မွန်ပြည်နယ် ကျိုက်ထိုမြို့နယ်ရှိ ဆံတော်ရှင် ကျိုက်ထီးရိုးစေတီတော်ကြီးတည်ရှိရာ ကျိုက်ထီးရိုးတောင်ပေါ်ရှိ အမှိုက်ခွဲခြား သန့်စင်စက်ရုံမှ လုပ်ငန်းများ စတင်လည်ပတ်ပါက စားသောက်ဆိုင်နှင့် ဈေးဆိုင်များမှ ထွက်ရှိသော အမှိုက်များအား သတ်မှတ်ထားသည့် နေရာများ၌ စနစ်တကျစွန့်ပစ်ခြင်း မရှိပါက လေလံစည်းမျဉ်းစည်းကမ်းအရ အရေးယူမည်ဖြစ်ကြောင်း ဆံတော်ရှင်ကျိုက် ထီးရိုးစေတီတော် ဘဏ္ဍာတော်ထိန်းဂေါပက အဖွဲ့ထံမှ သိရသည်။
လတ်တလောအခြေအနေအရ စားသောက်ဆိုင်များ၊ ဈေးဆိုင်များမှ အမှိုက်စွန့်ပစ်မှုများနှင့်ပတ်သက်ပြီး စည်းကမ်းပိုင်းအရ အရေးယူဆောင်ရွက်မှုများမရှိသေး သော်လည်း ကျိုက်ထီးရိုးတောင်ပေါ်၌ တည်ဆောက်နေသည့် အမှိုက်ခွဲခြားသန့်စင်စက်ရုံ လုပ်ငန်းများ စတင်လည်ပတ်ပါချိန်မှစတင်ကာ သတ်မှတ်နေရာများတွင် အမှိုက်စွန့်ပစ်မှု မရှိပါက စည်းကမ်းမဲ့အမှိုက်ပစ်သည့်ဆိုင်များအား လေလံစည်းမျဉ်းစည်းကမ်းအရ ဆိုင်ပိတ်သိမ်းသည်အထိ အရေးယူမှုပြုလုပ်သွားမည်ဖြစ်ကြောင်း ဆံတော်ရှင်ကျိုက်ထီးရိုးစေတီတော် ဘဏ္ဍာတော်ထိန်းဂေါပက အဖွဲ့ဝင် ဦးတင်ဝင်းက ပြောကြားသည်။
၎င်းကဆက်လက်ပြီး “စက်ရုံလည်ပတ် ပြီဆိုတာနဲ့ တောင်ကထွက်တဲ့ တစ်နေ့စာ အမှိုက်တွေကို ရှင်းမယ်။ ဘုရားဖူးနည်းပါးတဲ့ အချိန်တွေဆို ယခင်စွန့်ပစ်ထားတဲ့နေရာတွေက အမှိုက်တွေကို ပြန်ဆည်ပြီး ဒီစက်ရုံထဲ ထည့်ရမှာပါ။ အမှိုက်သန့်စင်စက်ရုံမှာရှိတဲ့ သတ်မှတ်ထားတဲ့နေရာမှာ မိမိအမှိုက်တွေကို လာရောက်စွန့်ပစ်ဖို့တော့ လိုမယ်။ အဲဒီ အမှိုက်ခွဲခြားသန့်စင်စက်ရုံကတော့ တည်ဆောက်ပြီးစီးနေပြီဖြစ်ပါတယ်။ အဲဒီစက်ရုံကို ပြည်နယ်ဝန်ကြီးချုပ်ကနေ လာရောက်စစ်ဆေးပြီးရင် လုပ်ငန်းတွေ စတင်လည်ပတ်မှာ ဖြစ်ပါတယ်။ အမှိုက်ခွဲခြားသန့်စင်စက်ရုံကို ဒီလအတွင်းမှာ စတင်လည်ပတ်နိုင်မှာ ဖြစ်ပါတယ်” ဟု ဆိုသည်။
ကျိုက်ထီးရိုးတောင်ပေါ်၌ ပလတ်စတစ်အမှိုက်များအပါအဝင် အမှိုက်မျိုးစုံ နေ့စဉ်အမှိုက် ငါးတန်ခန့်ထွက်ရှိကြောင်း၊ ဘဏ္ဍာတော်ထိန်းဂေါပကအနေဖြင့် ကျိုက်ထီးရိုးရင်ပြင်တော်စခန်း၌ အမှိုက်သိမ်းဝန်ထမ်း ၄၀ ခန့်ထားဆောင်ရွက်လျက်ရှိပြီး ကျန်နေရာများဖြစ်သော ဈေးဆိုင်တန်းများ နှင့် နေအိမ်များမှ ထွက်ရှိသော အမှိုက်များအား သတ်မှတ်နေရာများတွင် စွန့်ပစ်ခိုင်းထားကြောင်း ဦးတင်ဝင်း ပြောကြားသည်။
အဆိုပါ အမှိုက်ခွဲခြားသန့်စင်စက်ရုံ လုပ်ငန်းလည်ပတ်ပါက နေ့စဉ် အမှိုက် ၁၀ တန်အထိ အမှိုက်အမျိုးအစားခွဲခြားသန့်စင်ကာ ထွက်လာသောပစ္စည်းများအား ဖိနှိပ်ခြင်း၊ သိုလှောင်ခြင်း၊ ပြုပြင်ခြင်းများ ပြုလုပ်သွားမည်ဖြစ်ကြောင်း သိရသည်။
Eleven Media Group
0 comments:
Post a Comment