ရှမ်းပြည်နယ်အရှေ့ပိုင်း၊ တာချီလိတ်မြို့တွင် ညပိုင်းပိတ်ဆို့စစ်ဆေးသည့် ရဲတပ်ဖွဲ့ဝင်ကို ကားဖြင့်တိုက်ရန်ကြိုးစားပြီး ထွက်ပြေးသွား၍ ပစ်ခတ်ဖမ်းဆီးခဲ့ရသည့် ထိုင်းနိုင်ငံသားသည် ပြည်သူ့ဝန်ထမ်းအား နှောင့်ယှက်မှု၊ နိုင်ငံအတွင်း ခိုးဝင်မှု၊ နိုင်ငံသားစိစစ်ရေးကဒ် အတုကိုင်ဆောင်မှု၊ လိုင်စင်မဲ့မော်တော်ယာဉ်စီးနင်းမှုတို့ကို ကျူးလွန်ထားသည့်အပြင် ထိုင်းနိုင်ငံတွင်လည်း မူးယစ်မှုဖြင့် ဖမ်းဝရမ်းထုတ်ခံထားရသူဖြစ်ကြောင်း သိရသည်။
တာချီလိတ်မြို့၊ ဆေခမ်းရပ်ကွက်၊ ဟောင်လိတ်မီးပွိုင့်အနီးတွင် ၂၀၁၉ ခုနှစ်၊ မတ်လ (၁၁)ရက်နေ့ (၉)နာရီဝန်းကျင်က ပိတ်ဆို့စစ်ဆေးရေးလုပ်ဆောင်နေသည့် ရဲတပ်ဖွဲ့ကို ရှောင်ကွင်းမောင်းနှင်သွားသည့် ကားတစ်စီးအား စစ်ဆေးရန် တားမြစ်သည်ကို ရပ်မပေးဘဲ အရှိန်ပြင်းပြင်းမောင်းနှင်လာကာ စစ်ဆေးရေးအဖွဲ့ဝင် ရဲတပ်သားတစ်ဦးအား ကားဖြင့်တိုက်မည်ပြုကာ နောက်ပြန်လှည့်မောင်းနှင်သွားသဖြင့် ပစ်ခတ်တားဆီးခဲ့ခြင်းဖြစ်ကြောင်း သိရသည်။
ပစ်ခတ်တားဆီးခံရသည့် မော်တော်ယာဉ်သည် ရပ်မပေးဘဲ ဆက်လက်မောင်းနှင်ထွက်ပြေးသဖြင့် ရဲအုပ် သန်းထွန်းဦးနှင့်အဖွဲ့က လိုက်လံရှာဖွေနေစဉ် မတ်လ (၁၂)ရက်နေ့ နံနက် (၂)နာရီခွဲအချိန်၌ ခရိုင်ပြည်သူ့ဆေးရုံသို့ သေနတ်ဒဏ်ရာဖြင့် လူနာရောက်လာကြောင်း သတင်းအရ သွားရောက်စစ်ဆေးရာ ပိတ်ဆို့စစ်ဆေးအဖွဲ့က လိုက်ရှာနေသူဖြစ်သည်ကို စစ်ဆေးတွေ့ရှိရခြင်းဖြစ်ကြောင်း သိရသည်။
အဆိုပါဒဏ်ရာရရှိသူမှာ ထိုင်းနိုင်ငံသား Gulay (ခ) စိုင်းဖတ်ဆိုသူဖြစ်ကြောင်း သိရသဖြင့် ၎င်းအား ပြည်သူ့ဝန်ထမ်းများ တာဝန်ဝတ္တရားဆောင်ရွက်စဉ် မဆောင်ရွက်နိုင်အောင် အနိုင်အထက်ပြုလုပ်မှုဖြင့် တာချီလိတ်မြို့မရဲစခန်းတွင် မတ်လ (၁၂)ရက်နေ့က (ပ)၁၃၀/၂၀၁၉၊ ရာဇသတ်ကြီးပုဒ်မ ၃၅၃ ဖြင့် အမှုဖွင့်စစ်ဆေးခဲ့ကာ ၎င်းစီးနင်းလာသည့် ကားမှာ လိုင်စင်မဲ့မော်တော်ယာဉ်ဖြစ်ကြောင်း စစ်ဆေးတွေ့ရှိရသဖြင့် ပို့ကုန်သွင်းကုန်ဥပဒေပုဒ်မ (၈) ဖြင့်ပါ ထပ်မံအရေးယူထားခြင်းဖြစ်ကြောင်း သိရသည်။
ထိုင်းနိုင်ငံသား Gulay (ခ) စိုင်းဖတ်အား ထပ်မံစစ်ဆေးတွေ့ရှိချက်အရ ၎င်း၏အမည်မှန်မှာ နိုင်းမားရွတ်ဂ်ျမာ့ဒ်ရင်း (ခ) ကလွေ့ဆိုသူဖြစ်ပြီး ထိုင်းနိုင်ငံ ဖိဂျစ်ခရိုင်မှဖြစ်ကြောင်း ထွက်ဆိုသည်ဟု သိရသည်။
၎င်းအား လွန်ခဲ့သည့်(၈)လခန့်က ထိုင်းနိုင်ငံ၊ ဖိဂျစ်ခရိုင်တရားရုံးမှ မူးယစ်ဆေးဝါးမှုဖြင့် ဖမ်းဝရမ်းထုတ်လိုက်သဖြင့် ၎င်း၏နေရပ်မှတိမ်းရှောင်ကာ မယ်ဆိုင်မြို့တွင် (၁)လခန့် ခိုအောင်းနေထိုင်ခဲ့ပြီးနောက် ယင်းမှတစ်ဆင့် မယ်ဆိုင်ချောင်းမှ တရားမဝင်ဖြတ်ကူးကာ မြန်မာနိုင်ငံ တာချီလိတ်မြို့သို့ ခိုးဝင်လေ့ရှိသူဖြစ်ကြောင်း သိရသည်။
Gulay (ခ) စိုင်းဖတ် (ခ) နိုင်းမားရွတ်ဂ်ျမာ့ဒ်ရင်း (ခ) ကလွေ့သည် တာချီလိတ်မြို့သို့ ၂၀၁၉ ခုနှစ်၊ မတ်လ(၆)ရက်နေ့က မယ်ဆိုင်ချောင်းဖြတ်ကာ ဝင်ရောက်လာပြီးနောက် ဟိုတယ်တစ်ခုတွင် တည်းခိုနေထိုင်ပြီး သူငယ်ချင်းဖြစ်သူထံမှ ငှားရမ်းထားသည့် ကားဖြင့် မတ်လ(၁၁)ရက်နေ့က ဟောင်လိတ်မီးပွိုင့်ဘက် ထွက်လာစဉ် ရဲတပ်ဖွဲ့ကိုမြင်သဖြင့် ရှောင်ပြေးခဲ့ခြင်းဖြစ်သည်ဟု သိရသည်။
ပစ်ခတ်တားဆီးခံရသဖြင့် ရရှိသွားသည့် သေနတ်ဒဏ်ရာများအား ဆေးကုသမှုခံရန် တာချီလိတ်မြို့ရှိ သူငယ်ချင်း အမျိုးသမီးတစ်ဦးနှင့်အတူ ပြင်ပဆေးခန်းများ လိုက်ရှာရာမတွေ့သဖြင့် ခရိုင်ပြည်သူ့ဆေးရုံကြီးသို့ ရောက်လာစဉ် ရဲတပ်ဖွဲ့က ဖမ်းဆီးခံရခြင်းဖြစ်ကြောင်း သိရသည်။
၎င်းကိုင်ဆောင်ထားသည့် စိုင်းဖတ်အမည်ဖြင့် မြန်မာနိုင်ငံသားစိစစ်ရေးကဒ်အတုကို မြန်မာနိုင်ငံသားတစ်ဦးက ဘတ်ငွေနှစ်သောင်းရယူ၍ လုပ်ပေးခဲ့ခြင်းဖြစ်သည်ဟု ဆိုသည်။
ထပ်မံစစ်ဆေးတွေ့ရှိချက်များအရ ထိုင်းနိုင်ငံသား မူးယစ်တရားခံပြေး Gulay (ခ) စိုင်းဖတ် (ခ) နိုင်းမားရွတ်ဂ်ျမာ့ဒ်ရင်း (ခ) ကလွေ့အား လိုင်စင်မဲ့မော်တော်ယာဉ် အသုံးပြုခြင်း၊ နိုင်ငံသားစိစစ်ရေးကဒ်အတုကိုင်ဆောင်ခြင်း ၊ နိုင်ငံတွင်း ခိုးဝင်ခြင်းများအတွက် မတ်လ (၁၄)ရက်နေ့က တာချီလိတ်မြို့မရဲစခန်းတွင် (ပ)၁၃၈/၂၀၁၉၊ လဝက အက်ဥပဒေပုဒ်မ ၁၃(၁)၊ (ပ)၁၃၉/၂၀၁၉၊ ရာဇသတ်ကြီးပုဒ်မ ၄၂၀/၄၆၈ တို့ဖြင့်ပါ ထပ်မံအမှုဖွင့်စစ်ဆေးနေကြောင်း သိရသည်။
ဓါတ်ပုံ- ပိတ်ဆို့စစ်ဆေးမှုဓါတ်ပုံမှာ ၂၀၁၈ ခုနှစ်၊ နိုဝင်ဘာလ (၁)ရက်နေ့ ပိတ်ဆို့စစ်ဆေးမှု ဖြစ်ပါသည်။
Tachileik News Agency
0 comments:
Post a Comment