လျှပ်စစ်ဓာတ်အားပြတ်တောက်မှုသည် အခြားနိုင်ငံများတွင်လည်းဖြစ်ပေါ်တတ်ပြီး စင်ကာပူနိုင်ငံတွင် လျှပ်စစ်ဓာတ်အားပြတ်တောက်ပါက မြန်မာနိုင်ငံမှာကဲ့သို့ နာရီပိုင်းအတွင်းပြန်မရနိုင်ဘဲ ရက်ပိုင်းအထိကြာမြင့်တတ်ကြောင်း လျှပ်စစ်နှင့်စွမ်းအင်ဝန်ကြီးဌာန ဒုဝန်ကြီး ဒေါက်တာထွန်းနိုင်က ဧပြီ ၂၉ ရက်တွင်ကျင်းပသည့် ပြည်သူ့လွှတ်တော်အစည်းအဝေးတွင် ပြောကြားသည်။
ဒုတိယအကြိမ် ပြည်သူ့လွှတ်တော် (၁၂) ကြိမ်မြောက်ပုံမှန်အစည်းအဝေးတွင် ကျောက်တံတားမြို့နယ် ပြည်သူ့လွှတ်တော်ကိုယ်စားလှယ် ဦးနေမျိုးထက်က မြန်မာနိုင်ငံ၏လျှပ်စစ်မီးအခြေအနေနှင့် လျှပ်စစ်မီးပြတ်တောက်မှုမရှိစေရန် ၀န်ကြီးဌာန၏စီစဉ်ဆောင်ရွက်ထားမှုများနှင့်ပတ်သက်၍ မေးမြန်းချက်အား ဒုဝန်ကြီး ဒေါက်တာထွန်းနိုင်က ယင်းသို့ ဖြေကြားခဲ့သည်။
လာအို၊ ထိုင်း၊ ကမ္ဘောဒီးယားနိုင်ငံများတွင်လည်း မြန်မာနိုင်ငံကဲ့သို့ လျှပ်စစ်မီးပြဿနာကြုံတွေ့နေရကြောင်း၊ သို့သော် မြန်မာနိုင်ငံထက်လျှပ်စစ်မီးပြတ်တောက်မှု နည်းပါးကြောင်း၊ ထို့ကြောင့် ၀န်ကြီးဌာနအနေဖြင့် လာမည့် ၂၀၂၀ ခုနှစ် နွေရာသီတွင် ဓာတ်အားထုတ်လုပ်မှုတိုးတက်ရေးအတွက် တနှစ်အတွင်း မည်သို့ဆောင်ရွက်သွားမည်ကို သိရှိလိုကြောင်း ဦးနေမျိုးထက်က မေးမြန်းခဲ့သည်။
“တခြားနိုင်ငံတွေမှာ လျှပ်စစ်ဓာတ်အားမပြတ်တောက်ဘူးဆိုတာ မဟုတ်ပါဘူး။ စင်ကာပူနိုင်ငံမှာ လျှပ်စစ်ဓာတ်အားပြန်တောက်သွားချိန်မှာ ကျွန်တော်တို့လို နာရီပိုင်းအတွင်းပြန်မရဘဲ ရက်ပိုင်းအထိကြာတတ်ပါတယ်။ အမေရိကန်နိုင်ငံမှာ ဓာတ်အားပြတ်တောက်သွားချိန်တွေဟာ နှစ်ပတ်ကြာတတ်ပါတယ်။ ကျွန်တော်တို့နိုင်ငံမှာ လျှပ်စစ်ဓာတ်အားပြတ်တောက်မှုဖြစ်ပေါ်တဲ့အခါမှာ မည်သည့်ကာလမဆို တရက်အတွင်းမှာ နာရီပိုင်းနဲ့ နှစ်နာရီ သုံးနာရီအတွင်း ပြန်ရအောင် ကျွန်တော်တို့ ကြိုးပမ်းဆောင်ရွက်နိုင်ပါတယ်။ အခြားနိုင်ငံတွေမှာ လျှပ်စစ်ဓာတ်အားပြတ်တောက်မှုနည်းတယ်ဆိုတဲ့နေရာမှာ ဘတ်ဂျက်သုံးစွဲခွင့်ပမာဏချင်း မတူပါ။ လျှပ်စစ်ဓာတ်အားပြတ်တောက်မှုမဖြစ်အောင် မည်ကဲ့သို့ဆောင်ရွက်ရမလဲဆိုရင် စီမံဆောင်ရွက်ရမလဲဆိုလျှင် လျှပ်စစ်နဲ့စွမ်းအင်ဝန်ကြီးဌာန နှစ်စဉ်တင်ပြတောင်းခံတဲ့ ဘတ်ဂျက်ပမာဏအားလုံးကို ခွင့်ပြုပေးဖို့လည်း လိုအပ်တယ်။ လျှပ်စစ်ဓာတ်အားထုတ်လုပ်ခြင်းကဏ္ဍဟာ အခုရေတွင်းတူး အခု ရေကြည်သောက်လို့မရတဲ့ကိစ္စရပ်မျိုးဖြစ်ပါတယ်”ဟု ၎င်းက ပြောသည်။
လျှပ်စစ်ဓာတ်အားပေးစက်ရုံများကို စီမံကိန်းချတည်ဆောက်ခြင်း၌ ၇ နှစ် ၈ နှစ်ကြာမြင့်တတ်ကြောင်း၊ ထိုကာလသတ်မှတ်ချက်အတွင်း ဘတ်ဂျက်ခွင့်မပြုမှုနှင့်ကြုံတွေ့ရပါက စီမံကိန်းကာလသည် အလိုအလျောက် အချိန်နောက်ရွှေ့သွာဲးရကြောင်း၊ ယင်းသို့သောအခြေအနေများကို နှစ်နှစ် သုံးနှစ်ဆက်တိုက်ကြုံတွေ့ရပါက ဓာတ်အားလိုအပ်ချက်ကိုဖြည့်ဆည်းမည့်စီမံကိန်းများ ပျက်ပြယ်သွားမည်ဖြစ်ကြောင်း ၎င်းက ဆက်လက်ပြောကြားသည်။
ဝန်ကြီးဌာန၏ အစီအစဉ်များအားလုံး အောင်မြင်ဖိုအတွက် ၀န်ကြီးဌာန၏လိုအပ်ချက်အားလုံးကိုရရှိမည်ဆိုလျှင်ပင် တနှစ်တာကာလတည်းဖြင့် ဆောင်ရွက်ပေးလို့မရနိုင်ကြောင်း၊ ၀န်ကြီးဌာန၏ ဆောင်ရွက်မှုအခြေအနေများအပေါ် ပြည်သူများက မေးမြန်းကြမည်ဖြစ်သော်လည်း မြန်မာနိုင်ငံရဲ့ လက်ရှိလျှပ်စစ်အခြေအနေအရ ၅ နှစ် ၁၀ နှစ်ဆက်တိုက် ဆောင်ရွက်သွားမှ အောင်မြင်မည်ဖြစ်ကြောင်း ဒုဝန်ကြီး ဒေါက်တာထွန်းနိုင်က ပြောကြားခဲ့သည်။
ထွန်း(နေပြည်တော်)
News Watch
0 comments:
Post a Comment