အမျိုးသားပြန်လည်သင့်မြတ်ရေးနှင့်ငြိမ်းချမ်းရေးဗဟိုဌာန(NRPC)နှင့်ရှမ်းပြည်ပြန်လည်ထူထောင်ရေးကောင်စီ/ရှမ်းပြည်တပ်မတော်(RCSS/SSA)တို့နေပြည်တော်ရှိအမျိုးသားပြန်လည်သင့်မြတ်ရေးနှင့်ငြိမ်းချမ်းရေးဗဟိုဌာန(NRPC)တွင် ယမန်နေ့နံနက်ပိုင်းကတွေ့ဆုံဆွေးနွေးခဲ့ကြကာရလာဒ်ကောင်းမွန်သည့်အပြင်လိုတာထက်ပိုပြီးဆွေးနွေးနိုင်ခဲ့ကြောင်းRCSS/SSAမှအတွင်းရေးမှူး(၂)ဖြစ်သူဗိုလ်မှူးကြီးစိုင်းငင်းကပြောကြားသည်။
ဗိုလ်မှူးကြီးစိုင်းငင်းက“ဒီနေ့အခင်းအကျင်းကဆိုရင်လိုတာထက်တောင်ပိုဆွေးနွေးနိုင်တယ်။ ခုနကပြောတဲ့ဖန်တီးထားတဲ့ဆွေးနွေးတဲ့အခင်းအကျင်းရောအရမ်းကောင်းတာပေါ့နော်။ခုနကပြောသလိုလွတ်လွတ်လပ်လပ်လဲတွေ့နိုင်တယ်။ရင်းရင်းနှီးနှီးပွင့်ပွင့်လင်းလင်းလဲအားမနာတမ်းပြောနိုင်တာပေါ့နော်”ဟုဆွေးနွေးပွဲအပြီးတွင်မီဒီယာများကိုပြောသည်။
ယနေ့ဆွေးနွေးပွဲတွင်ဖမ်းဆီး/ထိန်းသိမ်းခံထားရသည့်RCSSတပ်ဖွဲ့ဝင်များနှင့်မိသားစုများကိစ္စ၊အမျိုးသားအဆင့်နိုင်ငံရေးဆွေးနွေးပွဲကျင်းပနိုင်ရေးကိစ္စ၊ဒေသဖွံ့ဖြိုးရေးကိစ္စ၊မူးယစ်ဆေးဝါးတိုက်ဖျက်ရေးကိစ္စနှင့်နေရပ်စွန့်ခွာရသူ IDPကိစ္စစသည့်အချက်(၅)ချက်ကိုအဓိကထားပြီးဆွေးနွေးခဲ့ကြကြောင်းသိရသည်။
ထို့ပြင်ငြိမ်းချမ်းရေးလုပ်ငန်းစဉ်များတွင်ရှေ့ဆက်လက်ပြီးဘယ်လိုဆောင်ရွက်မလဲဆိုသည်ကိုလည်းထည့်သွင်းဆွေးနွေးခဲ့ကြကြောင်းသိရသည်။
“ဆွေးနွေးတဲ့အပေါ်မှာလည်းကျွန်တော်တို့နှစ်ဖက်သဘောထားအမြင်တွေပွင့်ပွင့်လင်းလင်းကျေကျေလည်လည်ဆွေးနွေးတယ်။ အခက်အခဲတွေလည်းပွင့်ပွင့်လင်းလင်းပြောကြတယ်ပေါ့။ သူ့ဖက်ကိုယ့်ဖက်စိုးရိမ်မှုလဲပြောကြတယ်။ အဲ့ဒီအပေါ်မှာတော့သဘောထားစုစည်းချက်တွေရပါတယ်။ရတဲ့အပေါ်မှာတော့ကျွန်တော်တို့နှစ်ဖက်ပြန်တင်ပြပြီးတော့ဆက်ပြီးပူးပေါင်းဆောင်ရွက်သွားဖို့ရှိပါတယ်”ဟု NRPC အဖွဲ့ဝင်ဦးဇော်ဌေးကပြောသည်။
ထို့ပြင်ဖမ်းဆီးထိန်းသိမ်းခံရသောRCSSတပ်ဖွဲ့ဝင်များနှင့်မိသားစုကိစ္စကိုပြန်လည်စိစစ်ပြီးယင်းအပေါ်တွေ့ရှိချက်ကိုNRPCအစည်းအဝေးတွင်တင်ပြဆောင်ရွက်သွားရန်ရှိကြောင်း၊မူးယစ်ဆေးဝါးကိစ္စမှာလည်းနိုင်ငံအတွင်းပြန့်ပွားနေပြီးယင်းအပေါ်နှစ်ဦးနှစ်ဖက်စိုးရိမ်မှုများရှိကာဘယ်လိုမျိုးအကောင်းဆုံးပူးပေါင်းဆောင်ရွက်သွားမလဲဆိုတာကိုလည်းဆွေးနွေးခဲ့ကြကြောင်းသိရသည်။
လာမည့်စတုတ္ထအကြိမ်(၂၁)ရာစုပင်လုံကိုသွားရန်အတွက်RCSSအနေဖြင့်ရှမ်းအမျိုးသားအဆင့်နိုင်ငံရေးဆွေးနွေးပွဲကိုဖြတ်သန်းနိုင်ရမည်ဖြစ်ပြီးယင်းကိစ္စကိုယနေ့အကျေအလည်ဆွေးနွေးခဲ့ကြကာနှစ်ဦးနှစ်ဖက်အဆိုပြုချက်များရရှိခဲ့ပြီးထိုမှတစ်ဆင့်ထပ်မံညှိနှိုင်းရန်လိုအပ်သေးကြောင်းလည်းဗိုလ်မှူးကြီးစိုင်းငင်းကဆိုသည်။
ယနေ့(မတ် ၁၂)တွင်လည်း RCSSအနေဖြင့်တပ်မတော်နှင့်ထပ်မံတွေ့ဆုံသွားရန်ရှိပြီး တပ်ပိုင်းဆိုင်ရာကိစ္စရပ်များကိုဆွေးနွေးသွားရန်လည်းရှိကြောင်းသိရသည်။
ဖူးဖူးအောင်
Popular News Journal
0 comments:
Post a Comment