IS စစ်သွေးကြွမိဘတွေရဲ့ သားသမီးတွေကို အကြမ်းဖက်သမားလေးတွေအဖြစ် သဘောမထား သင့်ကြောင်း ကုလကလေးများရန်ပုံငွေအဖွဲ့(UNICEF) က မတ်လ ၁၁ ရက်နေ့မှာ သတိပေး နှိုးဆော်ခဲ့ပါတယ်။
ဆီးရီးယားအရှေ့မြောက်ပိုင်းရှိ IS တို့ရဲ့နောက်ဆုံးခံတပ် ပိတ်ဆို့တိုက်ခိုက်ခံချိန်မှာ စစ်သွေးကြွတွေရဲ့မိသားစုတွေဟာ ခံတပ်ကို စွန့်ခွာထွက်ပြေးလာကြပါတယ်။ ၄င်းမှာ IS သားသမီး ကလေးငယ်တွေလည်း ပါနေတဲ့အတွက် သူတို့လေးတွေရဲ့ကံကြမ္မာကို နိုင်ငံတကာမှ မျက်ကွယ်ပြုမထားသင့်ကြောင်း UNICEF ရဲ့ အရှေ့အလယ်ပိုင်းဒေသညွှန်ကြားရေးမှူးက ပြောကြားခဲ့ပါတယ်။
UNICEF ရဲ့စစ်တမ်းအရ အယ်လ်ဟိုလ်ဒုက္ခသည်စခန်းမှာ တိုင်းတစ်ပါးသား ကလေးငယ်ချည်းပဲ ၃,၀၀၀ ခန့်ရှိနေပြီး သူတို့ရဲ့မိဘတွေဟာ နိုင်ငံ ၄၃ ခုမှ အသီးသီးရောက်လာပြီး IS နဲ့ပူးပေါင်းခဲ့ကြသူတွေဖြစ်ပါတယ်။ သက်ဆိုင်ရာနိုင်ငံအချို့ဟာ ကလေးတွေကို နေရပ်ပြန်ခေါ်ရန် တွန့်ဆုတ်နေပါတယ်။ IS နဲ့ပတ်သက်နေတဲ့ ဆီးရီးယားနဲ့ အီရတ်ကလေးငယ်တွေလည်း အများကြီးရှိနေသေးပြီး သူတို့ကို လူ့အသိုင်းအဝိုင်းက ပြန်လည်လက်ခံလာစေရေးဟာ စိန်ခေါ်မှုတစ်ရပ်သဖွယ် ဖြစ်နေပါတယ်။
“ ဒီပြဿနာဟာ ချောင်ထိုးထားလို့ရတဲ့ ခေါင်းစဉ်မျိုး မဟုတ်ပါဘူး။ ဒါမျိုးတွေ ဖြစ်မလာအောင် ကြိုတင်ဖြေရှင်းမယ့်နည်းတွေ ရှိပါတယ်။ ၁၉၉၀ ပြည့်နှစ်တုန်းက ဖြစ်သွားခဲ့တဲ့ ရဝမ်ဒါ လူမျိုးတုန်းသတ်ပွဲကို ပြန်ကြည့်ကြပါ”ဟု ညွှန်ကြားရေးမှုး ကာပီလဲရ်က ပြောပြပါတယ်။
ရဝမ်ဒါအရေးအခင်းတုန်းက လူသတ်သမားတွေနဲ့ဆက်နွယ်နေတဲ့ ကလေးဦးရေ ထောင်နဲ့ချီပြီး ရှိခဲ့ပါတယ်။ ၄င်းတို့အနက် အများစုကို ရဝမ်ဒါလူ့အသိုင်းအဝိုင်းမှ ပြန်လည်လက်ခံလာအောင် လုပ်နိုင်ခဲ့ပါတယ်။ ဆီးရီးယားနဲ့ အီရတ်မှာလည်း ထိုသို့အင်အားစိုက်ထုတ် လုပ်ဆောင်ပေးရန် လိုအပ်ကြောင်း ကာပီလဲရ်က ပြောပါတယ်။ ဆီးရီယားမှာ အခြေခံအထောက်အပံ့တွေ လိုအပ်နေတဲ့ ကလေးငယ်ပေါင်း သန်းနဲ့ချီ ရှိနေပြီး ပြည်တွင်းစစ်ကာလအတွင်း ပဋိပက္ခဇုန်မှာ မွေးလာခဲ့တဲ့ ကလေးဦးရေဟာလည်း ၅ သန်းခန့်ရှိတယ်လို့ ဆိုပါတယ်။
၂၀၁၁ ခုနှစ်ကတည်းက စဖြစ်ပွားခဲ့တဲ့ ဆီးရီးယားပြည်တွင်းစစ်ကြောင့် လူ ၃၆၀,၀၀၀ ကျော် သေခဲ့ရပြီး လူဦးရေရဲ့ထက်ဝက်ကျော် ၁၃ သန်းခန့်လည်း ပြည်တွင်းပြည်ပနှစ်ရပ်စလုံးသို့ ထွက်ပြေးပြောင်းရွှေ့ခဲ့ရပါတယ်။
ZHO (အကုန်သိ သတင်းဌာန)
0 comments:
Post a Comment