အမေရိကန်ပြည်ထောင်စု၊ ဖလော်ရီဒါ ပြည်နယ်မှ ကမ္ဘာလှည့်သာသနာပြု ဆရာတော် ရူးမား၏ ဆဋ္ဌမအကြိမ်မြောက် မြန်မာနိုင်ငံခရီးစဉ်တွင် မြို့နယ် ၄မြို့နယ်မှ ကျေးရွာ ၁၂ ရွာ၏ ဒေသနှင့် လူမှုဘဝဖွံ့ဖြိုး ရေးလုပ်ငန်းများအတွက် ကျပ်သိန်း ၁၂၀၀ ကျော်လှူဒါန်းခဲ့ကြောင်း ဆရာတော်၏ မြန်မာနိုင်ငံတာဝန်ခံ ဒါယကာ၊ ဒါယိကာမများထံမှ သိရှိရသည်။
ပုပ္ပားတောင်ခြေ ရွှေစည်တိုင် ကျေးရွာတွင် ဓမ္မာရုံတည်ဆောက်ပြီး ဆရာတော် ရူးမားကိုယ်တိုင် မတ်လ ၂၈ ရက်မွန်းလွဲပိုင်းက ဖွင့်လှစ်ပေးခဲ့သည်။ ယင်းဓမ္မာရုံသည် အလျား ၆၅ ပေ၊ အနံ ၃၅ ပေ၊ အမြင့်ပေ ၂၀ ရှိကာ ကျပ်သိန်း ၂၈၀ ကျော် ကုန်ကျပြီး ဆရာတော်ရူးမားဓမ္မာရုံရိပ်သာဟု အမည်ပေးထားကြောင်း ၎င်းတို့ထံမှ သိရှိရသည်။
ဓမ္မာရုံဝင်းအတွင်း ၄၈ သိန်းခန့် ကုန်ကျသော လေးခန်းတွဲသန့်စင်ခန်း၊ ၁၅ သိန်းခန့်ကုန်ကျသော ရေအုတ်ကန်တို့ ပါရှိကြောင်း၊ ဓမ္မာရုံဖွင့်ပွဲတွင် ရွှေစည်တိုင် ကျေးရွာ၊ ဖြူထွားကျေးရွာ၊ ဆင်လူးအိုင် ကျေးရွာတို့ရှိ အိမ်ထောင်စု ၁၈၀ ခန့်ကို တစ်အိမ်ထောင်လျှင် ဆန်ခြောက်ပြည်၊ ဆီတစ်ပိဿာ၊ ပဲငံပြာရည်တစ်ဘူးစီ လှူဒါန်းခဲ့ကြောင်း မြန်မာပြည်တာဝန်ခံ ဦးကျော်စွာဝင်းက ရှင်းပြသည်။
ထို့ပြင် ရွှေစည်တိုင်ကျေးရွာ လျှပ်စစ်မီးလင်းရေးအတွက် ကျပ်သိန်း ၁၅၀၊ ကျေးရွာဖွံ့ဖြိုးရေးလုပ်ငန်းများအတွက် သိန်း ၂၀ နှင့် ဆင်လူးအိုင်ကျေးရွာပညာရေးအတွက် ကျပ်သိန်း ၂၀ ဆက်လက်လှူဒါန်းခဲ့ကြောင်း၊ ဆရာတော်ရူးမားသည် ၂၀၁၂ ခုမှစပြီး သာသနာပြုလုပ်ငန်းများ ပြုလုပ်ပြီး ကျေးလက်နေလူထုဘဝကို ကူညီပေးနေကြောင်း ၎င်းက ရှင်းပြသည်။
မတ်လ ၂၉ရက်တွင် ညောင်ဦးမြို့နယ် ဇီးအိုကျေးရွာတွင် ငွေကျပ်သိန်း ၂၆၀ ကုန်ကျသော စက်ရေတွင်းတူးဖော်ပြီး၍ လှူဒါန်းခဲ့ပြီး ကျောက်ဆစ်ကန်ရွာနှင့် ဘုန်းတော်ကြီးရွာ စာသင်ကျောင်းဆောင် ဆောက်လုပ်လှူဒါန်းမည်ဖြစ်၍ ယင်းနေ့တွင် မတည်ငွေကျပ်သိန်း ၂၀ စီ၊ ကုန်းတန်းကြီးကျေးရွာရှိလမ်းများတွင် လျှပ်စစ်မီးလင်းရေး ငွေကျပ် သိန်း ၂၀၊ ဇီးယိုကျေးရွာရှိ ဆရာတော်လှူဒါန်းထားသော စက်ရေတွင်းခြံစည်းရိုးကာရန် ငွေကျပ်သိန်း ၂၀ လှူဒါန်းခဲ့သည်။
ထို့အပြင် ဆရာတော်က ကုန်းတန်းကြီး ကျေးရွာ၊ ကျောက်ဆစ်ကန်ကျေးရွာ၊ ဇီးအိုကျေးရွာတို့တွင် နေထိုင်သော အိမ်ထောင်စု ၅၃၂ စု အတွက် တစ်အိမ်ထောင်လျှင် ဆန်ခြောက်ပြည်၊ ဆီတစ်ပိဿာတစ်ဗူး၊ ပဲငံပြာရည်တစ်ပိဿာ တစ်ဘူးစီပေးဝေခြင်းနှင့် ယင်းကျေးရွာများရှိ ကျောင်းသား၊ ကျောင်းသူ ၃၀၂ ဦး အတွက် ဗလာစာအုပ် ၁၄၄ ဒါဇင်လှူဒါန်းခဲ့သည်။
ကျောက်ဆစ်ကန်ကျေးရွာတွင် ငွေကျပ်သိန်း ၁၅၀ ကုန်ကျသော စက်ရေတွင်း၊ အိမ်တိုင်ရာရောက် ရေပေးဝေမှုစနစ် ပိုက်လိုင်းသွယ်တန်းရန်အတွက် ငွေကျပ်သိန်း ၄၀ ၊ ကျေးရွာနေပြည်သူများ ရေသုံးစွဲမှုတွင် သက်သာစေရန် ရေမီတာခအတွက် တစ်လလျှင် ငွေကျပ် ၅ သောင်းနှုန်းဖြင့် ၅ နှစ်စာ ငွေကျပ်သိန်း ၃၀ လှူဒါန်းသည်။
မတ်လ ၃၀ ရက်တွင် ပခုက္ကူမြို့နယ် ဆိက္ခဝကျေးရွာအုပ်စု ကျွန်းသီရိကျေးရွာတွင် ယင်းကျေးရွာနှင့် ဇီးကုန်းကျေးရွာတို့ရှိ ဘုန်းတော်ကြီးသင်စာသင်ကျောင်းတွင် ယခုနှစ်အတွင်း စာသင်ခန်းဆောက်လုပ်နိုင်ရန် အလှူငွေ လှူဒါန်းခြင်းနှင့် ယင်းဘုန်းတော်ကြီးကျောင်းတွင် ယခင်နှစ်က စာကျောင်းဆောက်လုပ်ရန် ငွေကျပ် သိန်း ၄၀ လှူဒါန်းထားကြောင်း၊ ယင်းကျေးရွာရှိ အိမ်ထောင်စုများကို ဆန်ခြောက်ပြည်၊ ဆီတစ်ပိဿာတစ်ဘူး၊ ပဲငံပြာရည် တစ်ပိဿာ ဘူးတစ်ဘူးလှူဒါန်းခဲ့သည်။
ဆရာတော်သည် ဧပြီလ ၂ ရက်တွင် စစ်ကိုင်းမြို့နယ် ချောင်းမကြီးကျေးရွာ၊ ရှားရောင်းကျေးရွာ၊ ကင်းကျေးရွာတို့ရှိ လူဦးရေ ၁၉၆၀ လျှပ်စစ်မီးလင်းရေး လိုအပ်ငွေ ကျပ် ၄၅သိန်း လှူဒါန်းမည်ဖြစ်ပြီး ယင်းကျေးရွာတို့ရှိ အိမ်ထောင်စုများကို ဆန်၊ ဆီ၊ ပဲငံပြာရည်စသည်တို့ လှူဒါန်းသွားမည်ဖြစ်ကြောင်း ဒါယကာ၊ ဒါယိကာမများထံမှ သိရှိရသည်။
The Voice
0 comments:
Post a Comment