ရွေးကောက်ပွဲအပေါ် ပြည်သူ မယုံကြည်မှုများ မဖြစ်ပေါ်အောင် တားဆီးသည့်အနေနှင့် ရွေးကောက်ပွဲကော်မရှင်သည် လာမည့် ၂၀၂၀ ရွေးကောက်ပွဲမတိုင်မီ ပြုပြင်ပြောင်းလဲမှုများ ပြုလုပ်သင့်သည်ဟု ရွေးကောက်ပွဲဆိုင်ရာ စောင့်ကြည့် လေ့လာသည့်အဖွဲ့ တစ်ဖွဲ့က အကြံပြုချက် ထုတ်ပြန်လိုက်သည်။
ရန်ကုန်မြို့တွင် ယမန်နေ့က ကျင်းပခဲ့သည့် ကြားဖြတ်ရွေးကောက်ပွဲ စောင့်ကြည့်လေ့လာမှု အစီရင်ခံစာ ထုတ်ပြန်ပွဲ၌ အဆိုပါအစီရင်ခံစာကို ပြုစုခဲ့သည့် ရွေးကောက်ပွဲဆိုင်ရာ ပြည်သူ့လှုပ်ရှားမှုအဖွဲ့ (PACE) ၏ဦးဆောင်သူများက ပြောခြင်းဖြစ်သည်။
လစ်လပ်နေရာ ၁၃ နေရာအတွက် ကြားဖြတ်ရွေးကောက်ပွဲကို ၂၀၁၈ ခုနှစ် နိုဝင်ဘာလ ၃ ရက်နေ့တွင်ကျင်းပခဲ့ပြီး အမျိုးသားလွှတ်တော်တစ်နေရာ၊ ပြည်သူ့လွှတ်တော် လေးနေရာနှင့် တိုင်းဒေသကြီး/ ပြည်နယ်လွှတ်တော် ရှစ်နေရာတို့ဖြစ်သည်။
လက်ရှိအာဏာရ အမျိုးသားဒီမိုကရေစီအဖွဲ့ချုပ် NLD ပါတီက ခုနစ်နေရာဖြင့် အများဆုံး အနိုင်ရခဲ့ပြီး အတိုက်အခံ ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီက သုံးနေရာ၊ ရှမ်းတိုင်းရင်းသားများ ဒီမိုကရေစီအဖွဲ့ချုပ်၊ ချင်းဒီမိုကရေစီအဖွဲ့ချုပ်နှင့် တစ်သီး ပုဂ္ဂလကိုယ်စားလှယ်လောင်းများက တစ်နေရာစီ အနိုင်ရရှိခဲ့သည်။
ပြည်ထောင်စုရွေးကောက်ပွဲ ကော်မရှင်အနေဖြင့် လာမည့် ၂၀၂၀ အထွေထွေ ရွေးကောက်ပွဲအတွက် ကြိုတင်ပြင်ဆင်ရန် အကြံပြုချက် ခြောက်ချက်ကို PACE အဖွဲ့က အစီရင်ခံစာတွင် ထည့်သွင်းထုတ်ပြန်ခဲ့သည်။
ယင်းတို့တွင် ကော်မရှင်အနေနှင့် ရွေးကောက်ပွဲ ကျင်းပမည့်နေ့ အပါအဝင် လုပ်ငန်းစဉ် အသေးစိတ်၏ အချိန်စာရင်းကို တစ်ချိန်တည်း တစ်ပြိုင်နက်တည်း ထုတ်ပြန်ကြေညာရန်၊ ရွေးကောက်ပွဲဆိုင်ရာ သတင်း အချက်အလက်များကို အသေးစိတ် ထုတ်ပြန်ပေးရန်၊ ကြိုတင်မဲများအားလုံးကို မြို့နယ်ကော်မရှင်အဖွဲ့ခွဲများတွင် ရေတွက်ခြင်း မပြုလုပ်တော့ဘဲ သက်ဆိုင်ရာ မဲရုံများသို့ပေးပို့ကာ ရေတွက်ရန် အကြံပြုထားသည်။
ထို့ပြင် မဲဆွယ်စည်းရုံးရေး ရန်ပုံငွေ ရယူလက်ခံခြင်းနှင့်ပတ်သက်ပြီး တိကျသည့် လုပ်ထုံးလုပ်နည်း များကို ပါတီများအားလုံး လက်ခံသည့်မူဘောင် ဖြစ် လာစေရန်၊ မဲဆန္ဒရှင်စာရင်း၏ အရည်အသွေးနှင့် ပတ်သက်ပြီး နိုင်ငံရေးပါတီများအပါအဝင် အရပ်ဘက် အဖွဲ့အစည်းများကို ဆန်းစစ်လေ့လာမှုများ ပြုလုပ်ခွင့် ပြုရန်၊ လွတ်လပ်ပြီး အမှီအခိုကင်းသည့် ရွေးကောက်ပွဲ ကော်မရှင်တစ်ရပ်ဖြစ်လာစေရန် စသည့် အချက်များ ကိုလည်း ဆက်လက်အကြံပြုထားသည်ကို တွေ့ရသည်။
ပြည်ထောင်စုရွေးကောက်ပွဲကော်မရှင်၏ လက်ရှိ ဥပဒေမူဘောင်နှင့် လုပ်ထုံးလုပ်နည်းများအရ ကော် မရှင်သည် အနိုင်ရပါတီကို ဘက်လိုက်မှုရှိသည်ဟူ သည့်အမြင်ကို သက်ရောက်စေသည့်အတွက် ကော်မရှင် အနေနှင့် ၎င်းတို့လုပ်ဆောင်ချက်ကို ပွင့်လင်းမြင်သာမှု ရှိရှိ ထုတ်ပြန်သင့်သည်ဟု ရွေးကောက်ပွဲဆိုင်ရာ ပြည်သူ့ လှုပ်ရှားမှုအဖွဲ့ (PACE) မှ အမှုဆောင်ဒါရိုက်တာ ကိုစိုင်းရဲကျော်စွာမြင့်က ပြောသည်။
“ကော်မရှင်သက်တမ်းက အစိုးရသက်တမ်းနဲ့ အတူတူပဲ။ တက်လာတဲ့အစိုးရကပဲ ကော်မရှင်ကို ဖွဲ့ထားတဲ့အတွက် ဘက်လိုက်တယ်ဆိုတဲ့အမြင်ကို သက်ရောက်စေတယ်။ ၂၀၂၀ က ယှဉ်ပြိုင်မှု ကြီးနိုင်တယ်။ ကော်မရှင်ဟာ အဲ့ဒီယုံကြည်မှုကို တည်ဆောက်ဖို့လိုတယ်။ ပါတီတွေနဲ့ ပုံမှန်တွေ့ဆုံမှုတွေ လုပ်ဖို့လိုတယ်”ဟု ၎င်းကပြောသည်။
ပြီးခဲ့သည့် ၂၀၁၈ ခုနှစ် ကြားဖြတ်ရွေးကောက်ပွဲဖြစ်စဉ်တွင် မဲဆန္ဒနယ် ၁၂ ခုလုံးတွင် ရွေးကောက်ပွဲဖြစ်စဉ်ကို ထိခိုက်စေသည့်ပြဿနာ ကြီးကြီးမားမား မရှိခဲ့သော်လည်း လာမည့် ၂၀၂၀ ရွေးကောက်ပွဲအတွက်ကိုတော့ နိုင်ငံရေးပါတီများ၏ ရွေးကောက်ပွဲ မယုံကြည်မှု မဖြစ်ပေါ်စေရန် ကြိုတင်ပြင်ဆင်မှုများ ပြုလုပ်သင့်ကြောင်း ကိုစိုင်းရဲကျော်စွာမြင့်က အကြံပြုပြောကြားသည်။
ပြည်ထောင်စု ရွေးကောက်ပွဲကော်မရှင်အနေနှင့် ရွေးကောက်ပွဲဆိုင်ရာ မဟာဗျူဟာစီမံချက် ရေးဆွဲထားပြီဖြစ်ကာ သက်ဆိုင်ရာ နိုင်ငံရေးပါတီ အသီးသီးသို့ ပေးပို့ထားပြီးဖြစ်ကြောင်း ပြည်ထောင်စု ရွေးကောက်ပွဲ ကော်မရှင်အဖွဲ့ဝင် ဦးမြင့်နိုင်က Myanmar Now ကို ယမန်နေ့က ပြောသည်။
“တက်လာတဲ့အစိုးရက (ရွေးကောက်ပွဲကော်မရှင်ကို) ဖွဲ့ရတာကတော့ ဖွဲ့စည်းပုံ အခြေခံဥပဒေအရ ဖွဲ့ရတာဖြစ်တယ်။ ကျွန်တော်တို့ နိုင်ငံရေးပါတီတွေနဲ့ တွေ့ဆုံဖို့လည်း ရှိပါတယ်။ ခုလာမယ့် ရွေးကောက်ပွဲကို ပြည့်စုံမှန်ကန်တဲ့ မဲပေးမှုဖြစ်ဖို့၊ ဘက်မလိုက် မျှတတဲ့ ဥပဒေအတိုင်းပဲလုပ်ဖို့ သန္နိဋ္ဌာန်ချထားတယ်”ဟု ၎င်းကပြောသည်။
ပြီးခဲ့သည့် ၂၀၁၈ ကြားဖြတ်ရွေးကောက်ပွဲတွင် အငြင်းပွားစရာအချို့ရှိခဲ့ရာ အမျိုးသားလွှတ်တော် လစ်လပ်တစ်နေရာဖြစ်သော ကချင် (၂) မဲဆန္ဒနယ်တွင် အနိုင်ရသွားသည့် ပြည်ခိုင်ဖြိုး ကိုယ်စားလှယ်လောင်း ဦးဆီဟူးဒွေ့သည် တပ်မတော်သားတို့၏မဲများ ပါဝင်သော ကြိုတင်မဲ ၄၀၀၀ ကျော်ထဲမှ အများအပြားကို ရရှိသွားရာမှ ထိုမဲဆန္ဒနယ်တွင် ကြိုတင်မဲက အငြင်းပွားဖွယ် ဖြစ်လာသည်။
ထို့ပြင် ရန်ကုန်တိုင်းလွှတ်တော် ဆိပ်ကမ်းမဲဆန္ဒနယ် (၂) တွင် အနိုင်ရသွားခဲ့သည့် ပြည်ခိုင်ဖြိုး ကိုယ်စားလှယ်လောင်း ဦးနေမျိုးအောင်သည် ရွေးကောက်ပွဲ အကြိုကာလက ၎င်းအပါအဝင် ပြည်ခိုင်ဖြိုးပါတီဝင် အချို့သည် မဲဆန္ဒနယ်ပြည်သူများအတွက် ပြင်ပပုဂ္ဂလိက ငွေချေးလုပ်ငန်းတစ်ခုနှင့်ပူးပေါင်းပြီး ငွေချေးနိုင်အောင် ဆောင်ရွက်ခဲ့ခြင်းနှင့်စပ်လျဉ်းပြီး အမှုဖွင့်ခံထားရသည်။
ဝင်းနန္ဒာ (Myanmar Now)
The Voice
0 comments:
Post a Comment