အင်ဒိုနီးရှားနိုင်ငံ ဆူမားတြားကျွန်းမှာ ပြီးခဲ့တဲ့ ရက်တွေအတွင်း မိုးသည်းထန်စွာ ရွာသွန်းခဲ့ရာကနေ ရေလွှမ်းမိုးမှု၊ မြေပြိုမှုတွေ ပေါ်ပေါက်ခဲ့လို့ အနည်းဆုံး လူ ၁၇ ဦး သေဆုံးသွားတယ်လို့ အာဏာပိုင်တွေက ဧပြီ ၂၈ ရက်မှာ ပြောပါတယ်။
လက်ရှိအချိန် ယင်းဖြစ်စဉ်တွေအတွင်း အခြား လူကိုးဦးခန့် ပျောက်ဆုံးနေတယ်လို့လည်း ဆိုပါတယ်။
ပြင်းထန်ဆိုးရွားတဲ့ ရာသီဥတုကြောင့် ရာနဲ့ချီတဲ့ နေအိမ်အဆောက်အအုံတွေ၊ တံတားတွေ၊ လမ်းတွေလည်း ပျက်စီးသွားခဲ့ပြီး လူပေါင်း ၁၂,၀၀၀ လောက်ကို ဘေးလွတ်ရာအရပ်ကို ကူညီရွှေ့ပြောင်းပေးထားရတယ်လို့ တာဝန်ရှိသူတွေက ပြောပါတယ်။
အဆိုပါ ရေကြီး မြေပြိုမှုတွေကတော့ ဘန်ကူလူ ပြည်နယ်က ဒေသ ဒါမှမဟုတ် မြို့ ကိုးမြို့မှာ ထိခိုက်ကြုံတွေ့ခဲ့ရတယ်လို့ သိရပါတယ်။
လက်ရှိအချိန် နေရာတစ်ချို့မှာ ရေပြန်ကျနေပြီဖြစ်ပေမယ့်လည်း ယခုအချိန်ထိ ထိခိုက်ပျက်စီးမှု အတိုင်းအတာကို အာဏာပိုင်တွေဘက်က တိတိကျကျ မသိရသေးဘူးလို့ ဆိုပါတယ်။ ဒါ့အပြင် ဒေသတစ်ချို့မှာ ခုချိန်ထိ လျှပ်စစ်မီးတွေ ပြတ်တောက်နေဆဲဖြစ်ပါတယ်။
“ ဒီ သဘာဝဘေးရဲ့ ဆိုးကျိုးက ပို များလာနိုင်ခြေ ရှိပါတယ်” လို့ အင်ဒို သဘာဝဘေး အေဂျင်စီ ပြောခွင့်ရပုဂ္ဂိုလ် ဆူတိုပို ပူဝါဝို နူဂရိုဟိုက ပြောပါတယ်။ ရေလွှမ်းမိုးမှုအတွင်း ဒဏ်ရာရသူ အများအပြား ရှိခဲ့တယ်လို့လည်း ၎င်းက ပြောပါတယ်။
“ ဒီရက်ပိုင်း မိုးရေချိန် များလာမယ်ဆိုရင် မြေပြိုရေကြီးမှုက ထပ်ဖြစ်လာနိုင်ပါသေးတယ်” လို့ ၎င်းက ပြောပါတယ်။
ခုလို သဘာဝဘေးဖြစ်စဉ်ကြောင့် သန့်ရှင်းသော သုံးရေ မရခြင်း၊ တစ်ကိုယ်ရည်သန့်ရှင်းမှု အားနည်းခြင်းတို့ကြောင့် အရေပြားရောဂါတွေလိုမျိုး၊ အသက်ရှုလမ်းကြောင်း ကူးစက်ရောဂါတွေလိုမျိုး ဘေးဒုက္ခတွေလည်း ဖြစ်လာနိုင်ကြောင်း ၎င်းက သတိပေးသွားပါတယ်။
အင်ဒိုနီးရှားနိုင်ငံမှာတော့ ခုလို ရေကြီးမြေပြိုမှုတွေဟာ ဖြစ်လေ့ဖြစ်ထ ရှိတဲ့ သဘာဝဘေးဆိုးတွေဖြစ်နေပြီး များသောအားဖြင့် အောက်တိုဘာနဲ့ ဧပြီအကြား မုတ်သုံရာသီကာလအတွင်း ပိုမိုဖြစ်ပွားလေ့ရှိတယ်လို့ သိရပါတယ်။
Mizzima - News in Burmese
0 comments:
Post a Comment