သရုပ်ဆောင် သင်ဇာဝင့်ကျော်ဟာ သူကိုယ်တိုင် ကြိုးကြိုးစားစား သဘာဝကျကျ ပြင်ဆင်ခဲ့ရတဲ့ “ပိုက်ဆံ” ရုပ်ရှင်ဇာတ်ကားကြီးကို ရိုက်ကူးစဉ်က ပင်ပင်ပန်းပန်းနဲ့ ရိုက်ကူးခဲ့ရတယ်လို့ ဆိုပါတယ်။ ဒီဇာတ်ကားကို ရုံတင် မပြသတော့ဘဲ ရုံတင်ဇာတ်ကားကြီးကနေ ဇာတ်လမ်းတွဲအဖြစ် ပြသသွားမှာ ဖြစ်ပြီး ဒီလို ရုံမတင်တော့တဲ့အတွက် ဝမ်းနည်းပြီး စိတ်မကောင်းဖြစ်ရတယ်လို့ သင်ဇာဝင့်ကျော်က ဆိုပါတယ်။
“အဲ့ကားရိုက်တုန်းက အရမ်းပင်ပန်းခဲ့တာ သင်ဇာတောင် ဝမ်းလျှောပြီးတော့ ရိုက်ကူးရေးကတောင် နားပြီး ဆေးကုလိုက်ရတယ်။ သွားပြီး ရိုက်ရတဲ့နေရာနဲ့ တည်းရတဲ့ နေရာ အရမ်းဝေးတယ်။ ခရီးကလည်း အရမ်းဝေး ရိုက်တာကလည်း မြစ်နားမှာ ဆိုတော့ ညဘက်တွေ ရိုက်ရင် အရမ်းအေးတာ။ တကယ်ကို အရမ်းပင်ပန်းတဲ့ ကားတကားလို့ ပြောလို့ရတယ်”
“တခါတလေကျရင် မိတ်ကပ်အမည်းတွေ လိမ်းပြီး တနေကုန် ဖုန်တွေထဲမှာ ပင်ပင်ပန်းပန်း သရုပ်ဆောင် ပြန်လာရင် ရေတောင် မချိုးနိုင်ဘဲ အိပ်ပျော်သွားတဲ့နေ့တွေ၊ ညတွေလည်း အများကြီးပဲ။ တကယ် အရမ်းပင်ပန်းတဲ့ ကားတကားလို့ ပြောလို့ရတယ်”လို့ သင်ဇာဝင့်ကျော်က ပြောပါတယ်။
“ကိုယ်ကတော့ ရုပ်ရှင်ကားကြီးဖြစ်လို့ အားစိုက်ပြီးတော့ ကြိုးစားခဲ့တယ်။ အပင်ပန်းခံခဲ့တယ်။ ဘယ်အလုပ်ပဲလုပ်လုပ် သင်ဇာ အကောင်းဆုံးကြိုးစားပြီးတော့ အပင်ပန်းခံခဲ့တယ်။ ကိုယ်လည်း ရုပ်ရှင်ကားကြီးဆိုတော့ မျှော်တော့ မျှော်မှန်းခဲ့တာပေါ့။ ဒါပေမဲ့လည်း ဒီလိုမျိုးဖြစ်သွားတဲ့ အခါကျတော့ စိတ်မကောင်းဖြစ်ပြီး ဝမ်းနည်းတာပေါ့”လို့ သင်ဇာဝင့်ကျော်ကဆိုပါတယ်။
သင်ဇာဝင့်ကျော်က ဒီဇာတ်ကားမှာ ကျော်သူ၊ မို့မို့မြင့်အောင်၊ အောင်ရဲလင်းတို့နဲ့ အတူ ပါဝင်သရုပ်ဆောင်ထားတာဖြစ်ပြီး အတူပါဝင်ကြတဲ့ သရုပ်ဆောင်များအနေနဲ့လည်း နစ်နာမှုရှိတယ်လို့ ဆိုပါတယ်။
“အောက်ခြေလူတန်းစားတွေရဲ့ ဘဝကို ရိုက်ပြထားလို့ ဆင်ဆာ မရတာလားတော့ မသိဘူး။ ဆင်ဆာပိုင်း မသိဘူး။ ဒါပေမဲ့ ကားကောင်းတကား ဖြစ်တယ်။ ရုံတင်စေချင်တယ်။ ရုံမတင်ဘဲနဲ့ ဒီလိုမျိုး ဖျက်လိုက်တဲ့အခါကျတော့ ဆုံးရှုံးနစ်နာမှုကြီးတခုလို့ သင်ဇာထင်ပါတယ်။ မေမွှေးလည်း အဲ့ထဲမှာ အရမ်းကြိုးစားတယ်။ ဦးကျော်သူကကလည်း ပထမဆုံးပြန်ရိုက်တဲ့ ကားဆိုတော့ သူ့အတွက်လည်း နစ်နာမှုဖြစ်နိုင်မယ်လို့ ထင်တယ်”
“ဦးကျော်သူဆိုလည်း အရမ်းအားထည့်ပြီးသရုပ်ဆောင်ရင်းနဲ့ လဲကျတဲ့အထိ ဖြစ်သွားတယ်။ ဆေးရုံတွေ ဘာတွေလည်း တက်လိုက်ရတယ်။ အဲ့လောက်ထိ အကုန်လုံးက ကြိုးစားပြီးတော့မှ ဒီလိုဖြစ်သွားတာ စိတ်မကောင်းပါဘူး”လို့ သင်ဇာဝင့်ကျော်က ဆိုပါတယ်။
အဆိုပါ ဇာတ်ကားဟာ ရုံတင်ရန် ကြာမြင့်နေတဲ့အတွက် ပရိသတ်တွေဆီကို မြန်မြန်ရောက်အောင် Sky Net ရုပ်သံလိုင်းကနေ ပြသသွားမှာဖြစ်ပြီး ၅ လပိုင်းလောက်မှာ ပြသသွားမယ်လို့ “ပိုက်ဆံ”ဇာတ်ကား ထုတ်လုပ်သူ ကိုဝေမင်းအောင်က ဧရာဝတီကို ပြောပါတယ်။
“ပိုက်ဆံ” ရုပ်ရှင်ဇာတ်ကားကြီးဟာ အောက်ခြေ လူတန်းစားတွေရဲ့ နေထိုင်စားသောက်ပုံတွေကို တင်ပြထားတဲ့ ရုပ်ရှင်ကားကြီး ဖြစ်ပါတယ်။ ဒီဇာတ်ကားကိုတော့ ဒါရိုက်တာ နေပိုင် ရိုက်ကူးထားပြီး ဇာတ်ကားမှာသရုပ်ဆောင် ကျော်သူ၊ အောင်ရဲလင်း၊ မို့မို့မြင့်အောင်နဲ့ သင်ဇာဝင့်ကျော်တို့ အဓိက ပါဝင်သရုပ်ဆောင်ထားပါတယ်။
ဧရာဝတီ
0 comments:
Post a Comment