မြန်မာ့လွတ်လပ်ရေးဗိသုကာ အမျိုးသားခေါင်းဆောင်ကြီး ဗိုလ်ချုပ်အောင်ဆန်း ရုပ်ပုံ ရိုက်နှိပ်ထားတဲ့ စံချိန်မီ တစ်မတ်သား ရွှေဒင်္ဂါးတွေကို မြန်မာနိုင်ငံတော်ဗဟိုဘဏ်က ရောင်းချပေးသွားဖို့ ရှိနေပါတယ်။
ရောင်းချမယ့် တစ်မတ်သား ရွှေဒင်္ဂါးဟာ အချင်း ၁၈ ဒသမ သုည မီလီမီတာ၊ အထူ ၁ ဒသမ သုည မီလီမီတာရှိပြီး ဒင်္ဂါးရဲ့ မျက်နှာပိုင်းဗဟိုမှာ ဗိုလ်ချုပ်အောင်ဆန်းပုံနဲ့ ပုံအောက်မှာ Aung San အမည်ပါရှိတယ်လို့ ဆိုပါတယ်။
ဒင်္ဂါးရဲ့အနားပတ်လည်မှာ “Central Bank of Myanmar”၊ “4.082 gm 999.9 Fine Gold”လို့ အင်္ဂလိပ်စာလုံးနဲ့ ဖော်ပြထားပြီး အခြားတစ်ဖက် မျက်နှာပြင်မှာ ”မြန်မာနိုင်ငံတော် ဗဟိုဘဏ် ၂ဝ၁၈၊ ၁ မတ်သား၊ ၉၉၉ ဒသမ ၉ သန့်စင်ရွှေ”လို့ မြန်မာစာလုံးနဲ့ ဖော်ပြထားတယ်လို့ သိရပါတယ်။
တစ်မတ်သား ရွှေဒင်္ဂါး ဝယ်ယူတဲ့အခါ ရွှေဒင်္ဂါးပြားနဲ့အတူ ဗဟိုဘဏ်ဥက္ကဋ္ဌနဲ့ သွန်းလောင်းတဲ့ ဌာနအကြီးအကဲတို့ရဲ့ မှန်ကန်ကြောင်း ထောက်ခံချက်တွေလည်း တစ်ပေါင်းတည်း ပါရှိမယ်လို့ ဒီကနေ့ထုတ် နိုင်ငံပိုင်သတင်းစာမှာ ဖော်ပြပါတယ်။
တစ်မတ်သား ရွှေဒင်္ဂါးပြားတွေကို နေပြည်တော်၊ ရန်ကုန်နဲ့ မန္တလေးမှာ ရှိတဲ့ မြန်မာ့ကျောက်မျက်ရတနာ ရောင်းဝယ်ရေးလုပ်ငန်း အရောင်းဆိုင်တွေမှာ နေ့စဉ်ပေါက်ဈေးအပေါ် အလျော့တွက်နဲ့ ကုန်ကျစရိတ် ကျပ် ၁၂၅ဝဝ ထပ်ပေါင်းဈေးနှုန်းနဲ့ ဝယ်ယူရရှိနိုင်မှာ ဖြစ်ပါတယ်။
မြန်မာနိုင်ငံတော်ဗဟိုဘဏ်ဟာ တစ်ကျပ်သား၊ ငါးမူးသားနဲ့ တစ်မတ်သား စံချိန်မီ ရွှေဒင်္ဂါး အမျိုးအစား သုံးမျိုးကို ၁၉၉၁ ခုနှစ်ကတည်းက စတင်ထုတ်ဝေခဲ့တာပါ။
တစ်ကျပ်သား ရွှေဒင်္ဂါးရဲ့ မျက်နှာပိုင်းဗဟိုမှာ ကြယ်တစ်ပွင့်ပုံ၊ ငါးမူးသား ရွှေဒင်္ဂါးရဲ့ မျက်နှာပိုင်းဗဟိုမှာ လယ်ထွန်သောပုံ၊ တစ်မတ်သား ရွှေဒင်္ဂါးရဲ့ မျက်နှာပိုင်းဗဟိုမှာ သစ်ဆွဲနေတဲ့ ဆင်ပုံတွေ သွန်းလောင်းထုတ်ဝေခဲ့တာဖြစ်ပြီး ခုအခါ တစ်မတ်သားရွှေဒင်္ဂါးတွေ လက်ကျန်မရှိတော့လို့ ဗိုလ်ချုပ်ရုပ်ပုံပါ ပုံစံသစ်နဲ့ အသစ်သွန်းလောင်း ထုတ်ဝေတာ ဖြစ်ပါတယ်။
ဓာတ်ပုံ-ကြေးမုံ
DVB
0 comments:
Post a Comment