ဆရာတော်ဦးဝီရသူကို နိုင်ငံတော်အကြည်ညို ပျက်စေမှုနဲ့ အရေးယူပေးဖို့ တရားရုံးကို ဦးတိုက် လျှောက် ထားလာတဲ့အပေါ် တရားရုံးက ဖမ်းဝရမ်းထုတ်ပေးလိုက်ပြီလို့ အနောက်ပိုင်းခရိုင်တရားရုံးရဲ့ သတင်းပြန်ကြားရေးအရာရှိ ဦးမင်းသန့် ကအတည်ပြု ပေးပါတယ်။
တရားလိုကတော့ ရန်ကုန် အနောက်ပိုင်းခရိုင်၊ ဒုတိယ အထွေထွေအုပ်ချုပ်ရေးမှူး ဖြစ်ပြီး ရာဇသတ်ကြီး ပုဒ်မ ၁၂၄ (က) နဲ့ တရားရုံး ကို ဦးတိုက်လျှောက်ထားခဲ့တာလို့ဆိုပါတယ်။
ပုဒ်မ ၁၂၄ (က) ဟာနိုင်ငံတော်ကိုအကြည်ညို ပျက်အောင်ပြု လုပ်တာနဲ့သက်ဆိုင်တဲ့ပုဒ်မလည်းဖြစ်ပြီး ပြစ်မှု ထင်ရှားရင်တော့ အမြင့်ဆုံးပြစ်ဒဏ်အဖြစ် ထောင်ဒဏ်တစ်သက်တစ်ကျွန်းအထိချမှတ် နိုင်တဲ့ ပုဒ်မလည်းဖြစ်ပါတယ်။
ဒီပုဒ်မနဲ့တိုင်တန်းခံရရင် ရဲအရေးမပိုင်တဲ့ပုဒ်မတစ်ခုဖြစ်တာကြောင့် တရားရုံးက ဝရမ်းထုတ်ပေးမှသာ စွပ်စွဲခံရသူကို စစ်ဆေးနိုင်မှာဖြစ်တယ်လို့ ဥပဒေအကြံပေးတစ်ဦးဖြစ်တဲ့ ဦးခင်မောင်မြင့်က ဆိုပါတယ်။
ပြီးခဲ့တဲ့ ဧပြီလကုန်ပိုင်းက မြိတ်မြို့မှာပြုလုပ်တဲ့ ပုဒ်မ ၅၉ (စ) မပြင်ဆင်ရေးထောက်ခံဆန္ဒပြပွဲတစ်ခုမှာ ဆရာတော်ဦးဝီရသူဟောပြောချက်အချို့ဟာ လူမှုကွန်ရက်မှာ ပျံနှံခဲ့ပြီးဝေဖန်မှုတွေရှိခဲ့တာပါ။
အဲဒီနောက် ဆရာတော်ဦးဝီရသူကို တရားစွဲနိုင်ဖို့အတွက် အမှုတည်ဆောက်နေတဲ့အကြောင်း သာသနာရေးနဲ့ယဉ်ကျေးမှု ဝန်ကြီးဌာနရဲ့တာဝန်ရှိသူတွေကမကြာသေးမီရက်ပိုင်းတွေက ထုတ် ပြောထားတာလည်းရှိပါတယ်။
အခုလို တရားရုံးကို ဦးတိုက်လျှောက်ထားခံရတာနဲ့ပတ်သက်ပြီး ဆရာတော်ဝီရသူ ဘက်ကို ဆက်သွယ်မေးမြန်းခဲ့ပေမယ့် အဆက်အသွယ်မရသေးပါဘူး။
တရားရုံးက ဝရမ်းထုတ်လိုက်ပြီဆိုပေမယ့် ဆရာတော်ဦးဝီရသူ သီတင်းသုံးတဲ့ မစိုးရိမ်တိုက်သစ် ရှိရာ မဟာအောင်မြေ ရဲစခန်းကို ဆက်သွယ်မေးမြန်းရာမှာတော့ မဟာအောင်မြေရဲတပ်ဖွဲ့မှူး ရဲမှူး ဝင်းနိုင်က ဒီကနေ့ မနက်ပိုင်းအထိ သူတို့ဆီကို ဝရမ်းရောက်လာတာမရှိသလို တစ်စုံတစ်ရာအကြောင်းကြားလာတာ မျိုးလည်းမရှိဘူးလို့ဆိုပါတယ်။
ဆရာတော်ဦးဝီရသူကိုတော့ မနက်ဖြန် မေလ ၃၀ ရက်မှာ လာရောက်ပြီး သြဝါဒ ခံယူဖို့ ရန်ကုန်တိုင်းသံဃနာယက အဖွဲ့က အကြောင်းကြားထားတာလည်းရှိနေပါတယ်။
ဒီလိုသြဝါဒ ခံယူဖို့အတွက် မန္တလေးတိုင်း သာသနာရေးဦးစီးဌာနရဲ့ တာဝန်ရှိသူက ဆရာတော်ဦးဝီရသူ ဆီ ဖုန်းဆက်ပြီး လျှောက်ထားတဲ့ အသံဖိုင်ဟာ လူမှုကွန်ရက်မှာ ပျံလာ ပါသေးတယ်။
သြဝါဒ ခံယူဖို့ အကြောင်းကြားထားတဲ့အကြောင်းကတော့ ပြီးခဲ့တဲ့နှစ်က ရန်ကုန်မှာ ဟောပြောခဲ့တဲ့ အကြောင်းအရာ အချို့ကြောင့်ဖြစ်တယ်လို့ သိရပါတယ်။
သတင်း - စောအောင်မင်းဦး ၊ ဓာတ်ပုံ - EPA
7Day News Journal
0 comments:
Post a Comment