လွှတ်တော်၏ဆုံးဖြတ်ဆောင်ရွက်ချက်များကို ဥပဒေနှင့်မညီဟု ထပ်ခါထပ်ခါ ကန့်ကွက်နေခြင်းအပေါ် ဒီချုပ်အမတ်များထောက်ပြ

ပြည်ထောင်စုလွှတ်တော်အတွင်း ဆုံးဖြတ်ဆောင်ရွက်ထားသည့်ကိစ္စများကို ဥပဒေနှင့်မညီဟု ထပ်ခါထပ်ခါ ကန့်ကွက်နေခြင်းများအား အမျိုးသားဒီမိုကရေစီအဖွဲ့ချုပ် (NLD)လွှတ်တော်ကိုယ်စားလှယ်များက ယမန်နေ့ (မတ်လ ၁၂ ရက်)တွင် ကျင်းပသော ပြည်ထောင်စုလွှတ်တော် အစည်းအဝေး၌ လွှတ်တော်ဥပဒေ၊ နည်းဥပဒေများ ကိုးကားပြီး ထောက်ပြဆွေးနွေးခဲ့သည်။

ပြည်ခိုင်ဖြိုးပါတီအမတ် ဦးသိန်းထွန်းအပါအဝင် ပြည်ထောင်စုလွှတ်တော်ကိုယ်စားလှယ် ၁၄၃ ဦးတင်သွင်းသည့်ပုဒ်မ ၂၆၁ ပြင်ဆင်ရေးဆိုင်ရာ ဥပဒေကြမ်းကို လေ့လာစိစစ်ရန် ဖွဲ့စည်းထားသည့် ပူးပေါင်းကော်မတီက မတ်လ ၅ ရက်တွင် လွှတ်တော်သို့ တင်သွင်းခဲ့သည့် အစီရင်ခံစာနှင့်ပတ်သက်ပြီး လွှတ်တော်တွင် ဆွေးနွေးစဉ် အစီရင်ခံစာပါ အချက်များကို ကန့်ကွက်ပြီး ပုဒ်မ ၂၆၁ ပြင်ဆင်ရေးဆိုင်ရာ မူကြမ်း ကို ဖွဲ့စည်းပုံအခြေခံဥပဒေပြင်ဆင်ရေးပူးပေါင်းကော်မတီ၏ လုပ်ငန်းစဉ်တွင် ထည့်သွင်းခြင်းမပြုရန် တပ်မတော်၊ ပြည်ခိုင်ဖြိုးနှင့် ရခိုင်အမျိုးသားပါတီလွှတ်တော် ကိုယ်စားလှယ်များက ဆွေးနွေးခဲ့သည်။

ပုဒ်မ ၂၆၁ သည် ပြည်နယ်နှင့် တိုင်းဝန်ကြီးချုပ်ကို သမ္မတက ခန့်အပ်သည့်ပုဒ်မဖြစ်ကြောင်း၊ အခြေခံဥပဒေပုဒ်မတစ်ခုသည် သီးခြားရပ်တည်နေခြင်းမဟုတ် ဘဲ ချိတ်ဆက်နေကြောင်း ဒီချုပ် အမတ် ဦးမျိုးဝင်းက ဆွေးနွေး သည်။

ထိုသို့ ချိတ်ဆက်ပြင်ဆင် ခြင်းမရှိပါက ဥပမာအားဖြင့် ဝန် ကြီးများကို သမ္မတက ခန့်အပ်နေ ရခြင်းများ၊ လွှတ်တော်က ခန့်ခွင့်ရှိပြီး ဖြုတ်ခွင့်မရှိခြင်းများ၊ သက်ဆိုင်ရာလွှတ်တော်ကိုယ်စားလှယ်များက ဝန်ကြီးချုပ်ကို ကြိုက်သလောက်ခန့်၊ သမ္မတက သဘောမကျပါက ဝန်ကြီးချုပ်နှင့် ဝန်ကြီးများကို ကြိုက်သလို ဖြုတ်လို့ရခြင်းများ စသည့် သက်ဆိုင်ရာ ပုဒ်မ ၂၆၁၊ ၂၆၂၊ ၂၆၃၊ ၂၆၄ တို့ကို ပြသ၍ဦးမျိုးဝင်းကဆွေးနွေးသည်။

‘‘အဲဒါတွေဟာ ဒီလိုချိတ်ဆက်နေတဲ့အတွက် စိစစ်ရေးပူးပေါင်းကော်မတီက ဒီ ၂၆၁ ကို ပြင်မယ်ဆိုပါက ဆက်နွှယ်နေတဲ့အတွက် ၄၅ ကော်မတီထဲ ထည့်သွင်းဆောင်ရွက်သင့်ပါကြောင်း စိစစ်တွေ့ရှိချက် အနှစ်ချုပ်လေးကိုပဲ ထည့်လိုက်တော့ ဥပဒေနဲ့မညီဘူးဆိုပြီး ကန့်ကွက်သံတွေ ထွက်လာတာလို့ ထင်ရပါတယ်’’ ဟု ၎င်းက ဆိုသည်။

ကိုယ်စားလှယ်တစ်ဦးအနေဖြင့် ကန့်ကွက်ပိုင်ခွင့်ရှိသော်လည်း ဥပဒေနှင့် ညီ၊ မညီ ဆုံးဖြတ်ပိုင်ခွင့်မရှိဘဲ သက်ဆိုင်ရာ ခုံရုံးကသာ လုပ်ဆောင်ရမည့် အလုပ်ဖြစ်ကြောင်း ဦးမျိုးဝင်းက ပြောသည်။

နိုင်ငံနှင့် လူမျိုးအတွက် အကျိုးဖြစ်ထွန်းစေမည့်ကိစ္စများကို မည်သည့်လွှတ်တော်ကိုယ်စားလှယ်မဆို လွှတ်တော်တွင် အဆိုတင်သွင်းခွင့်ရှိကြောင်း၊ အဆိုအပေါ် သဘောထားမညီပါက ဒီမိုကရေစီနည်းကျ များရာမဲနှင့် လွှတ်တော်၌ ဆုံးဖြတ်အတည်ပြုရခြင်းသည် လွှတ်တော်၏ အစဉ်အလာဖြစ်ကြောင်း ၎င်းကဆိုသည်။

ပြည်ခိုင်ဖြိုးအမတ် ဦးသောင်းအေးကမူ လက်ရှိဆောင်ရွက်ချက် များသည် ဥပဒေနှင့်မညီကြောင်း၊ ထို့ကြောင့် ပြည်ထောင်စုလွှတ်တော်အနေဖြင့် ဥပဒေပြုရေးမဏ္ဍိုင်၏ ဂုဏ်သိက္ခာကို ထိန်းသိမ်းနိုင်ရန် အကြံပြုလိုကြောင်း ဆွေးနွေးသည်။

‘‘အကြံပြုတင်ပြလိုတာကတော့ နံပါတ် (၁) အရေးကြီးအဆို မဟုတ်တဲ့ ဦးအောင်ကြည်ညွန့်ရဲ့ အရေးကြီးအဆို အတည်ပြုခဲ့ခြင်းကို ပြန်လည်ရုပ်သိမ်းပြီးတော့ ဥပဒေနဲ့ မညီတဲ့ ၄၅ ဦး ကော်မတီကို ဖျက်သိမ်းရန်’’ဟု ဦးသောင်းအေးက ဆွေးနွေးပြီး ပုဒ်မ ၂၆၁ ပြင်ဆင်ရန်အချက်ကို ဥပဒေ၊ နည်းဥပဒေများနှင့်အညီ ဆက်လက်ဆောင်ရွက်ပေးပါဟု ၎င်းကပြောကြားခဲ့သည်။

7Day News Journal