ရခိုင်ပြည်နယ်၊ တောင်ကုတ်မြို့နယ်မှာ သြဂုတ်လ ၂၆ ရက် ညနေပိုင်းက ကိုရင်ကြီး တပါး လည်လှီးသတ်ဖြတ်ခံခဲ့ရတယ်လို့ မြို့နယ်ရဲတပ်ဖွဲ့က ဒီဗွီဘီကို အတည်ပြုပြောပါတယ်။
မနေ့ ညနေ ၃ နာရီလောက်မှာ တောင်ကုတ်မြို့နယ် ကင်းတောင်ကျေးရွာအနီးက ကိုးနဝင်းတောင်ထိပ်ကို စိတ်မနှံ့သူ တဦးရောက်ရှိလာပြီး သက်တော် (၇၈)နှစ်အရွယ် ကိုရင်ကြီး ဦးအာစာရကို သတ်ဖြတ်ခဲ့သွားတာလို့ ကင်းတောင်ကျေးရွာအုပ်ချုပ်ရေးမှူး ဦးသောင်းထွန်းက ပြောပါတယ်။
“စစ်တိုင်းရွာက သူကစိတ်ဖောက်နေတာ။ ကင်းတောင်မှာနေတဲ့ သူ့အမေက သူ့သားကို ဆေးကုဖို့သွားခေါ်တာ။ အဲဒီမှာထွက်ပြေးသွားပြီး ကင်းတောင်ရွာက ကိုးနဝင်းတောင်ထိပ်ကို ရောက်သွားတာ။ ရောက်သွားပြီးတော့ အဲဒီမှာနေတဲ့ ဘုန်းကြီးတွေကို ရန်ရှာပြီးတော့ ပြဿနာဖြစ်တယ်ပေါ့။ သူက စိတ်ဖောက်ပြီးတော့ အဲဒီမှာ ကိုရင်ကြီးကို ဓါးနဲ့ ခုတ်တာပေါ့လေ။ လည်ပင်းကို”လို့ ဦးသောင်းထွန်းက ပြောပါတယ်။
အခင်းဖြစ်ပွားပြီးနောက်မှာ အဲ့ဒီ တောင်ထိပ်မှာနေထိုင်တဲ့ နောက်ထပ် ရဟန်းတပါးနဲ့ သေဆုံးသွားတဲ့ ကိုရင်ကြီးဦးအာစာရရဲ့ သားဖြစ်တဲ့ ကိုရင်ငယ်တပါးတို့ ရွာထဲလာရောက် သတင်းပေးပို့လာလို့ရဲတပ်ဖွဲ့ရဲ့အကူအညီနဲ့ သတ်ဖြတ်သွားသူကို အခင်းဖြစ်တဲ့ နေရာမှာပဲ သွားရောက်ဖမ်းဆီးနိုင်ခဲ့တယ်လို့ ဆိုပါတယ်။
ကိုရင်ကြီးကို သတ်ဖြတ်သွားတဲ့သူဟာ စစ်ကိုင်းကျေးရွာကနေ ကင်းတောင်ကျေးရွာကို ဆေးကုသမှုခံယူဖို့ ရောက်ရှိနေတဲ့ အသက်(၃၄) နှစ်အရွယ် ဦးငပု (ခ) ဖိုးကျော်ဖြစ်ပြီး စိတ်မနှံ့သူဖြစ်ကြောင်း ကျေးရွာအုပ်ချုပ်ရေးမှူးရဲ့ ပြောဆိုချက်အရ သိရပါတယ်။
လက်ရှိမှာတော့ ပြစ်မှူးကျူးလွန်သူကို တောင်ကုတ်မြို့နယ် ရွာမကျေးရွာရဲစခန်းမှာ ဖမ်းဆီးထားပြီး အမှုဖွင့်ဆောင်ရွက်နိုင်ရေး ဆက်လက်ဆောင်ရွက်နေတယ်လို့ တောင်ကုတ်ရဲတပ်ဖွဲ့ တာဝန်ရှိသူတွေက ပြောပါတယ်။
သတင်း-ဝဏ္ဏခွာညို
DVB
0 comments:
Post a Comment