ရှမ်းပြည်နယ်မြောက်ပိုင်း နမ္မတူမြို့နယ်အတွင်း တိုက်ပွဲများကြား ပျောက်ဆုံးသွားသည့် မန်လီရွာသားများကို ရှမ်းပြည်ပြန်လည် ထူထောင်ရေးကောင်စီ (RCSS) က ဖမ်းဆီးသွားခြင်းဖြစ်ကြောင်း တအန်းလူမှုအရပ်ဘက်အဖွဲ့အစည်း ၂ ဖွဲ့ က စွပ်စွဲပြောဆိုလိုက်သည်။
RCSS ဖမ်းဆီးသွားသည်ကို သက်သေများရထားကြောင်း ပြောဆိုသည့် တအန်းလူမှုအရပ်ဘက်အဖွဲ့အစည်း ၂ ဖွဲ့မှာ တအန်းအမျိုးသမီးအဖွဲ့ (TWO)၊ တအန်းကျောင်းသားနှင့် လူငယ်အဖွဲ့ (TSYU) တို့ ဖြစ်ကြသည်။
TWO မှ တွဲဖက်အတွင်းရေးမှူး (၁) မလွေးပိုးကမေခေးလ်က မတ်လ ၆ ရက်တွင် မန်လီရွာသားများမှ ကောက်ရသည်ဟုဆိုသော မန်မိုရီကတ်တခုကို လာအပ်နှံသဖြင့် ဖွင့်ကြည့်ရာ RCSS မှ မန်လီရွာသားများကို ဖမ်းဆီးထားသည့် မှတ်တမ်းဓာတ်ပုံသက်သေများ ရရှိလိုက်ခြင်း ဖြစ်သည်ဟု ပြောသည်။
မလွေးပိုးကမေခေးလ်က “မန်မိုရီကတ်ထဲမှာ ပျောက်ဆုံးနေသူတွေထဲက ၈ ဦးရဲ့ ပုံတွေ တွေ့တယ်။ တခြားသော RCSS တပ်စခန်း ဓာတ်ပုံတွေ၊ ဦးယွတ်ဆစ်နဲ့ တွဲရိုက်ထားတဲ့ ပုံတွေ တွေ့တယ်။ ကျမတို့ အစပိုင်းက သိထားတာ ၁၀ ယောက်၊ အခု စစ်ဘေးရှောင်တွေကို သွားကူရင်း သိရတာ ပျောက်နေတာ အားလုံးက ၁၂ ယောက်ပါ” ဟု ဆိုသည်။
ဖေဖော်ဝါရီလ ၂၇ ရက်မှ မတ်လ ၁ ရက်အထိ မန်လီ ကျေးရွာအနီးတွင် ပလောင် (တအန်း)အမျိုးသားလွတ်မြောက်ရေးတပ်မတော် (TNLA)၊ ရှမ်းပြည်တိုးတက်ရေးပါတီ (SSPP)တို့ ပူးပေါင်းတပ်ဖွဲ့နှင့် RCSS တို့ကြား တိုက်ပွဲများဖြစ်ပွားခဲ့သည်။
တိုက်ပွဲများဖြစ်ပွားရာတွင် ဒေသခံရွာသားများ ထွက်ပြေးကြရင်း ပျောက်ဆုံးသွားခြင်းဖြစ်ကာ ပျောက်ဆုံးနေသူထဲမှ တဦးမှာ ထွက်ပြေးနေသည့် စစ်ဘေးရှောင်ဒုက္ခသည်များကို ကူညီရန်သွားသည့် မန်လီနာရေးကူညီမှုအသင်းမှ ဦးစိုင်းငယ် ဖြစ်သည်။
မလွေးပိုးကမေခေးလ်က “TNLA နဲ့ SSPP က ဖမ်းရင်ဖမ်းကြောင်း ဝန်ခံလေ့ရှိတယ်။ သူတို့ဘက်ကလည်း ဖမ်းတဲ့အရိပ်အယောင် မတွေ့ရဘူး။ မန်မိုရီကတ်အရ ၁၀၀ ရာနှုန်း သူတို့ဖမ်းတယ်လို့ ယူဆရတယ်” ဟု ပြောသည်။
RCSS၏ ပြောရေးဆိုခွင့်ရှိသူ ဒုဗိုလ်မှူးကြီး စိုင်းမိဏ်းက မန်လီ ရွာသားများ ပျောက်ဆုံးနေမှုအပေါ် ၎င်းတို့ အောက်ခြေတပ်များကို စိစစ်မှုများ ပြုလုပ်ထားပြီး နယ်မြေသတင်းများအရ ရွာသားများကို ဖမ်းသည်မှာ TNLA နှင့် SSPP မဟာမိတ်တပ်ပေါင်းစုဘက်က ဖြစ်သည်ဟု ဧရာဝတီကို ပြောဆိုသည်။
RCSS အနေဖြင့် အရပ်သားများကို ထိခိုက်နစ်နာအောင် လုံးဝမပြုလုပ်ရန်၊ ပြည်သူပိုင်ပစ္စည်းများ ထိခိုက်စေခြင်းနှင့် အရပ်သားများ ဝန်ထုပ်ဝန်ပိုး ဖြစ်စေခြင်းတို့ကို မလုပ်ရန် အောက်ခြေတပ်များကို အမိန့်ပေးထားပြီး ဖြစ်ကာ မလိုက်နာပါက ထိရောက်စွာ အရေးယူရန် အမိန့်ချထားသည်ဟုလည်း ဒု ဗိုလ်မှူးကြီး စိုင်းမိဏ်းက ဆိုသည်။
TWO နှင့် TSYU တို့ သက်သေရရှိထားသည်ဟု ပြောဆိုချက်အပေါ်တွင် မေးမြန်းရာ RCSS မှ ပြောရေးဆိုခွင့်ရှိသူ ဒုဗိုလ်မှူးကြီး စိုင်းဦးက “ကတ်ကောက်ရတယ်ဆိုတာကလည်း သူတို့ ဖြစ်လို့ သူတို့ ကောက်ရတာ နေမှာပေါ့။ ကတ်တခု ကောက်ရဖို့ဆိုတာ လွယ်မှ မလွယ်ဘဲ” ဟု ပြောသည်။
မလွေးပိုးကမေခေးလ်ကမူ ၎င်းတို့ ရရှိထားသည့် မန်မိုရီကတ်ပါဓာတ်ပုံနှင့် ရုပ်သံမှတ်တမ်းများအရ ကတ်ပိုင်ရှင်မှာ RCSS တပ်ဖွဲ့ဝင် ဖြစ်ပြီး ဓာတ်ပုံထဲပါ ကြိုးတုပ်၊ မျက်စိ အဝတ်အုတ်၊ လည်ပင်း ကြိုးချည် ခံထားရသည့် အရပ်သား ၈ ဦးမှာလည်း မန်လီရွာမှ ပျောက်ဆုံးနေသူများ ဖြစ်သည်ဟု အခိုင်အမာ ပြောဆိုသည်။
ဆက်လက်၍ ၎င်းက RCSS တပ်ဖွဲ့၏ မစ်မိုရီကတ်ဖြစ်သည်ဟု ဆိုရခြင်းမှာလည်း ကတ်ထဲ၌ မန်လီရွာသား ၈ ဦး၏ ဓာတ်ပုံအပြင် RC SS တပ်စခန်းပုံများ၊ တပ်ဖွဲ့ဝင်ပုံများ၊ ဖုန်းပိုင်ရှင် RCSS တပ်ဖွဲ့ဝင် ၏ မိသားစုများနှင့်အတူ ရိုက်ထားသည့် ရုပ်သံမှတ်တမ်းများ၊ ဓာတ်ပုံများကြောင့် ပြောဆိုရခြင်းဖြစ်သည်ဟု ဆိုသည်။
မလွေးပိုးကမေခေးလ်က “ပုံထဲမှာ ရွာသားတွေက ကြိုးနဲ့ ချည်ခံ ထားရတယ်။ ရေတွေ စိုနေတယ်။ ရေတွေစိုနေတဲ့ပုံက သွေးတွေကို ဆေးချပြီးမှ ရိုက်ထားတဲ့ ဓာတ်ပုံဖြစ်ပါတယ်။ ပုံထဲမှာ ငုတ်တုတ်ထိုင် လက်နောက်ပစ်ကြိုးတုပ်ပြီး လည်ပင်းမှာလည်း ကြိုးစွပ်ထားတာ တွေ့ပါတယ်” ဟု ပြောဆိုသည်။
TSYU မှ တွဲဖက်အတွင်းရေးမှူး(၁)၊ မလွေးပိုးဂျေကလည်း မစ်မိုရီကတ် အတွင်းရရှိထားသည့် အချက်အလက်များအရ ပျောက်ဆုံးနေသည့် မန်လီရွာသားများကို RCSS က ဖမ်းဆီးခြင်း ဖြစ်သည်ဟု ဆိုထားသည်။
မလွေးပိုးဂျေက “အဓိက က သူတို့(RCSS) ဖမ်းသွားတဲ့ သူတွေကို အမြန်ဆုံး ပြန်လွှတ်ပေးဖို့ပါ။ အပြစ်မဲ့တဲ့ ပြည်သူတွေကို သူတို့ မိသားစု၊ သူတို့ရဲ့ ကိုယ်ဝန်ဆောင် မိန်းမတွေ၊ ကလေးတွေ အရမ်း မျှော်နေပါတယ်။ အမြန်ဆုံး ပြန်လွှတ်ပေးဖို့ တောင်းဆိုချင်ပါတယ်” ဟု ပြောဆိုသည်။
TWO နှင့် TSYU က မတ်လ ၇ ရက် ရက်စွဲဖြင့် ထုတ်ပြန်ချက် တစောင် ထုတ်ခဲ့ပြီး ပျောက်ဆုံးနေသည့် ရွာသားများမှာ ၁၀ ဦး မဟုတ်ဘဲ ၁၂ ဦး ဖြစ်ကြောင်း၊ ဖမ်းဆီးခံထားရသည့် ရွာသားများ၏ အသက်အန္တရာယ်ကို စိုးရိမ်နေ သဖြင့် ခြွင်းချက်မရှိ အမြန်ဆုံး ပြန်လွှတ်ပေးရန် တောင်းဆိုသည်ဟု ရေးသားထားသည်။
ရှမ်းပြည်နယ်မြောက်ပိုင်း ကျောက်မဲ၊ သီပေါ၊ လားရှိုး၊ မန်တုံနှင့် နမ္မတူစသည့် မြို့နယ်တို့တွင် TNLA နှင့် RCSS တို့ကြား နယ်မြေ အငြင်းပွားပြီး တိုက်ပွဲများ ဖြစ်ပွားနေသည်မှာ၂၀၁၅ ခုနှစ် နှစ်ကုန်ပိုင်းမှ စတင်ခဲ့ခြင်းဖြစ်သည်။
RCSS သည် ၂၀၁၅ ခုနှစ် အောက်တိုဘာလ ၁၅ ရက်တွင် အစိုးရနှင့် တနိုင်ငံလုံး ပစ်ခတ်တိုက်ခိုက်မှုရပ်စဲရေး စာချုပ်ချုပ်ဆိုပြီးနောက် ရှမ်းပြည်နယ်မြောက်ပိုင်းသို့ တပ်အများအပြားဝင်ရောက် လှုပ်ရှားလာခြင်း ဖြစ်သည်။
TNLA က RCSS ကို နယ်မြေကျူးကျော်လာသူဟု စွပ်စွဲထားပြီး RCSS က ရှမ်းပြည်နယ်တွင်း ရှမ်းလက်နက်ကိုင်တပ်ဖွဲ့တခု ဖြစ်သည့် ၎င်းတို့က နေရာတိုင်းသွားလာနိုင်သည်ဟု ပြန်လည် တုန့်ပြန်ထားသည်။
၂၀၁၈ ခုနှစ် သြဂုတ်လတွင် ရှမ်းပြည်နယ်မြောက်ပိုင်း အခြေစိုက် ရှမ်းပြည် တိုးတက်ရေးပါတီ (SSPP/SSA) က TNLA နှင့် ပူးပေါင်းကာ RCSS ကို တိုက်ခိုက်လျက်ရှိသည်။
၂၀၁၈ ခုနှစ်အတွင်း နမ္မတူမြို့နယ် ပန်ကွတ်ကျေးရွာတွင်လည်း TN LA နှင့် RCSS တို့၏ ပဋိပက္ခများကြား ရွာသား ၁၁ ဦး ပျောက်ဆုံး ထားသည်။
မိသားစုဝင်များနှင့် ပန်ကွတ်ဒေသခံများက ၎င်းတို့ရွာသား ၁၁ ဦးကို RCSS က ဖမ်းဆီးသွားခြင်း ဖြစ်သည်ဟု ပြောဆိုနေပြီး RCSSက ၎င်းတို့ မသိကြောင်းနှင့် မဖမ်းကြောင်း ငြင်းဆိုထားသည်။
ပန်ကွတ်ရွာသား ၁၁ ဦးမှာလည်း ယနေ့ထိ ၎င်းတို့ ရွာသို့ ပြန်ရောက်လာခြင်းမရှိသေးပါ။
0 comments:
Post a Comment