတက်ရေး ဖောင်ဒေးရှင်း FED အဖွဲ့၊ ရနောင်းခရိုင်ရှိ ကလေးသူငယ် အခွင့်အရေးဆိုင်ရာ အဖွဲ့အစည်း၊ ထိုင်းနိုင်ငံဆိုင်ရာမြန်မာသံရုံး ညွှန်ကြားချက်အရ ရောက်ရှိလာတဲ့ အလုပ်သမားသံအရာရှိ၊ လူမှုဖွံ့ဖြိုးရေး အဖွဲ့တွေက သက်ဆိုင်ရာထိုင်းအာဏာပိုင်၊ ပညာရေးဌာန တို့နဲ့ ဆွေးနွေးညှိနှိုင်းဖို့ ဆောင်ရွက်နေကြပါတယ်။
ရနောင်းမြို့က ရနောင်းဌာနီကျောင်းဟာ မြန်မာရွှေ့ပြောင်းလုပ်သားရင်သွေးငယ်တို့ ပညာရေးအတွက် လွန်ခဲ့တဲ့ ၁၀ နှစ်ကျော်ကတည်းက ဖွင့်လှစ်ထားခဲ့ပေမယ့် ထိုင်းနိုင်ငံ ဥပဒေနဲ့အညီ တရားဝင်မှတ်ပုံတင်လို့ မရသေးပါဘူး။
ပြီးခဲ့တဲ့ စနေနေ့ကတော့ ထိုင်းအာဏာပိုင်တွေက အဆိုပါကျောင်းကို ရှောင်တခင်ဝင်ရောက် စစ်ဆေးပြီး ဥပဒေနဲ့ မညီတဲ့ ဆရာဆရာမတွေကို ဖမ်းဆီး ခေါ်ဆောင်သွားခဲ့တာပါ။
DVB
0 comments:
Post a Comment