ဆည်မြောင်း တာတမံကြီးများ အန္တရာယ်ကင်း လုံခြုံစိတ်ချစေရန် အတွက် အစိုးရ၏ ထိန်းသိမ်းစောင့်ရှောက်မှု အစီအစဉ်များကို အမျိုးသားဒီမိုကရေစီအဖွဲ့ချုပ် (NLD) ပါတီအမတ်က ယမန်နေ့ ကျင်းပသည့် လွှတ်တော်၌ မေးခွန်းထုတ်လိုက်သည်။
ဆည်တာတမံကြီးများကို အရည်အသွေး ပြည့်ဝစွာ တည်ဆောက်ထားသော်လည်း စနစ်တကျ ထိန်းသိမ်းစောင့်ရှောက် ခြင်း မပြုလုပ်ပါက ကြီးမားသော ဘေးအန္တရာယ်နှင့် ကြုံတွေ့နိုင်သဖြင့် ယခုကဲ့သို့ လွှတ်တော်သို့ မေးမြန်းရခြင်းဖြစ်ကြောင်း NLD ပါတီ မန္တလေးတိုင်းဒေသကြီး မဲဆန္ဒနယ် အမှတ် ၂ အမျိုးသား လွှတ်တော် ကိုယ်စားလှယ် ဦးထွန်းထွန်းဦးက ပြော သည်။
၎င်းက “ယခုခေတ် ရာသီဥတုဟာ ဘာမှ မဖြစ်နိုင်ဘူးဆိုတာ ဘာမှ မရှိသဖြင့် နိုင်ငံတော်၏ ပြည်သူ့ အကျိုးငှာ၊ ထိန်းသိမ်း စောင့်ရှောက်လျက်ရှိသော တမံကြီးများကို အန္တရာယ်ကင်း လုံခြုံ စိတ်ချရန် မည်ကဲ့သို့ ထိန်းသိမ်းစောင့်ရှောက် စီမံနေသည်ကို သိရှိလိုပါတယ်” ဟု လွှတ်တော်တွင် မေးမြန်း သွားသည်။
ယင်းသို့ မေးမြန်းမှုကို စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒု ဝန်ကြီး ဦးလှကျော်က ရေစီးဝင်မှု ပမာဏ များပြားသည့် ရေလှောင်တမံများ၌ အကူရေပိုလွှဲများ ထပ်မံထည့်သွင်း တည် ဆောက်ခြင်း၊ ရေလှောင်တမံ ကြံ့ခိုင်မှု၊ ဘေး ကင်းလုံခြုံမှုများ အတွက် စောင့်ကြည့် စစ်ဆေးတိုင်းတာ နိုင်သည့် Monitoring system များ တပ်ဆင်သွားရန် စီစဉ်လျက် ရှိကြောင်း ပြန်လည် ဖြေကြား ခဲ့သည်။
ဦးလှကျော်က “ပြည်သူများ အသက်အိုးအိမ် စည်းစိမ် ထိခိုက်ပျက်စီးမှု လျော့ပါး သက်သာစေဖို့ ဒေသဆိုင်ရာ အုပ်ချုပ် ရေး အဖွဲ့အစည်းတွေ၊ ဆက်စပ်ဌာနတွေနဲ့ ပူးပေါင်းပြီး ကြိုတင် စီမံဆောင်ရွက် နိုင်ရေး အတွက် ရေလှောင်တမံ တခုချင်း အလိုက် အရေးပေါ် အခြေအနေ ကြိုတင်စီမံခန့်ခွဲမှု စီမံချက်(EPP- Emergency Preparedness Plan) တွေ စနစ်တကျ ရေးဆွဲ ဆောင်ရွက်လျက်ရှိ ပါတယ်” ဟုလည်း ပြောကြားခဲ့သည်။
ထိုသို့ ဖြေကြားချက်များတွင် အားရစရာ အဖြေ ပါဝင်ခြင်း မရှိဘဲ ဝန်ကြီးဌာန အနေဖြင့် ယခုထက်ပို ၍ အားစိုက်ပြီး လုပ်စေ ချင်ကြောင်း၊ ဝန်ကြီးဌာနဘက်မှ ဆည်များ၏ ခံနိုင်ရည် ရှိမရှိကို စစ်ဆေးပြီး အခြေအနေကောင်းသည် ဟု ပြောပြီးနောက် ရက်မှာပဲ ဖြစ်သွားခဲ့သည့် ဆွာရေလွှဲဆည် ကိစ္စမျိုး မဖြစ်ရန် လိုအပ်ကြောင်း ဦးထွန်းထွန်းဦးက လွှတ်တော်အစည်းအဝေး အပြီးတွင် မီဒီယာများကို ပြောသည်။
မြန်မာနိုင်ငံ တာတမံကြီးများ ဆိုင်ရာ အမျိုးသားကော်မတီ အလုပ်အမှုဆောင် အဖွဲ့ဝင် ဒေါက်တာ ယုမောင်က “ဝန်ကြီး ဌာန အနေနဲ့ အဆင့်ဆင့် လုပ်ထားတာတွေ ရှိတယ်။ နောက်ပိုင်းမှာ စမ်းသပ်မှု တွေ ပြုလုပ်လာတာ တွေ့ရတယ်။ ဘယ်လို အခြေအနေမှာ ဘာဖြစ်နိုင်တယ် ဆိုတာတွေ စသဖြင့် လုပ်တာ တွေ့ရတယ်” ဟု သုံးသပ်ပြောဆိုသည်။
ဆည်မြောင်းများမှာ များစွာ အန္တရာယ်ရှိသည့် အတွက် ဆည်မြောင်း၊ တမံများ ပြုပြင်ထိန်းသိမ်း စရိတ်အဖြစ် နှစ်စဉ် ဘီလီယံ ၇၀ ခန့် ခွင့်ပြုထားကြောင်း၊ ယင်းဘတ်ဂျက်များကို အမှန်တကယ် ပြုပြင်ထိန်းသိမ်းရန် လိုအပ်သည့် ဆည်၊ မြောင်း ၊ တာတမံများ ထံသို့ ရောက် မရောက် ဆိုသည့် ကိစ္စမှာ မေးခွန်းထုတ်စရာ ကိစ္စဖြစ်ကြောင်း ဆိပ်ကြီး ခနောင်တိုမြို့နယ် ပြည်သူ့ လွှတ်တော် ကိုယ်စားလှယ် ဦးတင်ထွန်းနိုင်က ဧရာဝတီသို့ ပြောသည်။
၂၀၁၈ ခုနှစ် သြဂုတ်လက ပဲခူးတိုင်း ဒေသကြီး တောင်ငူခရိုင် ရေတာရှည် မြို့နယ်ရှိ ဆွာချောင်း ရေလှောင်တမံ ရေပိုလွှဲ နံရံ ပြိုကျမှုကြောင့် အိမ်ခြေ ၁ သောင်းကျော် ရေနစ်မြုပ်ခဲ့ပြီး လူဦးရေ သောင်းချီ ရေဘေးသင့်ကိစ္စ ဖြစ်ပေါ်ခဲ့သည့် အတွက် အဆိုပါ ဘတ်ဂျက်ငွေများကို မည်ကဲ့သို့ ခွဲဝေသုံးစွဲကြောင်းကို ဦးတင်ထွန်းနိုင်က ပြည်ထောင် စုလွှတ်တော်တွင် မေးခွန်းထုတ်ခဲ့သည်။
၎င်းက “ဒီဘတ်ဂျက်တွေကို ဘယ်လို စီမံခန့်ခွဲ သုံးစွဲနေသလဲ ဆိုတာကို သိရဖို့ လိုတယ်။ မေးခွန်း မေးတော့ လွှတ်တော် ထဲမှာ ပြန်မဖြေဘဲ သိချင်ပါက ဝန်ကြီးဌာနက စာနဲ့ရေးပြီး မေးပါဆိုပြီး ဖြေသွားတယ်” ဟု ပြောသည်။
မြန်မာနိုင်ငံတွင် ဆည်၊ ရေလှောင်တမံပေါင်း ၂၄၂ ခု ရှိပြီး ဂရုတစိုက် စောင့်ကြပ် ထိန်းသိမ်းရမည့် အရေးကြီးသော ဆည် များမှာ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနအောက်၌ ၃၅ ခု၊ ရေအား လျှပ်စစ်အောက်တွင် ၇ ခု စုစုပေါင်း ၄၂ ခု ရှိကြောင်း ယခုကဲ့သို့ မိုးတွင်းကာလ၌ ဆည်များ တွင် ဆုံးဖြတ်ချက် ပေးနိုင်သည့် အရာရှိ အဆင့်များကို နေ့ည မပြတ် ထားရှိပေးရန် လိုအပ်ကြောင်း ဦးထွန်းထွန်းဦးက ပြောဆိုသည်။
စိုက်ပျိုးရေး၊ မွေးမြူရေးနှင့် ဆည်မြောင်း ဝန်ကြီးဌာန လက်အောက်တွင် ဆည်တမံ အရေအတွက် စုစုပေါင်း ၂၃၅ ခု ရှိ ကာ ရေလှောင် ပမာဏ အများဆုံး ဖြစ်သော၂၈ သိန်း ၈ သောင်း ဧကပေ သိုလှောင်နိုင်သည့် သဖန်းဆိပ်ဆည်နှင့်၊ ဧက ပေ ၇ သောင်း သိုလှောင်နိုင်သည့် မမြဆည်တို့ကြား ရဲနွယ်၊ ခပေါင်း၊ ကင်းတား၊ မုန်းချောင်း၊ ပေါင်းလောင်း စသည်ဖြင့် ဆည်ကြီး စာရင်းဝင်သည့် ဆည်အရေ အတွက် ၄၀ ခန့် ရှိကြောင်း သိရသည်။
၂၀၁၈ ခုနှစ် စက်တင်ဘာလ အတွင်းက လွှတ်တော်၌ စိုက်ပျိုးရေး၊ မွေးမြူရေးနှင့် ဆည်မြောင်း ဝန်ကြီးဌာန ပြည်ထောင်စု ဝန်ကြီး ဒေါက်တာ အောင်သူက NLD အစိုးရလက်ထက်တွင် ဆည်အသစ်ဆောက်လုပ်ခြင်း မရှိကြောင်း ပြောကြားထား သည်။
ဧရာဝတီ
0 comments:
Post a Comment