ကရင်ပြည်နယ် ဘားအံမြို့နှင့် ပဲခူးတိုင်းဒေသကြီး မဒေါက်မြို့တို့တွင် မြစ်ရေ တိုးမှုများကြောင့် လာမည့် ၂ ရက်အတွင်း စိုးရိမ်ရေမှတ် ကျော်နိုင်ကြောင်း မိုးလေဝသနှင့် ဇလဗေဒ ညွှန်ကြားမှု ဦးစီးဌာန (မိုး/ဇလ) မှ သိရသည်။
သံလွင်မြစ်ရေ တိုးမှုကြောင့် ဘာအံမြို့နယ် နှင့် စစ်တောင်းမြစ်ရေကြောင့် မဒေါက်မြို့တို့တွင် စိုးရိမ်ရေအမှတ်ထက် ကျော်လာမည် ဖြစ်သည်ဟု ဆိုသည်။
“ဘားအံနဲ့ မဒေါက်ရယ် စိုးရိမ်ရေအမှတ် ကျော်ရင်ကျော်သွားမယ်။ ရေဝင်ရောက်မှုပေါ်မှာ မူတည်တာပေါ့နော် ကျနော်တို့ ဆီမှာ များသောအားဖြင့် စိုးရိမ်ရေအမှတ် ကျော်သွားရင် မြို့တွေ ရပ်ကွက်တွေထဲ ရေဝင်ရောက်လာတယ်။ တခြားနိုင်ငံ တွေ မှာ လိုတော့ ဗြုန်းစားကြီး ရေတအားကြီးတာမျိုးတော့ မဟုတ်ဘူး”ဟု မိုး/ဇလ ညွှန်ကြားရေးမှူးချုပ် ဦးကျော်မိုးဦး က ဧရာဝတီသို့ ပြောသည်။
ရေကြီးရေလျှံမှုကြောင့် မြို့တွင်းရေများ ဝင်ရောက်ပြီး လျှပ်စစ်ဘေး အန္တရာယ်၊ မြွှေ၊ ကင်း စသည့် ပိုးမွှား အန္တရာယ်၊ ဝမ်းပျက် ဝမ်းလျှော ရောဂါများကို သတိပြုရန် လိုအပ်ကြောင်းလည်း မိုး/ဇလ က သတိပေးထားသည်။
မြန်မာနိုင်ငံအတွင်း မိုးအဆက်မပြတ် ရွာသွန်းမှုကြောင့် ဧရာဝတီ၊ ချင်းတွင်း၊ စစ်တောင်း၊ ပဲခူး၊ သံလွင်၊ ငဝန်၊ တိုးမြစ် စသည့် မြစ်ကြီးများတွင် မြစ်ရေများ အသီးသီးမြင့်တက်လျက် ရှိပြီး တချို့မြို့များတွင် စိုးရိမ်ရေမှတ်နား ကပ်နေကြောင်း မိုး/ဇလ က သတင်းထုတ်ပြန်ထားသည်။
ဧရာဝတီမြစ်ရေသည် ဟင်္သာတမြို့တွင် မြို့၏ စိုးရိမ်ရေမှတ်သို့ ရောက်ရှိရန် ၂ ပေနီးပါးသာ လိုတော့ပြီး၊ ချင်းတွင်းမြစ်ရေ သည် ဖောင်းပြင်နှင့် မော်လိုက်မြို့တို့တွင် စိုးရိမ်ရေမှတ်သို့ ရောက်ရှိရန် ၃ ပေနီးပါးခန့်သာ လိုတော့ကြောင်း သိရသည်။
နောက် ၂ ရက်အတွင်း စစ်တောင်းမြစ်ရေ မြင့်တက်လာမှုကြောင့် စိုးရိမ်ရေမှတ်သို့ ရောက်ရှိမည့် ပဲခူးတိုင်း ဒေသကြီး၊ ညောင်လေးပင် မြို့နယ် မဒေါက်မြို့သည် နှစ်စဉ်နှစ်တိုင်း ရေကြီးနေကြ ဖြစ်သော်လည်း စိုးရိမ်ရသည့် အနေအထား မရှိ ကြောင်း ညောင်လေးပင်မြို့နယ် ပြည်နယ်လွှတ်တော် ကိုယ်စားလှယ် ဦးညီညီထွေး က ဧရာဝတီသို့ ပြောသည်။
ဦးညီညီထွေး က“ကျနော်တို့ဘက်က စစ်တောင်းရေကြီးတာတော့ ပုံမှန် နှစ်စဉ်နှစ်တိုင်းဖြစ်နေကြဆိုတော့ တော်ရုံစိုးရိမ်ရေ အမှတ် ကျော်တယ်ဆိုရင်တောင်မှ ကျနော်တို့ဘက်က စိုးရိမ်စရာ မရှိပါဘူး။ လမ်းတွေ ဘာတွေတော့ မြုပ်တာပေါ့ လူတွေ စိုးရိမ်ရတဲ့ အနေအထားတော့ မရှိဘူး။ စိုးရိမ်ရေအမှတ် တအားကျော်လွန်လာတယ် ဆိုရင်တော့ လူတွေ ပြောင်းရွှေ့ပြီး တော့ ကယ်ဆယ်ရေး စခန်းဖွင့်တာတွေတော့ ရှိပါတယ်။ အဲဒါကလည်း နှစ်တိုင်းတော့ မဖြစ်ပါဘူး”ဟု ဆိုသည်။
ဆက်လက်ပြီး ဦးညီညီထွေးက “သဘာဝ ဘေးအန္တရာယ် ကာကွယ်ရေး အဖွဲ့ဆိုပြီး မြို့အုပ်ချုပ်ရေးမှူး ဦးဆောင်ပြီးတော့ ဖွဲ့ထားတာတွေ ရှိပါတယ်။ လူမှုဝန်ထမ်း ကယ်ဆယ်ရေး အဖွဲ့ကလည်း ရေဘေးအန္တရာယ် ကာဆယ်ရေး အတွက်ကို စက်လှေ ၂စီး ဒီနှစ်မှာပဲ ကြိုပြီးတော့ ထောက်ပံ့ထားပါတယ်”ဟုလည်း ပြောပြသည်။
မွန်ပြည်နယ်၊ ကရင်ပြည်နယ် နှင့် တနင်္သာရီ တိုင်းတို့တွင် မိုးရွာသွန်းမှု ဆက်လက်ပိုနေမည် ဖြစ်ကြောင်း မိုး/ဇလ မှ သိရသည်။
စိုးရိမ်ရေအမှတ် ရောက်နိုင်သည့် မြို့များရှိ မြစ်ကမ်းအနီးနှင့် မြေနိမ့်ပိုင်း နေထိုင်သူများအနေဖြင့် အထူးသတိပြု နေထိုင်ရန်လည်း မိုး/ဇလ က သတိပေးထားသည်။
ဧရာဝတီ
0 comments:
Post a Comment