ထိုင်းမြောက်ပိုင်း၊ ချင်းမိုင်ခရိုင်၊ မယ့်အိုင်းမြို့နယ်ရှိ မြန်မာနယ်စပ်အနီးမှာ ဒီနေ့ မနက်စောစောက မူးယစ် ဆေးဝါးသယ်ဆောင်လာသူနဲ့ ထိုင်းမူးယစ်ရဲတပ်ဖွဲ့တို့ ပစ်ခတ်မှုဖြစ်ပွား ပြီး မူးယစ်သယ်သူ ၁ ဦး သေဆုံးကာ ၁ ဦးကို စိတ်ကြွဆေး အလုံးရေ ၁၀ သန်းနီးပါးနဲ့အတူ ဖမ်းဆီးရမိတယ်လို့ ချင်းမိုင်နယူးစ်သတင်းမှာ ဖော်ပြပါတယ်။
မယ့်အိုင်းမြို့နယ်၊ ထာ့တွန်းကျေးရွာအုပ်စုထဲမှာ မြန်မာဘက်ခြမ်းကနေ ထိုင်းနိုင်ငံအတွင်းပိုင်း မူးယစ်ကုန်သည်တွေထံ မူးယစ်ဆေးတွေ လာပို့ဖို့ရှိကြောင်း ကြိုတင်သတင်းအရ ထိုင်းမူးယစ်ရဲနဲ့ စစ်တပ်တို့ပါတဲ့ ပူးပေါင်းအဖွဲ့ဝင်တွေဟာ ဆန်တွန့်တူကျေးရွာအစပ်တောထဲ ကနေ စောင့်ဆိုင်း နေခဲ့ကြတာပါ။
ဒီနေ့မနက် ၁နာရီ ကျော်လောက်မှာတော့ လူ ၃၀ လောက်ဟာ အထုပ်ကိုယ်စီနဲ့ မြန်မာဘက်ခြမ်း တောအုပ်တွေထဲနေ ဝင်ရောက်လာပြီး အသင့်ရပ်ထားတဲ့ ဟိုင်းလပ်ကား ၂ စီးပေါ်ကို အထုပ်တွေပို့လာခဲ့တယ်လို့ ချင်းမိုင်ခရိုင်ရဲတပ်ဖွဲ့မှ ဒုရဲမှူးကြီး ဆုန်းကလစ်အွန်တခိုက်က သတင်းထောက်တွေကို ပြောပါတယ်။
တာဝန်ရှိသူတွေက စစ်ဆေးဖို့ လူယောင်ထွက်ပြလိုက်တဲ့အခါမှာတော့ မူးယစ်သယ်ဆောင်သူ တွေဘက်က အမည်မသိသေနတ်တွေနဲ့ စတင်ပစ်ခတ်သလို ဗုံးနဲ့လည်းပစ်ပေါက်ခဲ့ကြောင်း၊ အဲဒီနောက် နှစ်ဘက် အပြန်အလှန်ပစ်ခတ်ရာမှာ ၁၀ မိနစ်ကျော်ကြာပြီး အသံတွေငြိမ်သွားမှ တာဝန်ရှိသူတွေက နယ်မြေဝင်ရောက်ရှင်းလင်းခဲ့ကြောင်း၊ မူးယစ်သယ်ဆောင်သူဘက်က ဒဏ်ရာ ရသူ ၂ ဦးရှိပြီး ၁ ဦးမှာ သေဆုံးပြီဖြစ်ကာ ၁ ဦးကိုတော့ အရှင်ဖမ်းမိတယ်လို့ ဒုရဲမှူးကြီးက ဆက်ပြောပါတယ်။
အဲဒီနောက် ရပ်ထားတဲ့ ဟိုင်းလပ်ကား ၃ စီးပါ သိမ်းဆည်းရမိပြီး ၂ စီးမှာ စိတ်ကြွ ဆေးပြားတွေ သယ်ဆောင်ကာ နောက်တစီကတော့ လမ်းပြယာဉ်ဖြစ်ကြောင်း၊ မူးယစ်ဆေးတင်တဲ့ ကား ၂ စီးပေါ်ကနေ စိတ်ကြွဆေး အလုံးရေ စုစုပေါင်း (၉၈ သိန်း)ကို ဖမ်းမိခဲ့တာလို့ ဆိုပါတယ် ။
သေဆုံးသူနဲ့ ဒဏ်ရာရသူနာမည်ကိုတော့ မသိရသေးကြောင်း၊ သူတို့တွေဟာ မြန်မာနိုင်ငံ ဘက်က တိုင်းရင်းသားတွေလို့ ယူဆရပြီး မူးယစ်ဆေးဝါးတွေကတော့ တောင်ပိုင်း ၀ တပ်ဖွဲ့ ဘက်ကဟာတွေ ဖြစ်နိုင်တယ်လို့ အမှတ် ၅ တိုင်းဒေသရဲဌာနချုပ် ဒုရဲမှူးကြီးက ပြောပါတယ်။
DVB
0 comments:
Post a Comment